PILIPIK 3 - BUKUIT NE TILIIL Sireet ne Dutero Kanon

Ma ki tinyei nyiganateet eng' poorto

¹ Ne po let anyun, che kitupche, oboiboitu eng' Kiptaiyat. Ma kaimet iman eng' anee asirwak tuguuchuuto, ago toretook okweek.

² Oriibegei sesenik, oriibegei yaigap yaityo, oriibegei icheek che tilegei:

³ amu ki kamuratanet acheek, che saaei eng' Kabuusetap Kamuktaindet, ak kilasuge eng' Kristo Jeso, ama ki tinyei kamang'unet eng' poorto:

⁴ agot ngamuuchi amang'kei agot eng' poorto. Ngo pwaati chii age tugul koleen tinyei kamang'unet eng' poorto, ko aa siirtoot.

⁵ Ki kimuratana eng' peetuut ne po sisiit, aa po kesweegap Israel, aa po ooreetap Benjamin, Hebranindet ne po Yahudik; eng' ng'aleegap Ng'atuutyet, ko aa Pharisaindet;

⁶ eng' kagiiletapkei, ko ki ausaus kaniset; eng' imanda ne mi eng' Ng'atuutyet, koma tinye leluut.

⁷ Ago tuguuk che ki poroteet eng' anee, ko kiaiit chuuto koek tugun che ki kobetyo amu Kristo.

⁸ Ee iman, ak aiiti tuguuk tugul koek tugun che ki kobetyo amu telunateet ne po naetap Kristo Jeso, Kiptaiyandennyu: ki kobetwo tuguuk tugul amu ineendet ak aiiti ale pusagaryek, si kobiit anyoor Kristo,

⁹ ak kenyoorwo eng' ineendet, koma tinye imandanyu, nooto ne po Ng'atuutyet, ago nooto ne punu kayaneet eng' Kristo, imanda ne po Kamuktaindet eng' kayaneet:

¹⁰ si kobiit anai ineendet ak kamuktaet ne po ng'eetyeennyi, ak yamdaet ne po nyalilwogikyik, kirogendoena meennyi;

¹¹ si kobiit anyoor eng' oor age tugul aiityi ng'eetyeetap che ki pek.

Ki kiilgei keityin ole mi kuursennyo

¹² Ma keele ki anyooru, ama keele ki aegu ne ititaat: ago agiiljinigei tai, si kobiit anam nooto ne ki igoochi Kristo Jeso konamena.

¹³ Che kitupche, ma iiti anee ale kaanam: ago ayae kiit agenge, autye tuguuk che mi let eng' anee, ayogoochinigei tuguuk che mi tai.

¹⁴ Agiiljinigei tai, ait ole pooch melekto ne po kuuretap parak ne po Kamuktaindet eng' Kristo Jeso.

¹⁵ Nooto anyun, ongibwaat acheek che kigeesunotingei ko uu nooto: ak ngo pwaat kiy ne teer eng' ng'olyoo age tugul, kota kong'ang'wok Kamuktaindet niito agine:

¹⁶ ago, yooto kogeit, ko ongebendate ng'atuutyonooto.

¹⁷ Che kitupche, oegu che yaei tuguuk che ayae, ak ogeer icheek che pendoti ko uu kaboorunet ne ogeerenech.

¹⁸ Amu pendoti che chaang' che ki amwaiwok kotugul agobo icheek, ak nguno amwaiwok eng' riirek, ale icheeget ko puunigap kimurtoiyotap Kristo:

¹⁹ ne kagesunennywa ko luseet, ne kamuktaindennywa ko moet, ne kalasunennywa ko teweernatennywa, che ibwaati tuguugap ng'wony.

²⁰ Amu ki piigap kipsengwet: che kigeni Yetindet kobun olooto, Kiptaiyat Jeso Kristo:

²¹ ne tuun walei kileelit poortanyo ne po nyeraatyet, si kobiit kogergeit ak poortanyi ne po liilindo, eng' kamugonooto imuuchi koyai tuguuk tugul kogas iit ineendet.