NG'ATUTIK 5 - BUKUIT NE TILIIL Sireet ne Dutero Kanon

Kogetyingei Musa Ng'atuutik Taman

¹ Ak ki kuur `Musa Israel tugul, ak koleenji, “Ogas anyun, ee Israel kaneetisyosyek ak kirwoogutik che amwaiwok rani. Ogas eng' itiikwok si kobiit oneetkei ak oriip oyai.”

² Ki yai `Kamuktaindet ne Toroor, Kamuktaindennyo kayomiset kobootech eng' Horeb.

³ Ki ma yai `Kamuktaindet ne Toroor kayomisoniito ak kwanisyekyok ago ki yai kobootech acheek tugul che ki mi kesaptosi rani.

⁴ Ki ng'alaalwok Kamuktaindet ne Toroor kimni eng' tulweet eng' maat,

⁵ ki atonon eng' kwenung'wong' ak Kamuktaindet ne Toroor eng' peetuunooto si aboorwok ng'olyoonnyi amu ki oiyweisye amu maat, ak ki ma otogoste tulweet ak koleenjok,

⁶ Aa Kamuktaindet ne Toroor Kamuktaindeng'ung', ne ki among'un eng' emetap Misiri eng' kootap otwoknateet.

⁷ Amecheeng'jigei kamuktaik alak kobatena aneege.

⁸ Ameyachigei kanamwet anan itoondap kiy age tugul ne mi parak kipsengwet anan ne mi ng'wony oriit anan ne mi peek eng' ng'wony oriit.

⁹ Ameng'uruukyi anan ioot. Amu anee Kamuktaindet ne Toroor Kamuktaindeng'ung', ko aa Kamuktaindet ne amei ng'etkong'. Ageerchini lagok tengektap kwanisyekwak agoi ibinda ne po somok ak ne po ang'wan eng' icheek che wecho.

¹⁰ Ago ariiree eliphuusyek eng' icheek che chama che isubi ng'atuutikyuk.

¹¹ Amemwa kainetap Kamuktaindet ne Toroor Kamuktaindeng'ung' eng' tangoi, amu iityin Kamuktaindet ne Toroor ng'oogisto ne mwaei kainennyi eng' tangoi.

¹² Riip peetuutap sabato, itabaan ko uu ye king'atin Kamuktaindet ne Toroor Kamuktaindeng'ung'.

¹³ Iboisyei eng' peetuusyek lo ak iyai poisyoniguk tugul.

¹⁴ Ago peetuutap tisap ko sabato ne po Kamuktaindet ne Toroor Kamuktaindeng'ung'. Ameyai poisyet peetuunooto inyee, anan weeriing'ung' anan cheptong'ung', anan otwogeng'ung' ne muren anan ne tye, anan eitang'ung' anan sigiryeng'ung', anan tuguuk anan toondeng'ung' ne mi kurgotiguk; si komuuny otwogeng'ung' ne muren ak ne tye ko uu inyee.

¹⁵ Meutye ile ki ii otwoget eng' emetap Misiri ago ki imoong'un Kamuktaindet ne Toroor Kamuktaindeng'ung' eng' olooto eng' euut ne kiim ak eng' euut ne chuulaat. King'atin anyun eng' nooto `Kamuktaindet ne Toroor Kamuktaindeng'ung' iriip peetuutap sabato.

¹⁶ Teech kwandang'ung' ak kamenng'ung', ko uu ye king'atin Kamuktaindet ne Toroor Kamuktaindeng'ung', si kochang'a peetuusyeguk ak komyeeit eng' inyee eng' emet ne koonin Kamuktaindet ne Toroor Kamuktaindeng'ung'.

¹⁷ Amerumisye.

¹⁸ Amoipkei.

¹⁹ Amechoorse.

²⁰ Amebaoryanji chiitap kokweng'ung' eng' lembech.

²¹ Amegase myat osotyotap chiitap kokweng'ung', anan imakyigei kootap chiitap kokweng'ung' anan emennyi, anan otwogennyi ne muren anan ne tye, anan eitonyi anan sigiryennyi, anan kiy age tugul ne po chiitap kokweng'ung'.

²² Ki mwachi `Kamuktaindet ne Toroor tuiyeng'wong' komugul ng'aleechuuto tugul eng' maat ak pooldet eng' tulweet ak eng' imenindo ne oo. Ki mwachi eng' kutit ne oo ak ki ma tes alak. Yeityo kosirchi koik aeng' che lebeleen ak kogoono.

Musa ng'alaalindetap Kamuktaindet

²³ “Kingo kas kutit ne ki mang'une mesundeito ye kilalei tulweet, oriikyo anyun kobooto pounigap ortinwekwok ak poisyekwok,

²⁴ ak kole, ‘Ogeero, kaiboorwech `Kamuktaindet ne Toroor, Kamuktaindennyo liilindanyi ak etunatennyi ak kagegas kutinnyi komang'une maat. Kagenai rani keele ng'alaaljindos Kamuktaindet ne Toroor ak chii ak kosap.

²⁵ Kalya anyun si kebegu? Amu iwong'wech mai oo. Ngot kegas kogeny kutitap Kamuktaindet ne Toroor, Kamuktaindennyo kebegu.

²⁶ Chii ng'oo eng' piik tugul ne ki kas kutitap Kamuktaindet ne sabei kong'alaali eng' maat ko uu ye ki kigas ak kosap?

²⁷ Riikte inyee si igas tugul che mwaei `Kamuktaindet ne Toroor, Kamuktaindennyo. Yeityo inyoo imwaiwech tugul che mwaun Kamuktaindet ne Toroor, Kamuktaindennyo si kegas ak keyai.’ ”

²⁸ “Ki kas iman `Kamuktaindet ne Toroor ng'aleekwok yooto ki ong'alaalwo ak koleenjo, ‘Kaagas ng'aleegap pichu che kagomwaun. Myachen tugul che kamwa.

²⁹ Kata myee anyun nda tinyei kotugul muguleldo ne uu nooto si koiywea ak koriip ng'atuutikyuk tugul si komyeeit eng' icheek ak eng' lagokwak agoi.

³⁰ Ui anyun ileenji, Oweekyigei emaisyekwok.’

³¹ Ago tonon inyee eng' yu ami si amwaun tugul: kaneetisyosyek ak kirwoogutik, che ineeti koyai eng' emet ne agoochini konyaban.”

³² “Oriip anyun si oyai ko uu ye king'ataak Kamuktaindet ne Toroor Kamuktaindeng'wong'; amomaste obe tai anan kaataam.

³³ Obun ortinwek tugul che king'ataak Kamuktaindet ne Toroor Kamuktaindeng'wong', si osapche ak komyeeit eng' okweek ak kochang'a peetuusyekwok eng' emet ne oname kobunjook.”