POISYONIGAP CHE KIYOKTOI 18 - BUKUIT NE TILIIL Sireet ne Dutero Kanon

Komi Korintho

¹ Kingo pata tuguuchu kwo Paulo eng' Athens, ak koit Korinto.

² Ki nyoorchi yooto Yahudyot age ne kiguure Aquila, chiito ne po Ponto, ne kita kobunu Italy kobooto osotyonnyi Prisila, amu kiga ng'at Klaudio kole koba Yahudik tugul eng' Rome. Ki nyo Paulo ole mi icheek;

³ amu ki kergei poisyennyi ak nenywa, kotebi anyun kobooto icheek, ak kobois tugul; amu ki nabiik che po emaisyek icheeget.

⁴ Ak eng' sabato age tugul ko ki ng'alaali eng' sinagogit, kole tamangap kotoret Yahudik ak Yunanik.

⁵ Ago ye kingo choorgei Sila ak Timoteo kobunu Makedonia, konyonji Paulo kachirchiret ne po ng'olyoot, kobaoryanjin Yahudik kole Jeso ko Kristo.

⁶ Ye kingo kirinda ak komwa icheek ng'aleek kochup ineendet, koleglekta ineendet ngoryennyi ak koleenji, “Ingotebi korotiikwok eng' metowekwok; aa tiliil anee. Kobooch nguno ko kawe ye mi Pororyosyek.”

⁷ Ki wo anyun eng' olooto ak kwo kootap chiito age ne kiguure Tito Justo, chiito ne ki ilasu Kamuktaindet, ne kinamegei koonnyi ak sinagogit.

⁸ Ak Krispo, ne ki pounindetap sinagogit, ko ki iyan Kiptaiyat kobooto koonnyi tugul; ak kingo kas che chaang' che po Korintoek, koyan, ak ki kibatisan.

⁹ Ak kemout age ko ki leenji `Kiptaiyat Paulo eng' ng'ang'utyet, “Meiywei, ago ng'alaal inyee amat isiis;

¹⁰ amu ami kobooten, ama mi chii ne twain koyaun ne ya, amu atinye piik che chaang' eng' nganasani.”

¹¹ Ki tebee olooto kenyiit agenge ak arawek lo, koneeti ng'olyootap Kamuktaindet eng' kwenunnywa.

¹² Ago ye kingo kirwoogindetap Akayo Galio, kong'eetyi `Yahudik Paulo eng' mageet agenge, ak komut ineendet kwo taitap ng'echereetap kirwooget.

¹³ Kole icheek, “Ichuuti chiichi piik kole kolas Kamuktaindet eng' ooreet ne etei Ng'atuutyet.”

¹⁴ Ago ye kimachei Paulo kotwek, koleenji `Galio Yahudik, “Okweek Yahudichu, nda po yaityo ng'aleechu iman, anan ko po chalwok ne ya, ta nyolu agaswok;

¹⁵ ago ngo teebutik agobo ng'aleek ak kainaik ak ng'atuutyeng'wong' okweeget, oyai okweegei; ma mache aek kirwoogindetap ng'aleechuuto.”

¹⁶ Ak ki oon icheek koba eng' ye mi ng'echereetap kirwooget.

¹⁷ Ak ki nam tugul Sosten, pounindetap sinagogit, ak kobir ineendet eng' taitap ng'echeranooto po kirwooget. Ak ki ma mage kiy Galio ng'aleechooto tugul.

Koweeksei Jerusalem ak Antiok

¹⁸ Ak kingo kagotebi Paulo peetuusyek che chaang', kobagaakta `ineendet tupchosyek ak kobun moinget kwo Syria, kobooto Prisila ak Aquila. Eng' Kenkrea ko ki kicherchi metit, amu kiga koarorta kiy eng' kayasyoet.

¹⁹ Kingo it Epheso, kobagaakta icheek eng' olooto, ago ki wo ineendet sinagogit ak kong'alaal ak Yahudik.

²⁰ Ak kingo mwachi kole, kota kotebi ak icheek, koma kocham;

²¹ ago kingo pagaktoi icheek, komwa kole, “Aweekyinoge kogeny, ngo cham Kamuktaindet.” Ak ki wo eng' Epheso kobune moinget.

²² Ye kingo kagolanda Caesarea, kotogosta kwo kogat kaniset, ak kochoortagei kwo Antiok.

²³ Ak kingo kagotebi olooto eng' peetuusyo, kwo kobunoot kooret ne po Galatia ak ne po Phrygia, ko uu ye rubegei, kogimitoti kasubik tugul.

Apolo eng' Epheso

²⁴ Ki nyo Epheso Yahudyot age ne keguure Apolo, ne po Alexandria. Ki chiito ne ng'oom, ak ki kiim eng' siruutik.

²⁵ Kiga kineet chiichito ooreetap Kiptaiyat; ak amu ki tinyei kagiiletapkei eng' muguleldanyi, kong'alaal ak koneet komyee ng'aleek agobo Jeso, kongen kabatisanetap Johana kityo.

²⁶ Ki toi kong'alaal eng' nyiganateet eng' sinagogit. Ago ye kingo kas Prisila ak Aquila, komut ineendet kwo taban, ak koboorchi ineendet ooreetap Kamuktaindet komyee kosiir.

²⁷ Ak ye ki machei Apolo kolanda kwo Akaia, ko ki igimit `tupchosyek ineendet ak kosirchi kasubik kole kotaach ineendet. Ye kingo kagoit, kotoret `ineendet icheek miising' che kiga koyan eng' myeeindo,

²⁸ amu ki iguiyechi Yahudik komyee eng' kimnateet eng' taitap piik, koboorchin eng' siruutik kole Jeso ko Kristo.