NG'ATUTIK 7 - BUKUIT NE TILIIL Sireet ne Dutero Kanon

Pororyet ne itabaanat ne po Israel

¹ Ye kagoiitin Kamuktaindet ne Toroor Kamuktaindeng'ung' emet ne iwendi iname kobunjiin ak koon pororyosyek che chaang' eng' taing'ung', che chooto ko Hitik, Girgasik, Amorik, Kanaanik, Perisik, Hibik, ak Jebusik, pororyosyek tisap che eecheen ak ko kiimeen kosiirin,

² ak ye kagoonin Kamuktaindet ne Toroor Kamuktaindeng'ung' inam icheek, ko nyolu ibar iwong'u. Amoarorchigei kiy kobooto icheek anan iriiree.

³ Amogangei, amegoochi cheptong'ung' weeriinnyi anan itunji weeriing'ung' cheptonyi.

⁴ Amu tuun imaasi weeriing'ung' si ma isuba, ak koot kanamonik, ak eng' nooto anyun, konereech miising' Kamuktaindet ne Toroor eng' okweek ak kong'emin kochokyin.

⁵ Ago oyachi ko uu ni; obut kapkorosusyekwak, otonaton tolochikwak, oep lumeiywegap Aserik ak obeel kanamonikwak.

⁶ Ii pororyet ne itabaanat eng' Kamuktaindet ne Toroor Kamuktaindeng'ung'. Ki lewenin Kamuktaindet ne Toroor Kamuktaindeng'ung' eng' pororyosyek tugul che mi ng'wony iegu pororyet ne nenyi ineegei.

⁷ Ki ma chamaak Kamuktaindet ne Toroor kolewenook amu ki ochaang' kosiir piik alak, ki chamaak nganda ki ong'ering' kosiir piik tugul.

⁸ Ago amu ki chamaak Kamuktaindet ne Toroor ak koriip kayasyoet ne ki iyasyechi kwanisyekwok, komoong'wok anyun ineendet eng' euut ne kiim ak kotyachak eng' kootap otwoknateet, eng' eutap Pharaoh laitoryatap Misiri.

⁹ Nai anyun ile Kamuktaindet ne Toroor Kamuktaindeng'ung', ko Kamuktaindet, Kamuktaindet ne po imanda, ne riibei kayomiset ak rireenet eng' icheek che chamei ineendet ak koriibei ng'atuutikyik agoi ibindap eliphuut.

¹⁰ Yaakyin mugetuut kong'emei che wechei ineendet ne matiny: ma igaigei eng' ne wechei, igeerchin kimni.

¹¹ Riip anyun ak iyai ng'atuutik, kaneetisyosyek ak kirwoogutik che kang'atiin rani.

Kaberuuret eng' che kase iit

¹² Ye ogas kirwoogutichu, oriip ak oyai, si koriip anyun Kamuktaindet ne Toroor Kamuktaindeng'ung' kayomiset ak rireenet eng' inyee ne ki iyasyechi kwanisyeguk.

¹³ Chamin, iberuurin ak kotesin ochaang'e. Iberuuri iyoteng'ung', ruroteetap emeng'ung', peeguk, peegap logoeguk, mwaniguk, ak kaberuretap tuuga ak che po keechiireguk eng' emet ne ki iyasyechi kwanisyeguk kole koonin.

¹⁴ Kiberuurin kosiir piik tugul; ma piitu ne soneni ne muren anan ne kobogoryo eng' okweek anan eng' tuukwok.

¹⁵ Istoenen Kamuktaindet ne Toroor myanwogik tugul, ak ma koonin korotwek che yaach che ki igeer eng' Misiri, ago igoochin tugul che wechin.

¹⁶ Ing'eme iwong'u pororyosyek tugul che koonin Kamuktaindet ne Toroor Kamuktaindeng'ung'. Amat iriiree icheek anan ioot kanamonikwak, amu egu mesteet eng' inyee nooto.

¹⁷ Imuuch imwa eng' muguleldang'ung' ile chaang' pororyosyechu kosiiro, ara aondoi ano.

¹⁸ Meiywei pichooto; ibwaat miising' ne ki yachi Kamuktaindet ne Toroor Kamuktaindeng'ung' Pharaoh ak Misiri komugul.

¹⁹ Ki igeer eng' konyeguk tyemuutik, kaboorunoik ak kwang'utik che eecheen ak euut ne kiim ne chuulaat, che ki imoong'unenen Kamuktaindet ne Toroor Kamuktaindeng'ung'. Yachin Kamuktaindet ne Toroor Kamuktaindeng'ung' ko uu nooto pororyosyek tugul che iywei.

²⁰ Ne siirei chooto, koyookyin Kamuktaindet ne Toroor Kamuktaindeng'ung' icheek kaaraamik agoi kowong'kei che kang'et kounyegei eng' taing'ung'.

²¹ Among' komuok, amu Kamuktaindet ne Toroor Kamuktaindeng'wong' ne mi kobootok, ko Kamuktaindet ne oo ak ko po kwong'eet.

²² Oone ko mutyo Kamuktaindet ne Toroor Kamuktaindeng'ung' pororyosyechooto eng' taing'ung'. Ma kichamun ibar iwong'u tugul eng' kasarta agenge ndabuch ko chang'achin tyong'igap timiin.

²³ Ago koonin icheek `Kamuktaindet ne Toroor Kamuktaindeng'ung' eng' taing'ung', ak kobarei icheeget eng' pareet ne oo, agoi kowong'kei.

²⁴ Indoi laitorinikwak euneguk, ak ibeet kainennywa eng' kurereetap kipsengwet. Ma piitu chii ne imuuchi kotonon eng' taing'ung'; ibare kowong'kei.

²⁵ Obeel kanamonigap kamuktaikwak, amat igase myat fedha anan thahabu che mi kanamonichooto, anan iipchigei si ma riichin amu wechei nooto Kamuktaindet ne Toroor Kamuktaindeng'ung'.

²⁶ Ameip kiit ne kiwechei kwo koong'ung', ndabuch iegu ne istoot ko uu kioto. Wech miising' ak ieesye kioto amu ki kitabaan kobunji ng'emeet.