POISYONIGAP CHE KIYOKTOI 26 - BUKUIT NE TILIIL Sireet ne Dutero Kanon

Koetegei Paulo eng' taitap Agripa

¹ Koleenji anyun Agripa Paulo, Kagichamun iwolu ng'aleeguk. Kochuul anyun Paulo eunnyi, ak komwa ng'aleek che saruunegei, kole:

² Abwaati ale abaibai, ee laitoryat Agripa, amu amuuchi asarge rani eng' taing'ung' agobo tuguuk tugul che koitaamja Yahudik:

³ ne siirei ko amu ingen komyee pitonwek tugul ak teebutik tugul che tinyei Yahudik; nooto anyun, kasoomin ale igasa eng' muitaet.

⁴ Ingen Yahudik tugul ateptap sabeennyu, kobooch ko aa ming'in, ne ki atinye kobooch ko ka piitu eng' pororyennyu, ak eng' Jerusalem;

⁵ ak kongeno icheek kobooch eng' tai, nda chamei icheek kobaoryan, ko uu ye ki aa Pharisaindet ne isubi piteet ne koroom ne po kayanennyo.

⁶ Ak katonon nguno eng' yu si kirwookwo agobo kamang'unet ne po arorutyet ne kichopchi Kamuktaindet kwanisyekyok;

⁷ nooto ne imang'u ortinwekyok tamanu ak aeng' kole nyooru, koboisyechin Kamuktaindet eng' kagiiletapkei peet ak kemoi. Kagogikyo Yahudik agobo kamang'unoniito, ee, laitoryandani!

⁸ Amu nee si kibwaat keele ma iyanaksei eng' okweek keele, ing'eeti Kamuktaindet che ki kobek?

⁹ Ki abwaati aneendet iman ale kanyool ayai tuguuk che chaang' che kirindoi kainetap Jeso ne po Nazareth.

¹⁰ Ak ki ayai niito agine eng' Jerusalem: ak atoorchi korgorosyek piik che chaang' eng' che tiliileen, ko kagogoono kimnateet tisiik che eecheen, ak ki achame ye ki kibarei icheek.

¹¹ Ak ki abirote konyil che chaang' eng' sinagogisyek tugul, abirchini kochubis; ak ye kiga konyita icheek miising', ausote agoi nganasook che po toek.

Koaroru Paulo agobo kayanennyi

¹² Ak ye kinga wendi Damasko atinye kimnateet ak kayooktoet ne po tisiik che eecheen,

¹³ ageer lapkeiyet ne ki punu kipsengwet, ne siirei kaluunetap asiista, koluucha komoswek tugul kobooto che ki kibendi tugul, eng' ooreet peet kween, ee, laitoryandani.

¹⁴ Ak kingo kagibutyi ng'wony tugul, agas kutit ne leenjino eng' kutitap Yahudik, Saulo, Saulo, amu ne si iusoo? Pichiy eng' inyee ityar kiplitwet.

¹⁵ Ak ki ale, ii ng'oo inyee, Kiptaiyat? Kole Kiptaiyat, Aa Jeso ne iuse.

¹⁶ Ago ng'eet, tonon eng' keelyeguk: kang'ang'unge amu ni, ale andein iegu kiboityot ak paoryatap tuguuchu kaigeer agobo anee, ak tuguuk che tuun ang'ang'unenegei;

¹⁷ asaruun eng' piik, ak eng' Pororyosyek, ole tuun ayooktoin iwe,

¹⁸ si kobiit ing'aany konyekwak, ak koweek eng' mesundeito kobwonji lapkeiyet, ak eng' kimnateetap Setani kobwonji Kamuktaindet, si konyoor icheek nyoetap kaat ne po tengekwogik ak poroteet eng' icheek che ki kitiliil amu kayaneet ne mi eng' anee.

Komwaitoi Paulo agobo poisyetap amdaennyi

¹⁹ Nooto anyun, ee, laitoryandani Agripa, ma abistoe kaboorunet ne po kipsengwet:

²⁰ ago ki aboorchi che mi Damasko korook, ak eng' Jerusalem, ak eng' emet komugul ne po Judea, ak eng' Pororyosyek ak icheek, si kosik ak koyan Kamuktaindet, koyaei poisyonik che nyoljin siguunet.

²¹ Ki nama anyun Yahudik eng' Hekaluut amu niito, ak kotyem kobara.

²² Ye kinga nyooru toreteet ne punu Kamuktaindet, atonon agoi rani abaoryanjini che mengech ak che eecheen, amamwae kiy age kobatee che ki mwa maotik ak Musa, kole tuun pwoonei;

²³ kole kanyool konyalil Kristo, ak kole komwaita korook eng' ng'eetyeetap che ki pek, lapkeiyet, komwachi piik ak Pororyosyek.

²⁴ Ak ye kita kosarugei ko uu nooto, komwa Pesto eng' kutit ne oo, kole, “Paulo, ii kibiywa; kagogoonin iywek `kaneetetapkei ne oo.”

²⁵ Ago ki le Paulo, “Ma aa kibiywa, ee Pesto ne ii tagunoot: ago amwae ng'aleek che po iman ak che po ng'omnateet.

²⁶ Amu ingen laitoryat ng'aleechuuto, ineendet ne ang'alaaljini eng' nyiganateet: amu angen komyee, ale ma ung'ootiin ng'aleechu eng' ineendet, agot agenge; amu mayaak ng'olyoondoniito eng' taban.

²⁷ Laitoryat Agripa, tos iyani inyee maotik? Angen ale iyani.”

²⁸ Ak ki leenji Agripa Paulo, Ka neegit igaigaa eng' ng'aleek che ng'ering' aek Kristyanindet.

²⁹ Kole Paulo, “Achame ko uu nooto eng' Kamuktaindet, ale ngo eng' che ng'ering' anan eng' che chaang', ma inyee kityo, ago tugul ak icheek che kasa rani, ale kotebi ko uu anee, ago ama eng' ratuutichu.”

³⁰ Kong'eet anyun laitoryat, ak pounindet ak Bernike, kobooto icheek che ki mi tugul:

³¹ ak kingo kagoba, kong'alaaljigei icheegei, kole, “Ma yai chiichi kiy ne nyoljin meet anan ratisyosyek.”

³² Koleenji anyun `Agripa Pesto, “Kota kityaachi chiichi, nda ki ma riirchi Caesarea.”