POISYONIGAP CHE KIYOKTOI 21 - BUKUIT NE TILIIL Sireet ne Dutero Kanon

Kowendi Paulo kotokyingei Jerusalem

¹ Ye kingo kagebesye ak icheeget, ak ketau keebe eng' moinget, kilitit panda, kitoorchigei Kos, ak peetuut ne ki isubi nooto keit Rhodes, ak keebe eng' olooto agoi keit Patara.

² Ye ki ngenyooru meeliit ne landoi kowendi Phoenisia, kelaany, ak keebe.

³ Ak ye kiga kegeer Cyprus, kesiirtoe komi euut ne po kaataam, keebe agoi Syria, ak kechooruge eng' meeliit eng' Tyro, amu yooto ye kinemune tuguugap meeliit.

⁴ Ak ye kiga kenyooru kasubik, ketebi eng' olooto peetuusyek tisap. Ki mwachi `icheek Paulo eng' Kabuuset ne Tiliil koleenji amat kotyech Jerusalem.

⁵ Ak kingo kagigesu peetuusyechooto, keebe pandanyo; ak ki iyomiseech icheek tugul kobooto osotik ak lagok, agoi kemande eng' nganaseet, ak kegutung'se eng' ngeguut, kesaa

⁶ ak kigoochigei saisere. Kelaany anyun meeliit koweek icheek koba kaa.

⁷ Ak ye kiga kigeesu panda ne po moinget kebunu Tyro, keit Ptolemais; ak kigat tupchosyek, ak ketebi kobooto icheek peetuut agenge.

⁸ Ak eng' peetuut ne po aeng' keebe, agoi keit Caesarea: ak keebe kootap Philipu amdoindet ne po logoiywek che myach, ineendet ko agenge eng' piik tisap, ak ki kitebi ak ineendet.

⁹ Ki tinyei chiichito tiibiik ang'wan, pergeinik, che ki maoteni.

¹⁰ Ak ye kita ketebye eng' peetuusyek che chaang' eng' olooto, konyo kochoorgei maotyot age ne punu Judea ne ki kiguure Agabo.

¹¹ Ak kingo kagoit ole kimi, konam pireneetap Paulo, ak korate keelyekyik ak eunekyik, ak kole, “Mwaei Kabuuset ne Tiliil ko uu ni kole, ‘Ratei ko uu niito Yahudik che mi Jerusalem chiitap ko po pirenoni, ak tuun indoi ineendet eunegap Pororyosyek.’ ”

¹² Ak ki ngegas ng'aleechuuto, kigaigai ineendet, acheek ak piigap olooto, si ma togosta Jerusalem.

¹³ Kowol Paulo kole, “Oyae nee, orirtosi ak obare muguleldanyu? Amu aa choboot, ma kerata kityo, ago ame eng' Jerusalem agobo kainetap Kiptaiyat Jeso.”

¹⁴ Ak ye ki mata kocham ko uu nooto, kesisye, kemwa keele, “Ingoyaak mageetap Kiptaiyat.”

¹⁵ Ak kingo pata peetuusyechooto kenam tuguukyok ketogoste Jerusalem.

¹⁶ Ak ki kibe kobooto kasubik che ki punu Caesarea, komutu Mnason ne po Cyprus, ne kiga koek kasubin koek keny, ne ki kibendi ketebee koonnyi.

Komi `Paulo Jerusalem

¹⁷ Kingeit Jerusalem, kotaachech tupchosyek eng' poiboiyet.

¹⁸ Ak peetuut ne ki isubi peetuunooto keebe acheek ak Paulo kap Jakobo; ak ki mi poisyek tugul.

¹⁹ Ak kingo kagogat icheek, kotetyi tuguuk tugul agenge agenge che kiga koyai Kamuktaindet eng' poisyennyi eng' Pororyosyek.

²⁰ Kingo kas icheek ng'olyoondonooto, kogonyit Kamuktaindet. Koleenji `icheek ineendet, “Igeere anyun, ne kitupche, ole tee eliphuusyek ng'iisyat eng' kwenutap Yahudik che ki koyan; ak tinyei tugul kagiiletapkei agobo Ng'atuutyet.

²¹ Ak ki kiboorchi icheek agobo inyee, keele, ineeti Yahudik tugul che mi ye mi Pororyosyek kobagaakta Musa, ak ileenjini icheek amat komuratan lagokwak, anan koosup pitonwek.

²² Nee anyun nguno? Ma kogas icheek iman kole kaiitu.

²³ Yai anyun ni kimwaun: Ki tinyei piik ang'wan che ki koarorta kiy eng' kayasyoet;

²⁴ imut anyun pichu, ak ianyinyge kobooto icheek, ak igamanji fedha, si kobiit kicherchi metowekwak: si konai tugul kole ma mi imanit eng' tuguuchooto ki kiboorchi agobo inyee; ago inyee iwendoti komyee, iriibe Ng'atuutyet.

²⁵ Ago eng' Pororyosyek che ki koyan, kogigesir ketil kirwooget keele, kotabaanegei tuguuk che kieng'jin kanamonik, ak korotiik, ak panyeek che po che kagiget, ak sokseet.”

²⁶ Komut anyun Paulo murenjoto, ak eng' peetuut ne po aeng' koanyinygei kobooto icheeget ak kwo Hekaluut oriit, koboortoi kasuldaetap peetuusyek che po kaanyinyet, agoi kigoito kagoochinet ne po age tugul eng' icheek.

Kenamei Paulo eng' Hekaluut

²⁷ Ye kimachei kogeskei peetuusyek tisabu, kowas tuiyet Yahudik che ki punu Asia, ye kingo keer ineendet komi Hekaluut. Ak konam ineendet,

²⁸ koboldos koleen, “Okweek piigap Israel, otoretech! Chiichito ne ineeti piik tugul eng' komosta age tugul kowech piik, ak Ng'atuutyet, ak yuto: ak kobooto nooto koimut Yunanik ak icheek kobwa Hekaluut, ak kagong'wanit yuto tiliil.”

²⁹ Amu kiga kogeer Tropimo Ephesoindet komi kobooto ineendet eng' nganaseet, ne kileen ki imutu Paulo konyo Hekaluut.

³⁰ Kowaskei anyun nganaseet komugul, ak ki rwai piik kibagenge: ak konam Paulo, ak kochuut komong' eng' Hekaluut: ak ki kiger kurgotik eng' sainooto.

³¹ Ak ye ki cheeng'ei kobar ineendet, koityi ng'aleek kiptaiyat ne oo ne po murenigap lugeet kole, miitei chemargeet Jerusalem komugul.

³² Komut sainooto kiplugotinik ak kiptainigap pogolwogik, korwai kochoortagei ole mi icheek: ak kingo keer icheek kiptaiyat ne oo ak kiplugotinik, kobagaakta pireet ne kibirei Paulo.

³³ Konyo anyun kiptaiyat ne oo koriik, ak konam ineendet ak kong'at kole, kerat ineendet eng' nyororosyek aeng'; ak koteebe kole, ng'oo niito? Ak kayai nee?

³⁴ Ak kobolyo alak eng' tuiyet komwaei kiit age komwaei alage kiit age: ak ye ki ma imuuch konai komyee kiit ne po polateet, kong'at kole kimut ineendet kwo irimeet.

³⁵ Ak kingo it lang'eiywot, koganap kiplugotinik ineendet amu koroomnatetap tuiyet;

³⁶ amu ki isubi tuiyet ne po piik, koboldos, koleen, Oiste ineendet.

Kong'alaaljin Paulo tuiyet

³⁷ Ak ye ki kimachei kimut Paulo kwo irimeet, koleenji kiptaiyat ne oo, “Ichamwo amwaun ng'olyoo?” Koleenji, “Tos ingen kutitap Yunanik?

³⁸ Tos ma ii Misirindet ne ki ing'eet lomset yaginye ak komut piik eliphuusyek ang'wan koba surkwen, piik che kiguure Rumiik?”

³⁹ Ago ki le Paulo, “Aa Yahudyot ne po Tarsis eng' Cilicia, aa po nganaseet ne ma nyeraat; ak asoomin ale, chamwo ang'alaalji piik.”

⁴⁰ Ye kingo kagochamji, kotonone Paulo lang'eiywot, ak koboorchi piik eng' euut kosiisyo; ak ye kingo kagosiisyo inne, kong'alaalji icheek eng' kutitap Yahudik, kole,