POISYONIGAP CHE KIYOKTOI 12 - BUKUIT NE TILIIL Sireet ne Dutero Kanon

Kebarei Jakobo

¹ Ye ki neegit peetuusyechooto kotoi laitoryat Herod kous alak che po kaniset.

² Ki par Jakobo ng'eetap kametap Johana eng' rotwetap chok.

³ Ak ye kingo keer kole ki ibaibai nooto Yahudik, kotoi konam Petero agine. Ak kibetusyegap magatyat ne ma kinde mermereek, peetuusyechooto.

⁴ Kingo kagonam ineendet, konde korgoreet, ak kogoochi kiplugotinik ang'wan konyil ang'wan koriip ineendet, koleen ye ibata Paska komutyi piik.

⁵ Ye ki kiriipe Petero anyun eng' korgoreet, ko ki saaei kaniset Kamuktaindet miising' agobo ineendet.

Komandoi Petero eng' korgoreet

⁶ Eng' kemounooto ki machei `Herod komoong' ineendet, ko ki rue `Petero kwenutap asigarik aeng', koratatee nyororosyek aeng'. Ak ki riip korgoreet riibiik eng' taitap kurgeet.

⁷ Ak ogeero, ki tonon malaikaiyatap Kiptaiyat eng' ye neegitee ineendet ak ki ikweny lapkeiyet koot. Ki irabaach karaastap Petero ak kong'eet koleenji, “Ng'eet chokyi.” Ak ki ibutyo nyororosyek che ki mi eunekyik.

⁸ Ak koleenji malaikaiyat ineendet, “Ratkei, indegei kweoniguk ak irat.” Ak ki yai ko uu nooto. Ak ki leenji, “Ilaach ngoryeeng'ung' ak isubwo.”

⁹ Ak ki wo Petero saang' ak koosup ineendet; ak ki ma nai kole iman kiit ne kayai malaikaiyat, ago kileen kageer ng'ang'utyet.

¹⁰ Kingo kagosiir riipseet ne po tai ak ne po aeng', kobwa agoi ormariichet ne po karnet ne kibunei kebendi nganaseet, koyaatak ineegei. Ak kimanda saang' ak koba kobun ooreet agenge; ak eng' sainooto kobagaakta ineendet `malaikaiyat kwo.

¹¹ Ye kingo pwaat Petero, komwa kole, “Kaanai nguno iman, ale, kagoyok `Kiptaiyat malaikaiyandennyi ak kasarwo eng' eutap Herod, ak eng' kagenisyet tugul ne po piigap Yahudik.”

¹² Ara ye kingo kagobwaat komyee, konyo kootap Maria kametap Johana ne kiguure kainennyi ne po aeng' Mariko, ole kiga koyumjigei che chaang' ak kosaaei.

¹³ Ak ye kingo kongony kurgeetap ormariichet, konyo chepto ne ki kiguure Roda kogas.

¹⁴ Ak kingo nai chebooto kutitap Petero, koma koyaat ormariichet amu poiboiyet ago kilabat ko, ak komwaita kole tononi Petero eng' ormariichet.

¹⁵ Ki leenji `icheek ineendet, “Amin iywek!” Ago ki mwa eng' kimnateet kole, uu nooto. Ak ki mwa icheek kole, “Malaikaiyandennyi.”

¹⁶ Ago kites Petero kogongony; ak kingo kagoyat, kogeer ineendet ak kokwong'yo.

¹⁷ Ago ki iboorchine `ineendet icheek euut kosiisyo, ak kotetyi ole kagomutunda `Kiptaiyat ineendet komong' eng' korgoreet. Ak ki mwa kole, “Omwachi ng'aleechu Jakobo ak tupchosyek.” Ak ki wo agoi komosta age.

¹⁸ Ak kingo kagoeech, kotoptobenso kiplugotinik miising', kole katepto ano Petero.

¹⁹ Ye kingo kagocheeng' `Herod ineendet, ama konyoor, kogin riibiik ak kong'at kole kanyool kebar. Ak kichoortagei eng' Judea kwo Caesarea ak kotebee olooto.

Meetap Herod

²⁰ Ki nereekyi miising' `Herod piigap Tyro ak Sidon. Ara ki pwanji `icheek ineendet eng' kabwaatet agenge, ak kingo nam chorwandi ak Blasto ne ki riibei ole kirue laitoryat, kosoom kaalyeet amu kibaei `emetap laitoryat emennywa.

²¹ Ak eng' peetuut ne ki king'at, kolaach Herod ngoroigap laitornatet, ak kotebee ng'echereetap kirwooget, ak kong'alaalji pichooto.

²² Ak ki polyo piik kole, “Kutitap kamuktain niito, ma po chii.”

²³ Eng' sainooto anyun kobir ineendet `malaikaiyatap Kiptaiyat, amu ma konyit Kamuktaindet. Ara ki am ineendet kuutik ak kime.

²⁴ Ago ki testai ng'olyootap Kamuktaindet, ak koityi che chaang'.

²⁵ Ye kingo kagogees poisyennywa Barnaba ak Saulo, koweektagei Jerusalem, komuti Johana ne ki kainennyi ne po aeng' ko Mariko.