POISYONIGAP CHE KIYOKTOI 10 - BUKUIT NE TILIIL Sireet ne Dutero Kanon

Petero ak Korneli

¹ Ki mi chiito age Caesarea ne ki kiguure Korneli, ki kiptaiyatap kiplugotinik pogol chooto ki kiguure asigarigap Italy.

² Ki chiito ne kigonyiti ak koywei Kamuktaindet kobooto koonnyi tugul; ki igoochin piik kagoochinoik che chaang' ak kosaaei Kamuktaindet kotugul.

³ Eng' koskoleng'ut age olo po sait sogool ne po peet ko ki keer eng' ng'ang'utyet kimni, ne eng' ng'ang'utyonooto ko ki keer malaikaiyatap Kamuktaindet konyonjin ineendet ak koleenji, “Korneli.”

⁴ Keer `Korneli ineendet miising' eng' kaiyweisyet ak kole, “Tos nee, Kiptaiyat?” Koleenji, “Kigoit parak saautiguk ak kagoochinoiguk koek kabwaatet eng' taitap Kamuktaindet.

⁵ Iyookte nguno anyun piik koba Joppa, koguur chii ne kiguure Simion ne kainennyi ne po aeng' ko Petero;

⁶ ineendet ko toondetap Simion ne teiteindetap muiywek, ne mi koonnyi ngeguutap araraita.”

⁷ Ye kingo kakwa malaikaiyat ne ki ng'alaalji ineendet, koguur otwogik aeng' che po koonnyi, ak asigarindet ne kigonyiti Kamuktaindet ne ki age eng' che kiboisyechin ineendet kotugul;

⁸ ak kingo kagomwachi icheek ng'aleek tugul, koyookto koba Joppa.

⁹ Eng' peetuut ne ki isubi ye kita kobendi, ko kariikta nganaseet, kotogosta Petero koot parak, eng' olo po sait lo, kwo kosa.

¹⁰ Ak ki am rubeet ak kimach koamis; ak ye ki kichobei amitwogik, kobutyi kiy ne uu rwon.

¹¹ Ki keer kipsengwet koyaatak, ak kochoorugei kiit ne uu angeet ne oo kot, kechooru eng' kuinoik ang'wan agoi ng'wony.

¹² Ki mi oriit tyong'ik alak tugul che po keelyek ang'wan ak tuguuk che ichuutegei che po ng'wony ak toriitik che po parak.

¹³ Ki nyoonji anyun tweguunet koleenji, “Ng'eet, Petero; eeny ak iam.”

¹⁴ Ago ki le Petero, “Ma uu nooto, Kiptaiyat; amu tomo aam kiy ne ma tiliil anan ne ng'waan kobooch atkinye kora.”

¹⁵ Ki nyoonji anyun tweguunet kogeny ne po aeng' koleenji, “Kiit ne kagotiliil Kamuktaindet, ko mata ile ng'waan.”

¹⁶ Ki yaak kiito konyil somok, ak eng' yooto ketaach kioto eng' kipsengwet.

¹⁷ Ak ye kita koiimegei Petero miising' eng' muguleldanyi kole ibooru nee ng'ang'utyoni kagogeer, ogeero, kotononso eng' kurgat piik che kiga koyook Korneli, ko kagoteep ole mi kootap Simion,

¹⁸ ak koguurso ak koteep ngo mi Simion olooto, ne kainennyi ne po aeng' ko Petero.

¹⁹ Ye kita kobwaati Petero agobo ng'ang'utyonooto, koleenji `Kabuuset ne Tiliil ineendet, “Keero, cheeng'in piik somogu.

²⁰ Ng'eet anyun nguno, ak ichoortegei, ak obe tugul, amesage kiy; amu kaayogu icheek.”

²¹ Ara kichoortagei anyun Petero kwo ole mi pichooto ak kole, “Aa ineendet ne ocheeng'e. Nee ne kagoonok obwa?”

²² Ak ki le, “Ki iboorchi komyee Kamuktaindet Korneli, eng' malaikaiyat ne tiliil, koyook piik kobwa koguurin iwe koonnyi ne ineendet ko kiptaiyatap pogol, chiito ne po imanda ak koywei Kamuktaindet, ak paoryanjin pororyet tugul ne po Yahudik kole myee ineendet, kole si kogasenen ng'aleek.”

²³ Koguur anyun kobwa ko ak kochopchi icheek ole ruitos. Ak king'eet karon koba kobooto pichooto ak tupchosyek alak che ki punu Joppa.

²⁴ Ak peetuut ne ki isubi peetuunooto koit Caesarea. Ki igeni icheek `Korneli, ko kagoguur tupchosyekyik ak choronokyik che ki ingengei komyee.

²⁵ Ye kingwo ko Petero, kotorooch `Korneli ineendet ak kobutyi keelyekyik, kogutung'ji.

²⁶ Ago ki ing'eet `Petero ineendet koleenji, “Tonon; aneendet ko aa chiito agane.”

²⁷ Ak kingo ta kong'alaaljindos tuwai, kwo ko ak konyoor piik che chaang' che kagoyumgei:

²⁸ koleenji anyun icheek, “Ongen okweek ole kiy ne eesyoot eng' ng'atuutik eng' chii ne Yahudyo konamgei ak chii ne po poror age anan konyo ole mi; ago kagoboorwo anee Kamuktaindet kole si mata aguure chii age ne ma tiliil anan ne ng'waan.

²⁹ Amu nooto anyun, ye kingo kageguura ko kaanyo amata asich kiy ne amwae. Nooto anyun ateebee ale nee ne koguurcho.”

³⁰ Kole anyun Korneli, “Peetuusyek ang'wan rani kobooch yooto agoi saini, ye ki asaae eng' sait sogool eng' koonnyu; ak keero, ki tonon eng' tainnyu mureno ne ilaachi ngoroik che liilei piich,

³¹ ak kole, ‘Korneli, kigegas saaeng'ung', ak ki koek kabwaatet eng' taitap Kamuktaindet kagoochinoiguk.

³² Iyookte anyun piik koba Joppa si koguurun Simion ne kainet ne po aeng' ko Petero; miitei ineendet ko toondet eng' kootap Simion teiteindetap muiywek, ye neegitee ngeguutap araraita.’

³³ Ki ayoogu anyun piik eng' sainooto kobwa ole imi; ak kaiyai ne myee amu kainyo. Ki mi anyun yu nguno acheek tugul eng' taitap Kamuktaindet, si kegas tuguuk tugul che king'atin Kiptaiyat.”

Koityin Pororyosyek alak Logoywek che Myach

³⁴ Ki ng'aany anyun Petero kutinnyi, kole, “Iman ageere ale ma chamei `Kamuktaindet piik alak kosiir alak:

³⁵ ago taachaksei eng' ineendet chiito ne iywei ineendet ak koyaei iman eng' pororyet age tugul.

³⁶ Ng'olyoot ne ki iyookyi ineendet piigap Israel, ko koamda ng'aleek che myach che po kaalyeet eng' Jeso Kristo, ineendet ko Kiptaiyat ne po tugul.

³⁷ Ongen okweek ng'olyoondonooto, ne ki kiamda eng' Judea komugul ketaune Galilaya, kingo pata kabatisanet ne ki amdoi Johana;

³⁸ ongen ole ki iil `Kamuktaindet Jeso ne po Nazareth eng' Kabuuset ne Tiliil ak eng' kamuktaet; kiwendot ineendet ak koyaei ne myee, ak kosoobi tugul che ki inyaliili chesawilyet, amu ki mi Kamuktaindet kobooto ineendet.

³⁹ Ki paorinik acheek che po tuguuk tugul che ki yai eng' emetap Yahudik ak eng' Jerusalem. Ki par `icheek ineendet kogartaat eng' keetit;

⁴⁰ ago ki ing'eet `Kamuktaindet ineendet eng' peetuutap somok ak kogoito kotook,

⁴¹ ma eng' piik tugul ago eng' paorinik che kiga sip kolewen Kamuktaindet, acheeget chooto che ki kiamisyei ak keeisei kobooto ineendet ko kagong'eet komong' eng' che ki pek.

⁴² King'atech keamji piik ak kebaoryan keele niito ko ineendet ne ki inde Kamuktaindet koek Kirwoogindet ne po che saptos ak che ki kobek.

⁴³ Paoryani maotik tugul agobo ineendet kole nyooru nyoetap kaat amu tengekwogikyik eng' kainennyi age tugul ne iyani ineendet.”

Kotaachei Pororyosyek alak Kabuuset ne Tiliil

⁴⁴ Ye kita komwaei Petero ng'aleechu, kochoorchigei Kabuuset ne Tiliil tugul che kigasei ng'olyoot.

⁴⁵ Icheek che po kamuratanet che ki iyani che kibwanei kobooto Petero ko ki kwong'yo amu kageroong'ji Pororyosyek ak icheek konunetap Kabuuset ne Tiliil;

⁴⁶ amu kigasei icheek kong'alaali eng' kutusweek che teerchiin ak kotoroori Kamuktaindet. Koteep anyun Petero kole,

⁴⁷ “Imuuchi chii koete peek, si ma kibatisan pichu, che kagotaach Kabuuset ne Tiliil ko uu acheek?”

⁴⁸ Ki ng'at anyun kole kibatisan icheek eng' kainetap Jeso Kristo. Kosoom anyun `icheek ineendet kole kota kobeni peetuusyek alak.