POISYONIGAP CHE KIYOKTOI 2 - BUKUIT NE TILIIL Sireet ne Dutero Kanon

Konyonei Kabuuset ne Tiliil

¹ Kingo it peetuutap Pentekoste, ko ki mi tugul komosta agenge.

² Ak ki mong' eng' sainooto cheet ne punu kipsengwet ko uu usoonet ne usei eng' kimnateet ne oo, ak ki nyi koot komugul ole ki tebee.

³ Ak ki mong'ji ng'elyebwek che pcheotin, che uu che po maat; ak ki tebee age tugul eng' icheek.

⁴ Ki nyi icheek tugul Kabuuset ne Tiliil ak ki toi kong'alaale kutusweek alak, ko uu ye ki igoochi Kabuuset ne Tiliil icheek kamuget kong'alaal.

⁵ Ki mi Yahudik che ki menyei Jerusalem, piik che ki konyiti Kamuktaindet, che ki punu pororyet age tugul ne mi kurereetap kipsengwet.

⁶ Kingo kas cheonooto, koyumgei tuiyet ak kokwong'yo, amu ki kas chii tugul pichooto kong'alaali eng' kutinnyi.

⁷ Ak ki tang'any tugul ak kokwong'yo komwaei koleen, “Ogeero, tos ma piigap Galilaya chu tugul ng'alaaldos?

⁸ Ak katepto ano si kegas acheek chii tugul eng' kutinnyo, ne ki kisiktech?

⁹ Echeek alak ko Partik, alak ko Medoik ak alak ko Elamik, alak kora ko che menyei Mesopotamia, Judea ak Kapadokia, Ponto ak Asia,

¹⁰ Phrygia ak Pamphylia, Misiri ak komoswek che po Libya che neegitee Kurene, ak toek che punu Rome, Yahudik kobooto che ki punji Yahudik eng' kayanennywa,

¹¹ Kretik ak Arabuuk, kigase icheek kong'alaali eng' kutusweekyok poisyonik che eecheen che po Kamuktaindet.”

¹² Ki tang'any tugul ak kogereer met, koleenjingei icheegei, “Egu nee ng'olyoondoni?”

¹³ Ago kichombil alak kole, “Kabogityo eng' divaik che leelach.”

Kong'alaaljin `Petero tuiyet

¹⁴ Ago ki tonon Petero kobooto taman ak aeng' ak koleenji eng' kutit ne oo: “Okweek piigap Judea ak okweek tugul che omenye Jerusalem, ingonaak ni eng' okweek, ak oepchi iit ng'aleekyuk.

¹⁵ Ma pogityo pichu, ko uu ye obwaati; amu ta ko sait somok kityo.

¹⁶ Achicha, niito ne kimwaei maotyot Joel kole,

¹⁷ ‘Tuun eng' peetuusyek che po let, mwaei Kamuktaindet, aroong'jini piik tugul Kabuusennyu ne Tiliil, ak komaoten weeriikwok ak tiibiikwok, ak kogeer murenikwok ng'ang'utik, ak korwotyi poisyekwok karwotitaosyek.

¹⁸ Ee, agot otwogikyuk, che murenik ak tiibiik, eng' peetuusyechooto aroong'jini Kabuusennyu ne Tiliil; si komaoten.

¹⁹ Ak abarte kwang'utik eng' kipsengwet parak, ak kaboorunoik eng' oli po ng'wony, korotiik, maat ak koiyenetap iyeto.

²⁰ Kiwolei asiista koek mesundeito, ak kewal arawet koek korotiik, kotom koit peetuutap Kiptaiyat, peetuut ne oo ak ko ne tagunoot.

²¹ Ak age tugul ne kuurei kaineetap Kiptaiyat ko tuun kisaru.’

²² “Okweek piigap Israel, ogas ng'aleechu: Jeso ne po Nazareth, chiito ne ki ibarta Kamuktaindet eng' okweek eng' poisyonigap kimnateet ak kwang'utik ak kaboorunoik, che ki yai Kamuktaindet eng' ineendet eng' kwenung'wong', ko uu ye ongen okweek.

²³ Ineendet ne ki igoito Kamuktaindet eng' pegechinetap ng'olyoondennyi ak naet ne kiga kechop eng' tai, ki ogartaat okweek ineendet ak obar eng' eunegap piik che pistoe ng'atuutik.

²⁴ Ago ki ing'eet `Kamuktaindet ineendet, ko kagotyach eng' ng'wanindo ne po meet, amu ki ma komuuchi meet konam ineendet.

²⁵ Amu ki mwa Daudi agobo ineendet kole, ‘Ki ageere Kiptaiyat kotugul komi tainnyu, amu mi ineendet eunnyu ne po tai si ma kitumduma.

²⁶ Amu nooto anyun kogasegei muguleldanyu ak kibaibait ng'elyeptanyu; kobooto nooto komeng'iisyei poortanyu agine eng' kamang'unet.

²⁷ Amu mebagakyini saboondanyu ye mi che ki kobek, Amegoitoi neng'ung' Ne Tiliil kogeer nunet.

²⁸ Ki igoono anai ortinwegap saboondo; inyiitwa poiboiyet eng' taing'ung'.’

²⁹ “Che kitupche, amwaiwok komyee agobo poiyot ne oo Daudi, ale, kime ak ki kitup, ak miitei kererinnyi kwenunnyo agoi ra.

³⁰ Ak amu kimaotyo, ak ki ingen kole kiga koyasyechi `Kamuktaindet ineendet kole, indoi Kamuktaindet ng'echerennyi chiito ne tuun punu iyotennyi.

³¹ Kingo keer niito anyun kong'alaal agobo ng'eetyeetap Kristo kole, ‘Ma kibagakyin ineendet ye mi che kibek, ama nunei poortanyi.’

³² Ki ing'eet `Kamuktaindet Jeso niito, ne ki paorinikyik acheek tugul.

³³ Amu itoroorot ineendet eng' eutap tai ne po Kamuktaindet, ak ko kagetaach eng' Kwanda kayomiset ne po Kabuuset ne Tiliil, ko kagoroong' anyun niito ogeere ak ogase.

³⁴ Amu ki ma togosta Daudi kipsengwet, ago ki mwa ineendet kole, ‘Ki leenji Kiptaiyat Kiptaiyandennyu, Tebee eunnyu ne po tai,

³⁵ agoi ayai puuniguk koek ng'echereetap keelyeguk.’

³⁶ “Ingonai anyun komyee koot komugul ne po Israel kole, kigoyai `Kamuktaindet ineendet koek Kiptaiyat ak ko Kristo, Jeso niito ne ki ogartaat.”

³⁷ Kingo kas anyun niito, kotoor mugulelwekwak, ak koleenji `icheek Petero ak che kiyooktoi chuun alak, “Che kitupche, ki yai nee?”

³⁸ Koleenji `Petero icheek, “Osigu, si kibatisan age tugul eng' okweek eng' kaineetap Jeso Kristo agobo nyoetap kaat ne po tengekwogikwok; si otaach konunetap Kabuuset ne Tiliil.

³⁹ Amu neng'wong' kayomisoni, ak lagokwok, ak tugul che mi ole loo, ak tugul che ta koguurei Kiptaiyat Kamuktaindet nenyo kobwonji ineendet.”

⁴⁰ Ak kibaoryan eng' ng'aleek alak che chaang' ak ko ki il koleenji, “Osaruge eng' ibini kunuur.”

⁴¹ Ki kibatisan anyun icheeget che kitaach ng'olyoondennyi, ak ki kitesyi icheek peetuunooto piik olo po eliphuusyek somok.

⁴² Ki igiiljingei icheek tugul kaneetisyetap che kiyooktoi ak yamdaet, eng' putuletap magatyat ak saautik.

Sabeetap piigap Kristo

⁴³ Ki nyoor chii tugul kaiyweisyet, ak kiyaak kwang'utik che chaang' ak kaboorunoik eng' che kiyooktoi.

⁴⁴ Ki mi tugul kibagenge che kiga koyan ak ki yamdoi tuguuk tugul.

⁴⁵ Ki alda mbareenikwak ak tuguuk alak che ki tinyei ak kopchechi icheek tugul che tee che kinyaliili chii age tugul.

⁴⁶ Ki mi Hekaluut peetuut age tugul kotebyei eng' kabwaatet agenge, ak eng' putuletap magatyat eng' kaa ak ki amisyei eng' kaagaasetapkei, ak eng' muguleldo agenge,

⁴⁷ kolasu Kamuktaindet ak ki poiboi piik tugul agobo icheek. Ak eng' peetuut age tugul ko ki tesyin `Kiptaiyat icheek piik chooto ki nyooru sorunet.