POISYONIGAP CHE KIYOKTOI 15 - BUKUIT NE TILIIL Sireet ne Dutero Kanon

Kapkirwook eng' Jerusalem

¹ Ki choorgei anyun piik alak che ki punu Judea ak koneet tupchosyek kole, “Ngot koma kimuratanak ko uu piteetap Musa, ko momuuchi onyooru saruunet.”

² Ak ye kingo kagotiiyo Paulo ak Barnaba miising' ak koteebegei miising' kobooto icheek, kolewen `tupchosyek Paulo ak Barnaba ak alak eng' icheek kotogosta koba Jerusalem ole mi che kiyooktoi ak poisyek agobo ng'olyoondoniito.

³ Kingo kagoyomis anyun icheek kaniset eng' pandanywa, kobun Phoenisia ak Samaria, komwaitaati agobo che ki kowalogis koyan Kamuktaindet eng' Pororyosyek, ak ki igoochi ng'olyoondonooto tupchosyek tugul poiboiyet ne oo.

⁴ Kingo kagoit Jerusalem, kotaach icheek `kaniset ak che kiyooktoi ak poisyek, ak komwachi icheek tuguuk tugul che kiga koyai Kamuktaindet kobooto icheeget.

⁵ Ago kitononso alak eng' kasubiigap Pharisaik che iyanotin kole, “Kanyool kimuratan icheek, ak keng'at icheek koriip Ng'atuutyetap Musa.”

⁶ Ki iyumgei che kiyooktoi ak poisyek si kobiit kogeer ole teptoi ng'olyoondoniito.

⁷ Ak kingo kagoteebegei miising', kotonon Petero ak komwachi icheek kole, “Che kitupche, ongen okweek ole ki kolewen Kamuktaindet eng' kwenung'wong' kobooch ye po ui kole kogas Pororyosyek ng'olyoot ne po logoiywek che myach eng' kutinnyu ak koyan.

⁸ Ak kibaoryanji icheek `Kamuktaindet ne ingen mugulelwegap piik, kogoochi icheek `Kabuuset ne Tiliil, ko uu ye ki koonech;

⁹ ak ki ma ibesyech ak icheeget, ye ki itiliili mugulelwekwak eng' kayaneet.

¹⁰ Kalya nguno anyun si otyem Kamuktaindet kot onde chogit kaatitap kasubik, ne ki ma imuuch koip kwanisyekyok anan acheek?

¹¹ Ago kiyani keele kisarwech eng' myeeindap Kiptaiyat Jeso, ko uu ye kisaru ak icheek.”

¹² Kosiisyo anyun tuiyet komugul; ak koepchi iit Barnaba ak Paulo kotetyin icheek kaboorunoik ak kwang'utik che kiga koyai Kamuktaindet eng' icheek eng' kwenutap Pororyosyek.

¹³ Ak kingo kagosiisyo, kowol Jakobo kole, “Che kitupche, ogaso.

¹⁴ Kagomwa Simion ko uu ye ki rutoochi `Kamuktaindet Pororyosyek eng' tai, si kobiit kolewenji kainennyi piik eng' icheek.

¹⁵ Kanamgei niito ak ng'aleegap maotik, ko uu ye siraat kole,

¹⁶ ‘Ye ibata tuguuchu aweege, ak ateech kogeny kootap Daudi ne ki koluul; ak ateech kogeny komoswek che ki koluulyo, ak alum kotonon,

¹⁷ si kocheeng' piik che ng'etunotiin Kiptaiyat, ak Pororyosyek tugul che kiguurtoe kainennyu.

¹⁸ Mwaei Kiptaiyat, ne yaei tuguuchu si konaak kobooch taunetap ng'wony.’

¹⁹ “Nooto anyun, atile kirwooget ko uu ni ale, amata kinyalil `acheek icheek che po Pororyosyek che pwaanjin Kamuktaindet;

²⁰ ago ongesirchi icheek keleenji kotabaanegei murwoonindap kanamonik, ak sokseet, ak ne po tuguuk che kagiget, ak korotiik.

²¹ Amu ki tinyei Musa kobooch ibinwek che po keny eng' nganasook tugul, icheeget che amdoi agobo ineendet, che kisomani eng' sinagogisyek eng' sabato age tugul.”

Parweetap kapkirwook agobo pororyosyek

²² Kogeer anyun che kiyooktoi ak poisyek, kobooto kaniset komugul kole myee kolewen piik alak eng' icheek, ak koyookto koba Antiok kobooto Paulo ak Barnaba. Ki iyookto Judas ne ki kiguure Barsaba, ak Sila, piik che eecheen eng' tupchosyek,

²³ kobooto parweet: “Kisirchini `acheek che kiyooktoi ak tupchosyek che poisyek, tupchosyek che po Pororyosyek che mi Antiok ak Syria ak Cilicia, kigatok.

²⁴ Ko uu ye ko kegas keele, inyalilok eng' ng'aleek piik alak che kibunei kwenunnyo, kong'emei saboonwekwok; piik che ki ma king'at ko uu nooto;

²⁵ kagigeer keele myee eng' acheek, che kagechamyechi, kelewen piik ak kiyakwok kobooto chamanikyok Barnaba ak Paulo,

²⁶ piik che ki kogoito saboonwekwak amu kainetap Kiptaiyandennyo Jeso Kristo.

²⁷ Kagiyogu anyun Judah ak Sila, si komwaiwok icheeget ak icheek tuguuchuuto eng' kutusweekwak.

²⁸ Amu kigeere keele kagomyeeit eng' Kabuuset ne Tiliil ak eng' acheek, keele, ma kigesenjok mileet ne nyigiis ne siire tuguuchu nyolu:

²⁹ keele otabaanegei tuguuk che kieng'jin kanamonik, ak korotiik, ak panyeegap che kagiget, ak sokseet; ngo tabaanegei chooto, komyeeitu eng' okweek. Saisere.”

³⁰ Ye kingo kagiyookto koba anyun, kochoortagei koba Antiok; ak kingo kagoyum tuiyet, kogoochi parweet.

³¹ Kingo kagosoman koboiboitu agobo kagaigaet.

³² Ki igiil `Judah ak `Sila tupchosyek eng' ng'aleek che chaang', ak kogimit amu ki maotik ak icheek.

³³ Ak kingo kagotebee olooto peetuusyek alak, kounda tupchosyek icheek eng' kaalyeet koba ole mi icheek che ki iyoogu.

³⁴ Ago ki cham Sila kota kotebee olooto.

³⁵ Ago ki tebee Paulo ak Barnaba Antiok, koneeti ak koamdoi ng'olyootap Kiptaiyat, kobooto piik alak che chaang' ak icheek.

Kobestos Paulo ak Barnaba

³⁶ Kingo pata peetuusyek alak koleenji `Paulo Barnaba, “Ingeweege nguno kerutoochi tupchosyek eng' nganaseet age tugul ole kigeamdaate ng'olyootap Kiptaiyat, ak kegeer ole teptoi.”

³⁷ Ki machei Barnaba miising' komut Johana ne ki kiguure Mariko, koba tugul.

³⁸ Ago ki ibwaat Paulo kole ma myee kimut ineendet ne kiga kobagaakta icheek eng' Pamphylia, ama cham koba poisyet kobooto icheek.

³⁹ Ak king'eetyo ng'aleek che koroomen kot kopcheigei icheegei. Ki imut `Barnaba Mariko ak kobun moinget agoi Cyprus.

⁴⁰ Ago ki lewen `Paulo Sila ak koba, ko kagonde tupchosyek icheek myeeindap Kiptaiyat.

⁴¹ Ak kobun Syria ak Cilicia, kogimitoti kanisosyek.