POISYONIGAP CHE KIYOKTOI 24 - BUKUIT NE TILIIL Sireet ne Dutero Kanon

Komi Paulo taitap Felix

¹ Ak kingo pata peetuusyek muutu, kochoorgei Anania tisiindet ne oo ak poisyek alak, ak ng'alaalindet age, ne kiguure Tertulo; ak koboorchi pounindet ng'aleek che ko kitaame Paulo.

² Ak kingo kageguur, kotoi Tertulo kotaam ineendet kole, “Amu kiboiboitune kaalyeet ne oo eng' inyee, ak ki istoi yaitwogik eng' pororyoni amu ng'omnateng'ung',

³ kitaach anyun eng' ortinwek tugul ak eng' komoswek tugul, kobooto kongoi tugul, ee inyee ne ii tagunoot, Felix.

⁴ Ago si mata again miising', asoomin ale igaseech eng' ng'aleek che ng'ering' eng' myeeindong'ung',

⁵ amu ki kegeer chiichi keele ineendet ko chii ne itoitos piich, ne ing'eeti chemerereet eng' Yahudik tugul eng' ng'wony komugul, ak kandoindet ne po kasubiigap Nazaretik.

⁶ Ki tyem kogeny kole kong'wanit Hekaluut, ak ki kinam ineendet. [Ak ki kimache kirwookyi ineendet ko uu ng'atuutikyok.

⁷ Ago ki nyo ole ki mi Lusia kiptaiyat ne oo ne po kiplugotinik, ak korebenech ineendet eng' eunekyok eng' kimnateet ne oo.]

⁸ Imuuchi inai tuguuchu tugul eng' ineendet ye igine inyeendet, agobo tuguuchooto ko kitaame.”

⁹ Ak ki iyomechigei Yahudik kataamsonooto, kogiimit kole uu nooto ng'aleechuuto.

Koetegei Paulo eng' taitap Felix

¹⁰ Ak kingo kagoboorchine pounindet Paulo euut, kole kong'alaal, kowol Paulo kole, “Asaruge eng' poiboiyet, angen ale, ii kirwoogindet ne po pororyoni eng' kenyiisyek che chaang'.

¹¹ Imuuchi inai ile tomo kosiir peetuusyek taman ak aeng' kobooch ngap atogoste Jerusalem awe asaa.

¹² Ama nyoorwo icheek eng' Hekaluut kibeligei ak chii age tugul, anan awase tuiyet, anan eng' sinagogisyek, anan eng' nganaseet.

¹³ Amaimuuchi icheek koboorun komyee tuguuk che itaamena.

¹⁴ Ago kang'ang'un niito, eng' Oranooto kuure icheek piteet age, aoote Kamuktaindet ne po kwanisyekyok, ak ayani tuguuk tugul ko uu ye mwaei Ng'atuutyet, ak che ki kisir eng' maotik:

¹⁵ atinye kamang'unet eng' Kamuktaindet, ne cheeng'ei pichu ak icheek, ale, tatun komi ng'eetyeetap che po imanda ak che ma po imanda.

¹⁶ Ak achobegei anyun agane eng' ng'olyoondoni atebee kotugul kabwaatet ne ma tinyei kanagut eng' taitap Kamuktaindet ak piik.

¹⁷ “Ak kingo pata kenyiisyek che chaang' anyoo aipchi piigap pororyennyu kagoochinoik ak tuguuk che kigoitoi.

¹⁸ Ye ki ayae niito, ko ki nyoortaa kitiliilo eng' Hekaluut, ak ki ma komi tuiyet anan polateet.

¹⁹ Ago ki mi Yahudik alak che ki punu Asia; myee nda kami yu icheek eng' taing'ung' si komwaitaa ngo ting'ena icheek ng'olyoo.

²⁰ Anan ingomwa pichu icheeget poisyet ne ya ne kinyoor, ye kinga tonon eng' taitap kapkirwooget,

²¹ kobatee tweguunet agenge ne ki ariirchi atononi eng' kwenunnywa, ale, ‘Kagirwokwo rani eng' taing'wong' agobo ng'eetyeetap che ki kobek.’ ”

²² Amu ki ingen Felix komyee agobo Oranooto, koleenji, “Ogen, ye tuun kachoorgei kiptaiyat ne oo Lusia, atil anyun ng'aleekwok.”

²³ Ak kong'at chemogetap kiplugotinik pogol kole keriip ineendet, ak kigoochin poroindo; amat koete age tugul eng' choronokyik koboisyechi ineendet.

Koratei `Felix Paulo

²⁴ Ago kingo pata peetuusyek alage, koit Felix, kobooto Drusila osotyonnyi, ne ki Chebyahudio, ak koyookto Paulo konyo, ak ki kas eng' ineendet agobo kayaneet eng' Kristo Jeso.

²⁵ Ak ye kita kong'alaali agobo imanda, ak riibetapkei, ak kirwooget ne nyoonei, koiyweis Felix, ak kowol kole, “Ui korook; ak ye tuun anyooru poroindo ne myee, aguurin.”

²⁶ Ki imang'u kole togot kogoochi Paulo silingisyek: kiguur anyun ineendet konyil che chaang', ak kong'alaal kobooto ineendet.

²⁷ Ago kingo keskei kenyiisyek aeng'u, konam Porkio Pesto poisyetap Felix; ak amu kimachei Felix kobaibai Yahudik, kobagaakta Paulo ko rataat.