POISYONIGAP CHE KIYOKTOI 11 - BUKUIT NE TILIIL Sireet ne Dutero Kanon

Amdaetap Petero

¹ Ki kas anyun che kiyooktoi ak tupchosyek che ki mi Judea kole kogotaach ak icheek Pororyosyek ng'olyootap Kamuktaindet.

² Kingo kagonyo `Petero Jerusalem, kobelgei ak ineendet icheek che po kamuratanet,

³ koleen, “Ki iwe ye mi piik che ma kimuratan ak iamisye kobooto icheek.”

⁴ Ago ki toi Petero kotetyi icheek komyee ng'aleechooto, koleenji,

⁵ “Ki ami nganaseetap Joppa asaae, ak kingo putya kiy ne uu rwon ageer ng'ang'utyet. Ki mi kiy ne kichoorugei ne uu angeet ne oo kot kobunu kipsengwet, ki kichoor eng' kuinoik ang'wan; ak ki nyo agoi ole ami.

⁶ Ye kinga keer miising' ko ki ageer tyong'igap ng'wony che po keelyek ang'wan ak tyong'ik che po timiin ak tuguuk che ichuutegei ak toriitik che po parak.

⁷ Ago ki agas kutit koleenjo, ‘Ng'eet, Petero; eeny ak iam.’

⁸ Ak ki amwa ale, ‘Ma uu nooto, Kiptaiyat; amu tomo kochut kutinnyu kiy ne ma tiliil anan ne ng'waan.’

⁹ Ago ki wol kutinooto ne po aeng' kobunu kipsengwet kole, ‘Amata ing'wanit kiit ne kagotiliil Kamuktaindet.’

¹⁰ Ki yaak kioto konyil somok, ak ki kichuut kogeny tugul koba kipsengwet.

¹¹ Ak eng' sainooto ko kitonondos piik somogu eng' taitap koot ole ki kimi, che ki kiyok eng' Caesarea kobwa ole ami.

¹² Kong'ata anyun Kabuuset ne Tiliil kole keebe tugul, amat isage. Ak ki kibe tugul ak tupchosyechu lo ak icheek; keebe agoi kootap chiichooto.

¹³ Kimwaiwech ko uu ye kiga keer malaikaiyat kotononi eng' koonnyi, kole, ‘Iyookte piik koba Joppa koguur Simion, ne kiguure kainennyi ne po aeng' Petero;

¹⁴ konyo komwaun ng'aleek che kisaruunenen, inyee ak koong'ung' tugul.’

¹⁵ Ak ye kinga tau ang'alaal, kochoorchigei `Kabuuset ne Tiliil icheek ko uu ye kichorchechkei agacheek eng' taunet.

¹⁶ Abwaat anyun ng'olyootap Kiptaiyat, ko uu ye ki mwa kole, ‘Ki ibatisanis Johana eng' peek; ago kibatisanook okweek eng' Kabuuset ne Tiliil.’

¹⁷ Ngo ki igoochi anyun Kamuktaindet icheek konunet ne kergei ak ne ki koonech ye kingi yan Kiptaiyat Jeso Kristo, ko tos ki aa ng'oo anyun kot amuuch agirinda Kamuktaindet?”

¹⁸ Kingo kas ng'aleechuuto, kosiisyo. Ak ki iloos Kamuktaindet, koleen, “Kaagaa kagogoochi `Kamuktaindet Pororyosyek ak icheek siguunet ne ibu saboondo.”

Kayanigap Kristo eng' Antiok

¹⁹ Ki pa anyun icheek che kiga yesta amu usiisyet ne king'eet agobo Stepano agoi koit Phoenisia, Cyprus, ak Antiok, koma ng'alaaljin chii age ng'olyoot kobatee Yahudik.

²⁰ Ago ki mi alak eng' icheek, piigap Cyprus ak Kurene, che kingo pwa Antiok kong'alaalji Yunanik ak icheek, koamdoi Kiptaiyat Jeso.

²¹ Ki mi eutap Kiptaiyat kobooto icheek, ak ki iyan piik che chaang' konam ng'aleegap Kiptaiyat.

²² Ki kas ng'aleek agobo icheek kaniset ne ki mi Jerusalem, ak ki iyookto Barnaba kwo kot koit Antiok.

²³ Kingo it ineendet ak kogeer myeeindap Kamuktaindet, kobaibait, ak kogiil icheek tugul konamgei ak Kiptaiyat eng' mugulelwek che pekyinotin.

²⁴ Barnaba ko ki chii ne myee ak ki nyiitaat Kabuuset ne Tiliil ak kayaneet. Ki tesak anyun piik ko chang'a che ki pwanji Kiptaiyat.

²⁵ Ki wo agoi Tarsis kocheeng' Saulo,

²⁶ ak kingo kagonyoor, komut konyo Antiok. Ara ki iyumgei eng' kenyiit agenge kobooto kaniset, ak koneet piik che chaang'. Ki kitoi keguure kasubik Kristyanik eng' Antiok.

²⁷ Ki choorgei anyun maotik eng' peetuusyechooto eng' Jerusalem kobwa Antiok.

²⁸ Ak ki tonon age eng' icheek ne ki kiguure Agabo ak koboor eng' Kabuuset ne Tiliil kole tuun ityin rubeet ne oo ng'wony komugul; ak ki isulda niito eng' peetuusyegap Klaudio.

²⁹ Kichopkei komyee kasubik koyookyi toreteet tupchosyek che ki menyei Judea, chii tugul ko uu ye ki imuuchi.

³⁰ Ki yai anyun ko uu nooto, ki iyookyi poisyek eng' eunegap Barnaba ak Saulo.