NG'ATUTIK 6 - BUKUIT NE TILIIL Sireet ne Dutero Kanon

Kaagilet agobo kaseetap iit

¹ Ni anyun ng'atuutyet, kaneetisyosyek ak kirwoogutik che ki ng'at Kamuktaindet ne Toroor Kamuktaindeng'wong' kineetak, si kobiit oyai ng'atuutichu eng' emet ne olang'jini oname kobunjook,

² si kobiit igonyit Kamuktaindet ne Toroor Kamuktaindeng'ung', inyee ak weeriing'ung' ak mochogoreng'ung' eng' peetuusyeguk tugul kotee isabe. Ak iriip kaneetisyosyekyik tugul ak ng'atuutikyik che ang'atiin, si kochang'a peetuusyeguk.

³ Ogas anyun ee Israel, oriip ogeer ole koyai si komyeeityin ak otesage eng' emet ne nyiitaat cheego ak komi kumyat eng' chaang'indo ko uu ye ki iarorun `Kamuktaindet ne Toroor, Kamuktaindetap kwanisyeguk.

⁴ Ogaso ee Israel! Kamuktaindet ne Toroor Kamuktaindennyo, ko Kamuktaindet ne Toroor agenge;

⁵ ak cham Kamuktaindet ne Toroor Kamuktaindeng'ung' eng' muguleldang'ung' tugul, eng' saboondang'ung' tugul ak eng' kimnateng'ung' tugul.

⁶ Ingotebee muguleldang'ung' ng'aleechu `kang'atiin rani.

⁷ Ineet lagoguk eng' kagiiletapkei: ng'alaale ye itebye ng'wony eng' koong'ung', ye iwendi eng' ooreet, ye irue ak ye ing'eete.

⁸ Ratyi eung'ung' si koek kaboorunet ak koek ratuutik che kirate anook eng' turyetap togeng'ung'.

⁹ Sirchi tugatugigap kurgeetap koong'ung', ak ormariichoguk.

Kateunet agobo che ma kase iit

¹⁰ Ak ye kagomutin Kamuktaindet ne Toroor Kamuktaindeng'ung' iwe emet ne ki iyasyechi kwanisyeguk Abraham, Isak ak Jakobo kole koonin nganasook che eecheen ak ko myachen, che ki ma iteeche

¹¹ ak kooriik che nyiitootiin tuguuk tugul che myachen che ki ma inyiiti, keriingonik che po peek che ki ma ibale, mbareenigap sabibuk ak mseituni che ki ma imiine, ak ye iam ak ibiye,

¹² iriipkei anyun si meutye Kamuktaindet ne Toroor ne ki imutun imang'une emetap Misiri eng' kootap otwoknateet.

¹³ Iywei Kamuktaindet ne Toroor Kamuktaindeng'ung', oot ineendet ak iyasye eng' kainennyi.

¹⁴ Amosup kanamonik agot che po pororyosyek che neegiteenok,

¹⁵ amu tinyei ng'etkong' `Kamuktaindet ne Toroor Kamuktaindeng'ung' ne mi kwenung'ung'. Amu ngo sup, kolaldos nereegegap Kamuktaindet ne Toroor Kamuktaindeng'ung' eng' inyee ak kowong'un eng' ng'wony.

¹⁶ Amotyem Kamuktaindet ne Toroor Kamuktaindeng'wong' ko uu ye ki otyem eng' Massah.

¹⁷ Oriip eng' kagiiletapkei ng'atuutik, paornatosyek, ak kaneetisyosyegap Kamuktaindet ne Toroor Kamuktaindeng'wong' che king'atin.

¹⁸ Yai ne po iman ak ne myee eng' taitap Kamuktaindet ne Toroor si komyeeit eng' inyee ye iwe inam kobunjiin emet ne myee ne ki iyasyechi Kamuktaindet ne Toroor kwanisyeguk

¹⁹ kole, oonei puuniguk tugul eng' taing'ung' ko uu ye ki komwa Kamuktaindet ne Toroor.

²⁰ Ye tuun teebenen weeriing'ung' kole po nee paornatosyek, kaneetisyosyek ak kirwoogutichu king'ataak Kamuktaindet ne Toroor, Kamuktaindennyo?

²¹ Ileenji anyun weeriing'ung', ki kiotwogigap Pharaoh eng' Misiri, ak ki imoong'wech Kamuktaindet ne Toroor eng' Misiri eng' euut ne kiim.

²² Kegeerei, ko ki ibarta Kamuktaindet ne Toroor kaboorunoik ak kwang'utik che eecheen, che pichiien, che kibiree Misiri ak Pharaoh kobooto piikyik tugul.

²³ Ki imutwech eng' olooto kebwa olito si kogoonech emet ne ki iyasyechi kwanisyekyok.

²⁴ Ki ng'atech anyun `Kamuktaindet ne Toroor keyai kaneetisyosyechu tugul, kiywei Kamuktaindet ne Toroor, Kamuktaindennyo si ketepte myeeindo kotugul, si koriibech kesapchee ko uu ra.

²⁵ Egu anyun imanda eng' acheek ngigiilgei keyai ng'atuutyoni tugul eng' taitap Kamuktaindet ne Toroor, Kamuktaindennyo ko uu ye king'atech.