POISYONIGAP CHE KIYOKTOI 16 - BUKUIT NE TILIIL Sireet ne Dutero Kanon

Kotuitos Timoteo ak Paulo ak Sila

¹ Ki wo kora Paulo agoi Derbe ak Lystra. Ki mi olooto agenge eng' kasubik ne ki kiguure Timoteo, weeriitap chepyahudyot ne ki kayanindet; ago kwandanyi ko ki Yunanindet.

² Kibaoryanjin ineendet `tupchosyek che ki mi Lystra ak Ikonio kole myee.

³ Ki machei Paulo chiichito koba tuwai; ak ki imut ineendet ak komuratan amu Yahudik che ki mi komoswechooto, amu ki ingen tugul kole Yunanindet kwandanyi.

⁴ Ak ye kibendi pandanywa kobunoti nganasook kogoochi icheek ng'atuutik, che kiga ng'at che kiyooktoi ak poisyek che ki mi Jerusalem, si koriip.

⁵ Ki kigimit anyun kanisosyek eng' kayaneet, ak kotesak koiitennywa peetuut age tugul.

Kuurset kobun Makedonia

⁶ Ki pa anyun kobun kooret ne po Phrygia ak Galatia, ko kagoete icheek `Kabuuset ne Tiliil komwaita ng'olyoot eng' Asia.

⁷ Ye kingo toorchigei Mysia, kotyem koba Bithynia, ago ma chamji icheek `Kabuusetap Jeso;

⁸ ak kingo siir Mysia, kochoortagei Traos.

⁹ Ki nyoonji anyun ng'ang'utyet Paulo kemoi; ki mi chiitap Makedonia ne kitononi, kogoigoi ineendet koleen, “Long'u Makedonia, nyoo toretech.”

¹⁰ Ye kingo kagogeer ng'ang'utyet, eng' sainooto kemach keebe Makedonia, ko kagenai keele kogoguurech Kamuktaindet si kobiit keamji icheek logoiywek che myach.

Konyooru waleet Lydia

¹¹ Ki kibun anyun moinget kebunu Traos, kitoorchigei Samothrase, ak peetuut ne ki isubi nooto keit Neapoli.

¹² Ak keng'eetyo eng' olooto keebe Philippi, ne nganaseetap Makedonia, ne ki tagunoot eng' emonooto, ne ki uuchi Romanik. Ki kitebee nganasanooto eng' peetuusyo.

¹³ Ak eng' peetuutap sabato kemandae ormariichet keebe ole neegitee aineet, ole ki kileen ole kisaae; ak ki kitep ng'wony ak keng'alaalji kobogorisyek che kiga tuiyo.

¹⁴ Ki mi kobogoryot age ne ki kiguure Lydia, ne ki ilasu Kamuktaindet. Ki po nganaseet ne kiguure Thyatira, ak ki aldaindetap ngoroik che arusen ne piriir. Ye kigaseech, koyaat Kiptaiyat muguleldanyi koepchi iit ak kotaach tuguuk che ki mwaei Paulo.

¹⁵ Ye kiga kibatisan ineendet ak piigap koonnyi, kogaigaech kole, “Ngo kaogeer ole ayani Kiptaiyat, obwa koonnyu ak otebi.” Ak kibirchech keebe.

Paulo ak Sila eng' korgoreet

¹⁶ Peetuut age ye ki kibendi ole kisaae, kotuiyenech chepto ne ki tinyei tamirmiryet ne ng'oorsei ne ki ipchi kiptainikyik tuguuk che chaang' amu ng'oorset.

¹⁷ Ki isubot Paulo kebendi tugul, ak komwaei eng' kutit ne oo koleen, “Pichu ko otwogigap Kamuktaindet Ne Toroor Miising', che mwaiwok ooreetap yetunet.”

¹⁸ Ak ki yai ineendet ko uu nooto eng' peetuusyek che chaang'. Ago ki aragen Paulo miising', ak kowelelgei ak koleenji oindonooto murwon, “Kang'atiin eng' kainetap Jeso Kristo ale, mong'u eng' ineendet.” Ak ki mong' eng' sainooto.

¹⁹ Ago kingo keer kiptainikyik kole kagobet kamang'unetap keljinennywa, konam Paulo ak Sila, ak kochuut koba taitap pounik eng' ye kiyae mung'aaret.

²⁰ Kingo kagomut icheek kobwa taitap kirwoogik, komwa kole, “Inyaliili pichu nganasennyo miising', ago icheeget ko Yahudik,

²¹ ak ineeti pitonwek che ma chamdaat eng' ng'atuutik ketaach anan kisup, amu acheek ko ki Romanik.”

²² Ak ki ng'eet tuiyet kibagenge kobookyi icheek, ak kogereer kirwoogik ngoroigap pichooto ak kong'at kebir eng' kirokweek.

²³ Ak kingo kagobir icheek miising', kotoorchi korgoreet ak kong'at riibindetap korgoreet koriip komyee.

²⁴ Kingo kagonyoor ng'atuutyet ne uu nooto, kotoorchi icheek koot ne po oriit ak koratyi keelyekwak temeleiywek.

²⁵ Eng' olo po kemoi kween ko ki saaei Paulo ak Sila ak kotyenjin Kamuktaindet tyenwogik ak ki epchin iit tyenwagikwak kimonjororinik alak.

²⁶ Ak ki potan emet miising' eng' sainooto kot kotumdumgei lumeiywegap korgoreet; ak eng' sainooto koyatagis kurgotik tugul ak kotyagogis tuguuk che ki kirate chii tugul.

²⁷ Kingo siir eng' rwondo riibindetap korgoreet ak kogeer kurgotigap korgoreet ko yaatatin, kong'us rotwennyi po chok ak ki neegit kobargei, koleen kagochiliilyo kimonjororinik.

²⁸ Ago ki mwa Paulo eng' kutit ne oo kole, “Ameyachigei kiy ne ya, amu kimi yu acheek tugul.”

²⁹ Ak kiguur keip taisyek, ak kotorombenji ko oriit, ak ki ibutyi keelyegap Paulo ak Sila kobotananu eng' kaiyweisyet.

³⁰ Ak ki imut komong' saang' ak kole, “Kiptainichu, ayai nee si kesarwo?”

³¹ Koleenji, “Iyan Kiptaiyat Jeso, si kesaruun, inyee ak koong'ung'.”

³² Ak ki amdechi ineendet ng'olyootap Kiptaiyat, kobooto tugul che ki mi koonnyi.

³³ Ki imut icheek sainooto po kemoi ak kounji pirutikwak; ak ki kibatisan ineendet ak piikyik eng' sainooto.

³⁴ Ara ki imut koba koonnyi ak kogoochi amitwogik, ak kiboiboitu miising' ineendet kobooto koonnyi tugul amu kagoyan Kamuktaindet.

³⁵ Ak ye kingo kagoeech, koyookto kirwoogik kiptainigap kiplugotinik, kole, “Ounde pichoo koba.”

³⁶ Ak ki mwachi riibindetap korgoreet Paulo ng'aleechooto kole, “Kagoyok kirwoogik kole keundak obe; omong'u anyun ak obe eng' kaalyeet.”

³⁷ Ago ki leenji Paulo icheek, “Kagobirech eng' taitap piik, ama kirwookwech, acheek piik che ki Romanik, ak kogotoorchech korgoreet; ak nguno komachei koonech eng' ung'oot? Achicha, ma uu nooto; ago ingobwa icheeget komutech kemande.”

³⁸ Ki mwachi kiptainigap kiplugotinik ng'aleechuuto kirwoogik ak ki iywei kingo kas kole icheeget ko Romanik.

³⁹ Ki pwa anyun kogaigai icheek. Kingo kagomut icheek kobwa saang' kosoom kole koba eng' nganaseet.

⁴⁰ Ki manda anyun eng' korgoreet ak ki pa agoi kootap Lydia; ak kingo kagogeer tupchosyek kogaigai icheek ak koba.