POISYONIGAP CHE KIYOKTOI 1 - BUKUIT NE TILIIL Sireet ne Dutero Kanon

Ng'aleek che po tai

¹ Eng' kitabuut ne po tai, ee Theophilus, ko ki atet agobo tuguuk tugul che ki toi Jeso koyai ak koneet.

² Ki atet anyun chooto tugul agoi peetuut ne ki kimuti kwo parak, ye kingo kagong'at `inee eng' Kabuuset ne Tiliil che kiyooktoi, chooto kiga kolewen.

³ Ye kingo pata nyalildanyi, koboorchigei icheeget kole sabei eng' kaboorunoik che chaang', kong'aang'jingei `inee icheek eng' peetuusyek artam, ak kong'alaaljin icheek agobo tuguuk che po laitornatetap Kamuktaindet.

⁴ Ak ye ki amisye tugul, kong'at icheek koleenji, “Amat obe eng' Jerusalem, ago ogen kayomiset ne po Kwanda, nooto ki ogasena.

⁵ Ki ibatisanis Johana iman eng' peek; ago kotom kogeskei peetuusyek che chaang' kibatisanook eng' Kabuuset ne Tiliil.”

Kotogostoi Jeso

⁶ Nooto anyun, ye kingo kagoyumgei, koteebe ineendet koleenji, “Kiptaiyat, iweekyini Israel laitornatet eng' peetuusyechuuto?”

⁷ Koleenji `Jeso icheek, “Mabootok onai peetuusyek anan kenyiisyek che ki konde Kwanda eng' pounatennyi ineegei.

⁸ Ago otaache kamuktaet ye tuun kanyonjok Kabuuset ne Tiliil; ak oegu paorinikyuk eng' Jerusalem, eng' Judea komugul ak Samaria, ak agoi tabandap ng'wony.”

⁹ Ye kingo kagomwa tuguuchuuto, kimut ineendet kwo parak kogeerei icheek, ak kitaach pooldet ineendet ak kobetito eng' tainnywa.

¹⁰ Ye kingo ta konyali kipsengwet kochiiljin kong' kowendi, ogeero, kitononso piik aeng'u eng' ye neegitee icheeget kolaachi ngoroik che leelachen,

¹¹ ak ki mwa kole, “Okweek piigap Galilaya, kalya si otononse ak onyali kipsengwet? Jeso niito, ne kagimut kwo kipsengwet, ko tuun nyoonei ko uu yu kogeere kowendi kipsengwet.”

Keleweni kayooktoindet age

¹² Koweek anyun koba Jerusalem kobunu tulweet ne kiguure tulweetap Mseituni, ne neegitee Jerusalem, ne yamegei ak pandap peetuutap sabato.

¹³ Ye kingo kagoba ko, kolaany koot ne po parak, ole ki tebee agot Petero, Johana, Jakobo ak Andrea, Philipu ak Thomas, Bartolomayo ak Matayo; Jakobo ne po kap Alphayo ak Simion Selote, ak Judas ne po kap Jakobo.

¹⁴ Ki tebi chu tugul eng' kabwaatet agenge eng' kagiiletapkei ne po saaet, kobooto kobogorisyek ak Maria kametap Jeso, ak tupchosyegap Jeso.

¹⁵ Eng' peetuusyechooto ko ki tonon Petero eng' kwenutap che tupcho (piik che kigatuiyo, ki olo po pogol agenge ak tiptem), ak kole,

¹⁶ “Che kitupche, konyolu kosulda siruutik che ki kamwa Kabuuset ne Tiliil eng' tai eng' kutitap Daudi agobo Judas, ne ki kandoindet ne ki indochin icheek che kinamei Jeso.

¹⁷ Amu ki kiititech, ak kinyoor kebebertanyi eng' poisyoni.”

¹⁸ (Ak kinyoor chiichi mbareet eng' melektap tengektanyi; ak kingo put kosyep moo, kobetak moet, komong' agutanikyik tugul.

¹⁹ Kinaak ng'olyoondonooto eng' tugul che menyei Jerusalem, kot keguure mbaranooto Akeldama eng' kutinnywa, nooto ko, Mbareet ne po korotiik.)

²⁰ “Amu siraat eng' kitabuut ne po Tyenwogigap Kalasunet kole, ‘Ingoguber ole menyei, amat komeny chii olooto’; ak ‘Ingonam chiito age poisyennyi.’

²¹ Ingobiit age eng' piik che ki cham kebendoti tugul eng' peetuusyek tugul ye ki cham komong'u Kiptaiyat Jeso ak komandoi eng' kwenunnyo,

²² kotaune kabatisanetap Johana agoi peetuut ne ki kimuti kwo parak. Kanyool koek age eng' pichuuto paoryat kobootech agobo ng'eetyeennyi.”

²³ Ara ki lewen piik aeng', Joseph ne ki kiguure Barsaba, (ak ki kiguure kora Justo) ak Matia.

²⁴ Ak ki sa kole, “Ee Kiptaiyat, inyee ne ingen mugulelwegap piik tugul, iboorwech eng' pichu aeng', ne kailewen,

²⁵ si kobiit konam kebeberta eng' poisyoni ak kayooktaoni, ne ki ibute Judas, si kobiit kwo oldanyi.”

²⁶ Kiseer parbareek agobo icheek, ak ki ibutyi parbaryat Matia; ak ki kiitito che kiyooktoi taman ak agenge.