POISYONIGAP CHE KIYOKTOI 23 - BUKUIT NE TILIIL Sireet ne Dutero Kanon

¹ Ak kingo keer Paulo kapkirwoogonooto komyee, komwa kole, “Che kitupche, ki atebee kotugul kabwaatet ne myee eng' taitap Kamuktaindet agoi rani.”

² Kong'at Anania, tisiindet ne oo, icheek che kitonondos eng' yooto kole, korabach kutinnyi.

³ Koleenji anyun Paulo ineendet, “Tuun pirin Kamuktaindet, inyee inaatut ne ki kisal koleelit. Itebye ak irwokwo ko uu ye mwaei Ng'atuutyet, ak ing'ate kebira ama chamdoi Ng'atuutyet?”

⁴ Komwa icheek che kitonondos eng' yooto kole, “Ichube tisiindet ne oo ne po Kamuktaindet?”

⁵ Kole anyun Paulo, Kama anai, che kitupche, ale ineendet ko tisiindet ne oo: amu ki kisir keele, Amemwa ne ya agobo pounindetap piiguk.

⁶ Ago ye kingo nai Paulo kole, Sadukaik alage, ko Pharisaik alage, komwa eng' kutit ne oo eng' kapkirwook kole, “Che kitupche, aa Pharisaindet, weeriitap Pharisaik. Kagirwokwo agobo kamang'unet ak ng'eetyeet ne po che ki kobek.”

⁷ Ak kingo kagomwa ko uu nooto, kong'eet anyun toiyet eng' Pharisaik ak Sadukaik: ak kipcheak tuiyet.

⁸ Amu mwaei Sadukaik kole, ma mi ng'eetyeet eng' che ki pek, anan malaika, anan saboon: ago iyani tugul Pharisaik.

⁹ Kong'eet anyun polateet ne oo: ak kitononso siriik alak che po Pharisaik, ak koboryo koleen, Ma kinyooru yaityo eng' chiichi: ak tos nee eng' okweek ngot ko kang'alaal ak ineendet kabuuso, anan malaika?

¹⁰ Ak ye kingo ng'eet toiyet ne oo, koywei kiptaiyat ne oo kole tos tonaton pichu Paulo, kong'at anyun kiplugotinik kochoortagei ak komut ineendet eng' kimnateet eng' kwenunnywa, ak komut konyo irimeet.

¹¹ Ak eng' kemout ne ki isubi nooto kotonon Kiptaiyat eng' ye neegitee ineendet ak koleenji, “Nyiganitu: amu ko uu ye ki ibaoryanjo eng' Jerusalem, ko uu nooto kanyool ibaoryan eng' Rome agine.”

Teteet kebar Paulo

¹² Ak kingo eech koyumgei Yahudik, ak korategei kayasyoet, kole ma kiame kiy ama kiee agoi kebar Paulo.

¹³ Ak ki siirei artam icheeget che ki yosyo.

¹⁴ Ak ki pwa ole mi tisiik che eecheen ak poisyek, ak koleenji, “Kageratkei eng' kayasyoet ne oo keele, ma ki chamchami kiy agoi kebar Paulo.

¹⁵ Oboorchi anyun okweek ak poisyek kiptaiyat ne oo komut ineendet kochoorgei konyo ole omi, ko uu ne omache ogin komyee ng'aleekyik. Ak kichobootiin acheek kebar ineendet agot kotom koriikyech.”

¹⁶ Ago ki kas weeriitap chepkametap Paulo agobo setyinennywa, ak ki nyo kwo irimeet ak komwachi Paulo.

¹⁷ Koguur anyun Paulo age eng' kiptainigap pogolwogik, ak koleenji, “Imut murenoni kwo ole mi kiptaiyat ne oo: amu tinyei ng'olyoo ne machei komwachi ineendet.”

¹⁸ Komut anyun ineendet kwo ole mi kiptaiyat ne oo, ak koleenji, “Kaguura Paulo, kimonjororyot, awo ole mi ineendet ak komwaiwo amutun murenoni konyo ole imi, tinyei ng'olyoo ne machei komwaun.”

¹⁹ Konam anyun kiptaiyat ne oo eutap weerooto, ak komut taban, ak koteebe eng' ung'oot kole, “Nee nooto imache imwaiwo?”

²⁰ Kole, “Kagochamyechi Yahudik kole kosoomin imutu Paulo kochoorgei mutai konyo kapkirwook, ko uu ne imache iteepse ineendet komyee.

²¹ Ameyanji anyun amu miitei eng' icheek che siirei artam che setyin ineendet, che kagoratkei eng' kayasyoet, kole ma amei kiy anan koe agoi kobar ineendet. Chobootiin icheek nguno kogeni ng'atuutyet ne punun.”

²² Kounda anyun kiptaiyat ne oo murenonooto kwo, ak kong'at ineendet koleenji, “Amemwachi chii agot agenge ileenji kaimwa tuguuchu.”

Kiyooktoi Paulo kwo Caesarea

²³ Ak kiguur kiptainik aeng' che po pogolwogik koba ole mi ineendet ak koleenji, “Ochop kiplugotinik pogol aeng' koba agoi Caesarea, ak kiplugotinik tamanwogik tisap che ketei paraisisyek, ak murenigap ng'otwek pogol aeng', eng' sait somok ne po kemoi.

²⁴ Ki mwachi kochop paraisisyek, si kobiit komute icheek Paulo, ak komut kot koit ole mi Felix pounindet kochamegei.”

²⁵ Ak kisir parweet ko uu ni:

²⁶ Anee Klaudio Lusia, agatin inyee pounindet Felix, ne ii tagunoot.

²⁷ Konam Yahudik chiichi, ak ki neegit kobar icheek ineendet, awe anyun ak kiplugotinik ole mi icheek, ak asaru ineendet, ko kaanai ale kaagaa Romanin ineendet.

²⁸ Ak ye ki amache anai kiit ne ki itaame icheek ineendet, amutu anyun kochoorgei kapkirwoogennywa:

²⁹ ageer ale, ki kitaam ineendet agobo ng'aleegap ng'atuutikwak, ago ma mi ng'olyoo ne ki kiityi ineendet ne nyoljin meet anan ratuutik.

³⁰ Ak ye kongiboorwo keele kogechop ng'aleek eng' ung'oot agobo ineendet, ayoogu ineendet konyo olong'ung' achogune, ak ang'at che kataamikyik si komwa ng'aleek eng' taing'ung', che itaame ineendet.

³¹ Komut anyun kiplugotinik Paulo, ko uu ye kagaging'at, ak komut kemoi kwo Antipatris.

³² Ago mutai kobagaakta murenik che ki laanyei paraisisyek koba kobooto ineendet ak koweektagei koba irimeet:

³³ ak kingo kagoit Caesarea, ak kogoochi pounindet parweet, konde Paulo agine tainnyi.

³⁴ Ak ye kiga kosoman parweet, koteebe icheek koleenji, ano emetap chiichi? Ak kingo kas keele, po ineendet Cilicia,

³⁵ kole, “Tuun agasun ng'aleeguk ko kait piik che ki itaamin.” Ki ng'at keriip ineendet eng' kootap kirwooget ne po Herod.