POISYONIGAP CHE KIYOKTOI 14 - BUKUIT NE TILIIL Sireet ne Dutero Kanon

Paulo ak Barnaba eng' Ikonio

¹ Ye kingo mi Paulo ak Barnaba Ikonio, ko ki pa sinagogitap Yahudik ak kong'alaal kot koyan tuiyet ne oo ne po Yahudik ak Yunanik.

² Ago kiim Yahudik che kibistoik saboonwegap Pororyosyek kot kogoochi kowech tupchosyek.

³ Ki tebee olooto anyun peetuusyek che chaang' ak kong'alaali eng' nyiganateet agobo Kiptaiyat, ne kibaoryanji ng'olyootap myeeindonyi ak kogoochin koyaak kaboorunoik ak kwang'utik eng' eunekwak.

⁴ Ago kipcheigei tuiyet ne po nganaseet; ak ki namgei alage ak Yahudik, konamgei alage ak che kiyooktoi.

⁵ Ak ye kimachei Pororyosyek ak Yahudik kobooto pounikwak kobookyi icheek, kole koyachi ne ya, ak kolach eng' koik,

⁶ kosip konai, ak kimwechi Lystra ak Derbe, nganasook che po Lukaonia, ak korotinwek che neegitee olooto,

⁷ ak ki amda logoiywek che myach eng' olooto.

Paulo ak Barnaba eng' Lystra

⁸ Ki mi chii age eng' Lystra ne ki ma ko kiimeen keelyekyik ak ki tomo kowendot, amu ki salamwo kobooch komi moetap kamet.

⁹ Ki kas chiichooto Paulo kong'alaali. Ak kingo ochiilji kong' `Paulo chiichooto, ak kogeer kole tinyei kayaneet ne kimuuchi kisoop,

¹⁰ komwa eng' kutit ne oo kole, “Tonon komyee eng' keelyeguk.” Ak kitoromben ak kowendot.

¹¹ Ak kingo keer tuiyosyek kiit ne kayai Paulo, kobolyo eng' ng'aleegap Lukaonia, kole, “Kachorchechkei kamuktaik eng' kergeindap piik.”

¹² Ak kiguure Barnaba, Seu; koguure Paulo, Herme, amu ki ng'alaalindet ne oo ineendet.

¹³ Ak tisiindetap Seu ne ki mi hekalunnyi taitap nganaseet ko kiget tuuga ak sinendoik kobwa kurgotik, ak kimachei ineendet kobooto tuiyosyek kogoito tiseiywot.

¹⁴ Ago ye kingo kas agobo nooto che kiyooktoi Barnaba ak Paulo kogereer ngoroikwak ak korwai koba kwenutap tuiyet, koboldos koleen,

¹⁵ “Choronochu, kalya si oyai tuguuchu? Ki piik agacheek che kergei ak okweek, ak kagiibwok logoiywek che myach, si kobiit oweeige omete tuguuchu ma tilei kiy ak obwonji Kamuktaindet ne sabei, ne kiyaei kipsengwet ak ng'wony ak araraita ak tugul che mi olooto.

¹⁶ Ki pagaakyi `ineendet pororyosyek tugul eng' ibinwek che ki kosiirto kobendat eng' ortinwekwak.

¹⁷ Ago ki ma tebi puch ineendet ama tinyei paorya, amu ki yai ne myee, ak kogoonok ropta ne punu kipsengwet ak peetuusyegap rurateet, kogoochin kobiyong'so mugulelwekwok eng' amitwogik ak kaagaasetapkei.”

¹⁸ Agot eng' ng'aleechu ki mwa, ko ki neegit kotemenee kogirinda icheeget si mata kogoochi icheek tiseiywot.

¹⁹ Ago ki pwa Yahudik che ki punu Antiok ak Ikonia ak kolom tuiyosyek. Kilach `icheek Paulo eng' koik, ak kochuut komanda eng' nganaseet, koleen kagome.

²⁰ Ago ye kitonondos kasubik ko kayiem ineendet, kong'eet ak kwo nganaseet. Eng' peetuut ne ki isubi nooto koba Derbe ak Barnaba.

Paulo ak Barnaba eng' Derbe

²¹ Ye kingo kagoamji logoiywek che myach nganasanooto, ak ko kagoyai che chaang' koek kasubik, koweektagei koba Lystra, ak Ikonia, agoi Antiok.

²² Ki igimitoti saboonwegap kasubik, ko ki ili koba tai eng' kayaneet ak koleenji, “Kanyool keit laitornatetap Kamuktaindet eng' nyalilwogik che chaang'.”

²³ Ak kingo kagolewenji icheek `poisyek eng' kaniset age tugul, kosa eng' karugutetapkei, konde icheek eutap Kiptaiyat ne kiga koyan.

²⁴ Ki pa kobun Pisidia ak koit Pamphylia.

²⁵ Kingo kagoamda ng'olyoot eng' Perga, kochoortagei Attalia.

²⁶ Kotaune olooto ko ki pun moinget agoi Antiok, ole ki kindae icheek myeeindap Kamuktaindet agobo poisyet ne kiga koyai kosulda.

²⁷ Kingo kagobwa, koyum kaniset komugul ak komwachi tuguuk tugul che kiga koyai Kamuktaindet eng' icheek, ak ole kiga koyatyindo Pororyosyek kurgeet ne po kayaneet.

²⁸ Ak ki tebi peetuusyek che chaang' olooto kobooto kasubik.