PILIPIK 2 - BUKUIT NE TILIIL Sireet ne Dutero Kanon

Kaming'inetapkei ak ooindap Kristo

¹ Ngo miitei anyun kagaigaet age tugul eng' Kristo, ngo mi saisaet age tugul ne po chamyet, ngo mi yamdaet age tugul ne po Kabuuset ne Tiliil, ngo mi rireenosyek ak riirge,

² osulde anyun poiboiyennyu, si oegu che po kabwaatet agenge, otinye chamyet agenge, oo po yamdaet agenge, ak che po mageet agenge.

³ Amoyai kiy age tugul eng' toiyet, anan eng' kalasunetapkei, ago eng' kaming'inetapkei ne po naet, koiti chii age tugul chiito age kole kaigai kosiir ineendet;

⁴ amat kogeer chii age tugul eng' okweek tuguukyik kityo, ago chii age tugul eng' okweek kogeer tuguugap piik alak ak icheek.

⁵ Ingotebenok ateboni, ne ki mi agine eng' Kristo Jeso:

⁶ ne, nganda ki tinyei itoondap Kamuktaindet, koma iit kole kiit ne po kamanuut ne oo kole kogergeit ak Kamuktaindet,

⁷ ago kiyaigei ineendet koek puch ak konam itoondap otwogindet, kogergeit ak piik;

⁸ ak kingo took eng' itoondap chii, koming'ingei, kogas iit agoi meet, ee, meet ne po kimurtoiyot.

⁹ Nooto anyun, kiitoroor `Kamuktaindet ineendet miising', ak kogoochi ineendet kainet ne siirei kainet age tugul;

¹⁰ si kobiit kogutuny kutundo age tugul eng' kainetap Jeso, age tugul ne mi kipsengwet, ak ne mi ng'wony ak ne mi ng'wony oriit,

¹¹ si kong'aany ng'elyepta age tugul kole Jeso Kristo ko Kiptaiyat, agoi toroornatetap Kamuktaindet Kwanda.

Lapkeiyosyek eng' ng'wony

¹² Nooto anyun, chamanikyuk, ko uu ye koogase iit kotugul, ma ye ami kityo, ago nguno ye ma mi ogase iit kosiir, oboisyee yetuneng'wong' kosulda eng' kaiyweisyet ak potanet;

¹³ amu Kamuktaindet ne poisyei eng' okweek si omach, ak oboisyee agine, agobo magennyi ne myee.

¹⁴ Oyai tuguuk tugul ama eng' kang'unyng'unyosyek ak tiiyasyek;

¹⁵ si kobiit oegu che ma tinyei leluut ak ko libwoben, lagogap Kamuktaindet che ma tinyei kunenden eng' kwenutap ibinda ne kunuur ak ko mastaat, che kooluu eng' kwenunnywa ko uu lapkeiyosyek eng' ng'wony,

¹⁶ oboortoi ng'olyootap saboondo; si kobiit anyoor ne alasunegei eng' peetuutap Kristo, ale ki ma alabat puch anan aboisye puch.

¹⁷ Ee, agot ngerong'ja paragutap kaptisisyet ak otisyetap kayaneng'wong', ko abaibai, ak agasigei kobootok okweek tugul:

¹⁸ ak ko uu nooto oboiboitu ak okweek, ak ogaaskei kobooto.

Timoteo ak Epaphroditus

¹⁹ Ago amang'u eng' Kiptaiyat Jeso ale ayookwok Timoteo ko neegit, si anyoor agane kagaigaet ne myee, ye kaanai atebeeng'wong'.

²⁰ Amu ma tinye chii age ne kergei kabwaatennyi ak nenyu, ne riibei iman atebeeng'wong'.

²¹ Amu cheeng'ei icheek tugul chechwaak, ma tuguuk che po Jeso Kristo.

²² Amu ongen atebeennyi komyee, ole, ko uu lakweet ak kwanda, ko kibois kobooto eng' logoiywek che myach.

²³ Amang'u anyun ale, ayookwok ineendet nguno, eng' sait ye kaageer ole ateptoi:

²⁴ ago amang'u eng' Kiptaiyat ale anyoone aneendet agane ko neegit.

²⁵ Ago ki abwaat ale nyolu ayookwok Epaphroditus, tupchennyu ne kiboityot ne kiboisyei tuwai ne asigarindet kobooto, ak ko neng'wong' kayooktoindet ak toretindet agobo tuguuk che amakyinige;

²⁶ amu kiting'enok emosto okweek tugul, ak ki tinyei nyalilda ne oo, amu ki ogas keele kimyani ineendet:

²⁷ amu kimyan iman, kot ko neegit kome: ago ki riiree `Kamuktaindet ineendet; ago ma eng' ineendet kityo, ago eng' anee agane, si ma nyooru arageneet eng' arageneet.

²⁸ Kayogu ineendet anyun eng' kagiiletapkei ne oo, si, ye ogeer ineendet kogeny, omuuchi oboiboitu, si kowisisiit aragenennyu.

²⁹ Otaach ineendet anyun eng' Kiptaiyat eng' poiboiyet tugul; ak ogonyit che uu nooto:

³⁰ amu ki neegit kome agobo poisyetap Kristo, koma riiree saboondanyi si konyiitwa kiit ne ki rartaat eng' poisyeng'wong' ne ki oboisyeiwo.