NG'ATUTIK 8 - BUKUIT NE TILIIL Sireet ne Dutero Kanon

Ki kiili piik kogas iit Kamuktaindet ne Toroor

¹ Oriip oyai ng'atuutyet komugul ne kang'atiin rani si osapche ak otesage, ak obe onam emet ne ki iyasyechi `Kamuktaindet ne Toroor kwanisyekwok.

² Ibwaat ooreet komugul ne ki komutunenen Kamuktaindet ne Toroor Kamuktaindeng'ung' eng' surkwen kenyisyechu artam, koming'inin ak kotyemin si konai kiit ne mi muguleldang'ung', ngichame anan ko mechame iriip ng'atuutikyik.

³ Ki iming'inin, ki koonin koamin rubeet ak kibaenen mana che ki ma inai, amanai kwanisyeguk. Ki yai niito si kogoonin inai ile ma sabei chii eng' amdit kityo, ago sabei eng' kiy age tugul ne mang'une kutitap Kamuktaindet ne Toroor.

⁴ Ki ma osegitu ngoroiguk che ki ilaachi anan koobwanso keelyeguk eng' kenyisyechooto artam.

⁵ Iguiye eng' muguleldang'ung' ile, ko uu ye kerei kong' chii weeriinnyi, ko itigonin Kamuktaindet ne Toroor Kamuktaindeng'ung'.

⁶ Riip anyun ng'atuutigap Kamuktaindet ne Toroor Kamuktaindeng'ung', ibun ortinwekyik ak iywei ineendet.

⁷ Imutin `Kamuktaindet ne Toroor Kamuktaindeng'ung' iit emet ne karaaran, emetap kereruusyek che mi peek ak komi kong'igap peek ak keriingonik che kutune peek eng' atebwosyek ak eng' tuloonook.

⁸ Imutyiin emetap nganuuk ak baale, emetap keetiigap sabibuk, mogoonik ak logoek alak che eecheen, emetap mseituni, che po mwanik ak kumyat,

⁹ emet ne iamisyei, ne ma piitu rubeet ama rarun kiy eng' olooto, emet ne koikyik ko kariik, ak kebaalen tuloonookyik sugunonik.

¹⁰ Ye kaiamisye ibiye, ilasu Kamuktaindet ne Toroor Kamuktaindeng'ung' amu emet ne myee ne kagoonin.

Kegerei kong' piik ma utye Kamuktaindet ne Toroor

¹¹ “Riipkei anyun si meutye Kamuktaindet ne Toroor Kamuktaindeng'ung' ak imete ng'atuutikyik, kirwoogutikyik ak kaneetisyosyechooto kang'atiin rani.

¹² Ye kaiamisye ibiye ak iteech kooriik che korooron ak imeny,

¹³ ak ye katesagis tuguuk ak keechiireguk, fedhaisyeguk ak thahabu, ak kotesagis tuguuk tugul che itinye.

¹⁴ Memeen anyun ak iutye Kamuktaindet ne Toroor Kamuktaindeng'ung' ne ki imutun imang'une emetap Misiri eng' kootap otwoknateet,

¹⁵ ne ki indoun eng' surkwen ne oo, ole oo arageneet ak komi erenook che ng'woneen ak tagolik, emetap melelda ole ma mi peek. Ki inagin peek komang'une rwandet ne uui.”

¹⁶ Kibaenen mana eng' surkwen che ki ma nai kwanisyeguk, si koming'inin ak kotyemin. Kiyaun ne myee eng' let,

¹⁷ si mele eng' muguleldang'ung', “Kagoono kimnateennyu ak kamugetap eunnyu mogornatoni.”

¹⁸ Ago ibwaat Kamuktaindet ne Toroor Kamuktaindeng'ung' amu ineendet ne koonin kimnateet ne inyoorunee mogornateet, si kogimit kayomisennyi ne ki iyasyechi kwanisyeguk, ko uu ye yaei rani.

¹⁹ Ngot iutye Kamuktaindet ne Toroor Kamuktaindeng'ung', ak isup kanamonik ioot ak igutung'ji, abaoryani agobo okweek rani ale olustosi ne matiny.

²⁰ Olustosi okweek ko uu pororyosyek che ng'emei `Kamuktaindet ne Toroor eng' taing'wong', amu ma ocham ogas kutitap Kamuktaindet ne Toroor Kamuktaindeng'wong'.