POISYONIGAP CHE KIYOKTOI 19 - BUKUIT NE TILIIL Sireet ne Dutero Kanon

Paulo eng' Epheso

¹ Ak ye kita komi Apolo Korinto, ko kagobun Paulo emet kween, koit Epheso ak konyoor kasubik.

² Ki leenji icheek, “Tos ki otaach Kabuuset ne Tiliil ye kingo yan?” Koleenji, “Achicha, tomo agot kegas ngo miitei Kabuuset ne Tiliil.”

³ Ak ki leenji, “Ki kibatisanjok nee anyun?” Ak ki le, “Ki kibatisanjech kabatisanetap Johana.”

⁴ Kole Paulo, “Ki ibatisanis Johana eng' kabatisanetap siguunet, koleenjin piik kanyool koyan ineendet ne isubu ineendet, nooto ko Jeso.”

⁵ Ye kingo kas niito, kibatisan icheek eng' kainetap Kiptaiyat Jeso.

⁶ Ak ye kingo kagogonoor `Paulo eunekyik icheeget, konyonji anyun `Kabuuset ne Tiliil icheek, ak ki ng'alaal eng' kutusweek che teerchiin, ak koamda.

⁷ Ak ki olo po taman ak aeng' pichooto tugul.

⁸ Ki wo sinagogit oriit ak kong'alaal eng' nyiganateet eng' arawek somok, kong'alaali ak kolomei agobo tuguuk che po laitornatetap Kamuktaindet.

⁹ Ago ye kingo uegitu mugulelwegap alak ak kobistoe, ak komwaei ne ya agobo Oranooto eng' taitap tuiyet, kwo eng' ole mi icheek, ak kotabaan kasubik, kong'alaaljin peetuut age tugul eng' sukulitap Turano.

¹⁰ Ki yaak ko uu nooto eng' kenyiisyek aeng'; kot kogas ng'olyootap Kiptaiyat tugul che ki menyei Asia, Yahudik kobooto Yunanik.

Koamdoi Paulo eng' kimnateet eng' Epheso

¹¹ Ak ki yai Kamuktaindet poisyonigap kimnateet che teer eng' eunegap Paulo:

¹² kot keipchi che myandos kitambaok ak angook che kiga kotiiny poortanyi, ak ki istogei myanwogik eng' pichooto, ak ki manda tamirmirik che yaacheen eng' icheek.

¹³ Ak ki toi Yahudik alage che ki ombenoti, che kileen koon oik, komwa kainetap Kiptaiyat Jeso eng' icheeget che ki tinyei tamirmirik che yaacheen, koleen, “Ayosyewok eng' Jeso ne amdoi Paulo.”

¹⁴ Ak ki mi weeriik tisabu che po Skeba, ineendet Yahudyot, tisiindet ne oo, che ki yai ng'olyoondoniito.

¹⁵ Ak ki wolji tamirmiryet ne ya icheek, koleenji, “Angen Jeso, ak angen Paulo; ago okweek ko oo ng'oo?”

¹⁶ Ak kitorombenji chiichooto ki tinyei tamirmiryet ne ya icheek, ak konenet icheek, ak koterteer, kot komwei komanda eng' koyooto aach ngor ko kagiguoten.

¹⁷ Ak kinaak niito eng' tugul, Yahudik kobooto Yunanik, che ki menyei Epheso; ak kinyoor kaiyweisyet icheek tugul, ak kinyoor teegisto kainetap Kiptaiyat Jeso.

¹⁸ Ki pwa ak icheek che chaang' che ki iyan, kong'aanyei ak koboortoi poisyonikwak.

¹⁹ Ki ip anyun bukuisyekwak `piik che chaang' eng' icheek che kiyaei ng'oorset, ak kobeel eng' taitap pichooto tugul; ak kiit kamanuutyennywa, konyoor kole ki itei fedhaisyek eliphuusyek konom.

²⁰ Kotesak ko uu nooto anyun ng'olyootap Kiptaiyat eng' kimnateet ak koterteer.

Chemargeet eng' Epheso

²¹ Kingo pata anyun tuguuchuuto, komach Paulo eng' muguleldonyi kwo Jerusalem, ko kagobun Makedonia ak Akaia, koleen, “Ye kaawe olooto, ko kanyool ageer Rome agine.”

²² Ye kingo kagoyookto aeng' eng' icheek che kiboisyechin ineendet koba Makedonia, Timoteo ak Erasto, kota kotebi ineendet eng' Asia ne matya.

²³ Ak king'eet polateet ne oo eng' peetuusyechooto agobo Oranooto;

²⁴ Chiito age ne kiguure Demetrios ko ki kitang'indet ne po fedha, ne ki itanyi kanamonik che po fedha che po Artemi, ne ki ipchin tuguuk che chaang' kitang'ik.

²⁵ Ki iyum chuuto kibagenge, kobooto piik che ki tinyei poisyet ne uu nooto, ak koleenji, “Murenju, ongen okweek ole, punu mogornatennyo poisyoni.

²⁶ Ogeere ak ogase ole, ma eng' Epheso kityo ago neegit Asia tugul, kagochuut piik che chaang' Paulo-iniito, ak koweechi, koleenjin chooto ki kiyae eunek koma kamuktaik.

²⁷ Ma keele kityo piitu pichiindap sasisyet ne kisasei poisyennyo; ago kiiti keele ma kiy hekaluutap kamuktain ne oo ne kobogoryot Artemi, ak keistoe ineendet teegistanyi ne koilasu Asia tugul kobooto ng'wony.”

²⁸ Ye kingo kas niito, konereekso inne ak kobolyo kole, “Oo Artemi ne po Ephesoek!”

²⁹ Ak konyi anyun nganaseet polateet; ak korwai kibagenge ye mi ureryet, ko kagonam Gaio ak Aristarko, piigap Makedonia che kibendoti ak Paulo.

³⁰ Ak ye kimachei kwo Paulo oriit ole mi piik, koma kochamji kasubik.

³¹ Ak ki iyookto ng'olyoot piik alage che eecheen che po Asia, amu ki choronokyik, si mat kogoitogei kwo ye mi ureryet oriit.

³² Kiboldos anyun alage, komwaei ni, komwaei alage kiit age; amu ki piit polateet eng' tuiyet, ak ki ma kongen che chaang' kiit ne ki igoochi kotuiyo.

³³ Ak ki imut Aleksanda komong' eng' tuiyet, kogoito `Yahudik ineendet. Ak ki iboorchi `Aleksanda pichooto eng' euut, ak kimachei kosargei eng' pichooto.

³⁴ Ago ye kingo nai kole ineendet ko Yahudyot, kobolyo tugul eng' kutit agenge, eng' olo po saisyek aeng', koleen, “Oo Artemi ne po Ephesoek!”

³⁵ Kingo kagomwachi siriindetap nganaseet tuiyet kosiisyo, kole, “Okweek piigap Epheso, tos mi ng'oo ne ma ingen kole nganaseetap Ephesoek ko riibindetap hekaluutap Artemi ne oo, ak kanamwet ne ki ibut kobunu parak?

³⁶ Ak ngo ma kimuuchi ketiiyo agobo tuguuchu, ko kanyool osisye, matosartae ng'olyoo.

³⁷ Amu kaomutu pichu, che ma reenyei hekalutap kamuktaindet ama chubei kamuktaindennyo ne kobogoryo.

³⁸ Ngo tinyei anyun Demetrios ak musogik che mi kobooto ineendet, ng'olyoo agobo chii, ko yaatatin kapkirwoogutik, ak miitei pounik: ingorwookyin anyun icheegei.

³⁹ Ago ngo cheeng' okweek ng'olyoo agobo tuguuk alak, ko tuun kilititi eng' tuiyet ne cham komi.

⁴⁰ Amu mi pichiindo ne tos kirwookwech agobo polateet ne po rani, amu ma mi kito ne po: ak ma kimuuchi ketetu kiy agobo tuiyoni.”

⁴¹ Ak kingo kagomwa ko uu nooto, kotyakta tuiyet.