POISYONIGAP CHE KIYOKTOI 20 - BUKUIT NE TILIIL Sireet ne Dutero Kanon

Kowendi `Paulo Makedonia ak emetap Yunanik

¹ Ak kingo pata polateet, ko kagoyookto Paulo kasubik kobwa ak kogimit icheek, koyomiskei, si kwo Makedonia.

² Ak kingo kagobun komoswechooto, ko kagogimiit icheek eng' ng'aleek che chaang', koit Greece.

³ Ak kingo kagotebee olooto arawek somok, kochop Yahudik ng'aleek eng' ung'oot agobo ineendet, ye kimachei kobun moinget kwo Syria, komachei kole koweegegei ooreetap Makedonia.

⁴ Ak ki pa kobooto ineendet agoi Asia Sopatro ne po Berea, ne po kap Puro; ak che po Thessalonikek Aristarko ak Sekundo; ak Gaio ne po Derbe, ak Timoteo; ak Tukiko ak Tropimo che po Asia.

⁵ Ago kiga kondo chuuto, ak ki igenech eng' Traos.

⁶ Ak ki kibun moinget eng' Philippi ko kagobata peetuusyegap magatyat ne ma kinde mermereek, ak keit ole mi icheek eng' Traos eng' peetuusyek muut; ole ki kitebee eng' peetuusyek tisap.

Eutiko

⁷ Ak eng' peetuutap tai ne po wigiit ye kiga kiyumge si kebuutul magatyat, koamji Paulo icheek, ye kimachei kwo eng' peetuut ne po aeng'; kong'alaal koek keny agoi kemoi kween.

⁸ Ak ki mi taisyek che chaang' eng' koot ne po parak, ole kiga kiyumjige.

⁹ Ak kitebee tirisyet neraneet age ne ki kiguure Eutuko ak kibirto met; ak kita koamji Paulo koek keny, ak kingo pirto met, kotururtogei kong'etee koot ne po somok, ak ki kisut ko kagome.

¹⁰ Ak kichoortagei Paulo, ak koitaegei ineendet ak kosuube eunekyik, komwa kole, “Moiimge; amu ta kosabei.”

¹¹ Ak kingo togosta, ak kobuutul magatyat, ak koam, ak kong'alaal keny kobooto icheek, agoi koeech, kwo anyun.

¹² Ak ki imut nerananooto ko kagosap, ak kinyoor kagaigaet ne oo.

Panda ne wendi Mileto

¹³ Ago ki kindoi acheek keebe meeliit, keebe Assos, amu ki kimache kimut Paulo eng' olooto: amu kiga kong'at ineendet ko uu nooto, komach ineendet kole kobun keeldo.

¹⁴ Ak ye ki ngetuiye ak ineendet eng' Assos, kimut ineendet konyo moinget, ak keit Mitulene.

¹⁵ Ak ki kibe eng' olooto kebun moinget, keit Ki o eng' peetuut ne po tai; ak peetuut ne po aeng' keit Samo; ak peetuut ne po somok keit Mileto.

¹⁶ Amu kiga kobegechi Paulo kwo kosiirtoe Epheso eng' moinget, si ma igagei eng' Asia; amu ki igirgiri, kole tamangap koit Jerusalem eng' peetuutap Pentekoste.

Ng'aleegap Paulo che po saisere

¹⁷ Ak ki iyookto eng' Mileto keguur poisyegap kaniset eng' Epheso.

¹⁸ Ak ye kingo pwa ole mi ineendet, koleenji, “Ongen okweeget kobooch peetuut ne po tai ye kinga tau atyech Asia, ole ki ateptoi kobootok tugul,

¹⁹ aboisyechini Kiptaiyat eng' kaming'inetapkei tugul, ak eng' peegap kong', ak eng' tyemuutik che kibwanjo eng' chobutik che po ung'oot che po Yahudik;

²⁰ ko uu ye ki ma ariiny amwaiwok kiy age tugul ne imuuchi kotoretook, ak aneetaak eng' taitap piik, ak ang'eete koot age agoi koot age,

²¹ abaoryanjini Yahudik kobooto Yunanik siguunet eng' taitap Kamuktaindet ak kayaneet eng' Kiptaiyandennyo Jeso Kristo.

²² Ak ogeer anyun nguno, awendi Jerusalem ko aa mutworiin ne po Kabuuset ne Tiliil, amangen tuguuk che pwonjino eng' olooto:

²³ kobatee kityo paoryanjino Kabuuset ne Tiliil eng' nganaseet age tugul, koleen, igeno ratisyosyek ak nyalilwogik.

²⁴ Ago ma iiti saboondanyu ale kiy ne achame kot, si kobiit agees pandanyu, ak poisyet ne ki ataach eng' Kiptaiyat Jeso, abaoryanji logoiywek che myach che po myeeindap Kamuktaindet.

²⁵ “Ak nguno anyun, ogeero, angen ale okweek tugul che ki aamdaate logoiywegap laitornatetap Kamuktaindet, koma ogeere togeennyu kogeny.

²⁶ Abaoryani anyun eng' taing'wong' peetuuni, ale, aa tiliil eng' korotiigap piik tugul.

²⁷ Amu ma ariiny amwaiwok maguutik tugul che po Kamuktaindet.

²⁸ Oriipkei anyun okweeget, kobooto akweet tugul, ne ki koonok Kabuuset ne Tiliil oegu riibiik, obai kanisetap Kamuktaindet, ne ki ale korotiikyik.

²⁹ Angen ale ye kaawe komong'jok suik che koroomen, ama riiree akweet.

³⁰ Ak tuun ng'eetos alage eng' kwenung'wong' komwaei ng'aleek che imaasi piich, si kochuut kasubik koosup icheek.

³¹ Oriipse anyun, ak obwaat ole ma abagaakte atigoon chii age tugul eng' peegap kong' eng' kenyiisyek somok kemoi ak peet.

³² “Ara anyun, kabagakyok nguno eutap Kamuktaindet, ak ng'olyootap myeeindonyi, ne imuuchi koteechak, ak kogoonok poroteet kobooto icheek tugul che kitiliili.

³³ Ma agase myat fedha che po chii age tugul, anan thahabu, anan ngoroik.

³⁴ Ongen okweek ole kibois eunechu agobo tuguuk che ki anyalili, ak agobo icheek che ki mi kobooto.

³⁵ Ki agoonok kaboorunet eng' tuguuk tugul, ale ye oboisyei ko nyolu otoret che ma tinyei kimnateet, ak obwaati ng'aleegap Kiptaiyat Jeso, ko uu ye ki mwa ineendet kole ‘Tinyei poiboiyet kagoitoet kosiir taaget.’ ”

³⁶ Ak kingo kagomwa ko uu nooto, kogutuny, kosa kobooto icheek tugul.

³⁷ Ak ki riiryo icheek tugul miising', ak kosuup kaatitap Paulo, ak kong'utut ineendet,

³⁸ koaragendos kosiir agobo ng'olyoot ne kiga komwa, kole ma tuun kogeerei togeennyi kogeny. Ak ki iyomis ineendet kowendi kolaanyei meeliit.