POISYONIGAP CHE KIYOKTOI 25 - BUKUIT NE TILIIL Sireet ne Dutero Kanon

Kirwoogyin Paulo eng' taitap Pesto

¹ Kingo kagoit Pesto koronooto, kotogosta Jerusalem kobunei Caesarea, ko kagobata peetuusyek somogu.

² Ak ki mwachi tisiik che eecheen ak piik che taagunotiin che po Yahudik ng'aleek che kiting'e Paulo; ak kogaigai icheek ineendet,

³ kosoom chamdaet agobo ineendet, kole koyookto ineendet kimut konyo Jerusalem; si kobiit korat ooreet kobar ineendet.

⁴ Ago ki wol Pesto kole keriip Paulo eng' Caesarea, ak kole, Neegit si awo aneendet olooto.

⁵ Ak kole ineendet, “Ongechoortegei ak che eecheen eng' okweek, si ngo mi ng'olyoo age tugul ne ya eng' chiichito, komwa icheek.”

⁶ Ak kingo kagotebi eng' kwenunnywa kobooto icheek eng' peetuusyek che ma siirei sisiit anan ko taman, kochoortagei Caesarea; ak mutai kotebee ng'echereetap kirwooget, ak kong'at kole kimut Paulo.

⁷ Ak kingo kagoit, koyiem ineendet Yahudik che ki punu Jerusalem, koibu ng'aleek che chaang' che koroomen che ki itaame ineendet, che ki ma imuuch koboor komyee kiit ne ineet;

⁸ ago ki mwa Paulo eng' ng'aleek che kisaruunegei, kole, “Tom ayai tengek agot kitigin agobo Ng'atuutyetap Yahudik, anan agobo Hekaluut, anan agobo Caesarea.”

⁹ Ago ye kimachei Pesto kobaibai Yahudik, kowolji Paulo, koleenji, “Tos imache itogoste Jerusalem, si kirwoogun eng' olooto agobo tuguuchu eng' tainnyu?

¹⁰ Ago ki le Paulo, Atononi eng' taitap ng'echereetap kirwooget ne po Caesarea, ole kanyool kirwoogunena: tomo ayachi kiy ne ya Yahudik, ko uu ye ingen inyee komyee.

¹¹ Ngo aa kiptengekyo, ak ngot ko koayai kiy ne nyoljin meet, koma eesyoi ame: ago ngot koma po iman tuguuchooto, che itaamjino pichu, koma mi chii ne imuuchi kondea eunekwak. Ariirchini Caesarea.”

¹² Ak kingo kagong'alaal anyun Pesto ak piigap kapkirwook, kowol kole, “Kairiirchi Caesarea; ara anyun, iwendi kap Caesarea.”

Pesto ak laitoryat Agripa

¹³ Ak kingo kagosiirto peetuusyek alage, koit laitoryat Agripa ak Bernike Caesarea, si kogat Pesto.

¹⁴ Ak ye kita kobeniei peetuusyek che chaang', koboorchi Pesto laitoryat ng'aleegap Paulo, koleenji, “Miitei chii age ne ki pagaakta Felix ko rataat.

¹⁵ Ne kimwaiwo ng'aleekyik tisiik che eecheen ak poisyegap Yahudik ye ki ami Jerusalem, ki soomei ng'aleek che kigikyine ineendet.

¹⁶ Ak ki awolji icheek aleenji, ma piteetap Romanik kigoito chii kotomo kogeergei kimni chiito ne kitaami ak che itaamsei, ak konyoor poroindo ne saruunegei eng' ng'aleek che ki kitaamjin.

¹⁷ Ye kingo yumgei anyun eng' yu, ko mata agagei, ago eng' peetuut ne po aeng' atebee ng'echereetap kirwooget, ak ang'at kimut chiichooto.

¹⁸ Ak kingo tononso icheeget che ki itaami ineendet, koma koip ng'olyoo ne ya ne po kagikyino agobo ineendet ko uu ye ki abwaati;

¹⁹ ago kiting'e ineendet teebutik agobo kayanennywa, ak agobo chii ne kileen Jeso, ne ki kome, ne igiiljingei Paulo kole, sabei.

²⁰ Ago ki aleen agin ole teptoi ng'aleechu kotemena, ateebee ngo machei kwo Jerusalem, si kirwookyi eng' oliindo agobo ng'aleechuuto.

²¹ Ago kingo riirchi Paulo kotebi kole si kotil kirwooget pounindet ne oo, ang'at ale keriip agoi tuun ayookte kwo kap Caesarea.”

²² Ak ki leenji Agripa Pesto, “Amache agas agane ng'aleegap chiichito.” Koleenji, “Igase mutai.”

Paulo eng' taitap Agripa

²³ Ak mutai ko kagoit Agripa, kobooto Bernike, eng' etunateet ne oo, ak ko kagoba koot ne kigase ng'aleek, kobooto kiptainik che eecheen, ak piik che taagunotiin che po nganaseet, kimut Paulo eng' ng'atuutyetap Pesto.

²⁴ Komwa Pesto anyun, kole, “Laitoryat Agripa, ak piik tugul che kimi yu tugul, ogeere chiichi, ki koriircho tuiyet tugul ne po Yahudik agobo ineendet, eng' Jerusalem ak eng' olito, koboldos, koleen, manyol kota kosap.

²⁵ Ago ki ageer ale ma yai kiy ne nyoljin meet: ak ko uu ye ki riirchi ineendet pounindet ne oo, acham anyun ayookto ineendet.

²⁶ Ma tinyei ng'olyoo ne po iman ne asirchini kiptaiyandennyu agobo ineendet. Nooto anyun kamutu ineendet konyo taing'wong', ak ne siirei ko konyo taing'ung', inyee, laitoryat Agripa, si ye kageteebse, asich ng'olyoot ne asire.

²⁷ Amu ageere ale, ma nyolu kiyookto kimonjororyo, ama kibor tuguuk che ki kitaamjin.”