NG'ATUTIK 4 - BUKUIT NE TILIIL Sireet ne Dutero Kanon

Kogiili `Musa Yahudik kogas iit

¹ Ki testai Musa kong'alaal ak ki le ara anyun, ee Israel, oepchi iit ng'atuutik ak kirwoogutik, che aneetook si kobiit oyai si osapche ak obe onam kobunjook emet ne koonok Kamuktaindet ne Toroor, Kamuktaindetap kwanisyekwok.

² Amotesyi kiy ng'olyoot ne ang'atook anan ochuchuch alak, si kobiit oriip ng'atuutigap Kamuktaindet ne Toroor Kamuktaindeng'wong' che ang'atook.

³ Ki kogeer konyekwok tuguuk che ki yai Kamuktaindet ne Toroor agobo Baal-peor. Amu ki kobar Kamuktaindet ne Toroor Kamuktaindeng'ung' eng' kwenung'ung' piik tugul che ki isup Baal-peor.

⁴ Ago okweek che ki onamgei ak Kamuktaindet ne Toroor Kamuktaindeng'wong' kosabei ra age tugul eng' okweek.

⁵ Ki aneetak ng'atuutik ak kirwoogutik ko uu ye king'ata Kamuktaindet ne Toroor Kamuktaindennyu, si kobiit oyai chooto eng' emet ne obendi oname.

⁶ Oriip anyun ak oyai, amu ng'omnateng'wong' niito ak naeng'wong' eng' taitap pororyosyek che tuun kasei ng'atuutichu tugul ak kole, “Tinyei utaatyet iman pororyoni oo ak kotinyei naet ne nin!”

⁷ Amu ngoro pororyet ne oo ne tinyei kamuktain ne neegitee icheek ko uu Kamuktaindet ne Toroor, Kamuktaindennyo, ne neegiteenech ui tugul ye kiguure ineendet?

⁸ Ak tos ngoro pororyet ne oo ne tinyei etanutik ak kirwoogutik che po imanda ko uu ng'atuutichu tugul che kande taing'wong' peetuuni?

⁹ Riipkei anyun, ak iriip saboondang'ung' eng' kagiiletapkei, si meutye tuguuk che ki keer konyeguk ak si ma manda eng' muguleldang'ung' eng' peetuusyeguk tugul che po sabeeng'ung'; agoi ineet lagoguk tuguuchuuto ak mochogoroniguk.

¹⁰ Eng' peetuut ne ki itonone taitap `Kamuktaindet ne Toroor Kamuktaindeng'ung' eng' Horeb, ye ki leenjo `Kamuktaindet ne Toroor, Iyumwa piik ak agoochi kogas ng'aleekyuk si koneetkei koiywea eng' peetuusyekwak tugul komi ng'wony ak si koneet lagokwak.

¹¹ Ki obwa oriigu otononse eng' tulweet keel ye kingo lalei maat eng' tulweet agoi kipsengwet kween, kobooto mesundeito, pooldet ak imenindo ne oo.

¹² Ak ki ng'alaalwok Kamuktaindet ne Toroor komi kwenutap maat: ki ogas tweguunetap ng'aleek ak kutit kityo, ago ki ma ogeer itoondo.

¹³ Kimwaiwok anyun kayomisennyi ne king'ataak oyai, ng'atuutichu taman che ki sirchi koik aeng' che lebeleen.

¹⁴ Ak king'ata Kamuktaindet ne Toroor peetuunooto aneetaak ng'atuutik ak kirwoogutik, si kobiit oyai eng' emet ne obendi oname kobunjook.

Kegerei kong' Yahudik agobo kamuktaik

¹⁵ Oriipkei anyun miising'; amu ki ma ogeer itoon age tugul eng' peetuut ki ng'alaalwok Kamuktaindet ne Toroor eng' Horeb eng' maat.

¹⁶ Ama mong'emgei oyachigei kanamwet eng' kergeindap kiy age tugul: Eng' itoondap muren anan kwony,

¹⁷ anan itoondap tyony age tugul ne mi ng'wony, anan itoondap toriit age tugul ne tirireni eng' parak.

¹⁸ Anan itoondap kiy age tugul ne ichuutegei ng'wony, anan itoondap njiryot age tugul ne mi peek che mi ng'wony oriit.

¹⁹ Riipkei anyun si ma ye inyal parak, igeer asiista ak arawet ak kecheik, agot chaang'indo tugul che mi kipsengwet, kochuutin iwe isaa tuguuchooto ak ioot tuguuchooto ki kopchechi Kamuktaindet ne Toroor Kamuktaindeng'ung' pororyosyek tugul che mi kurereetap kipsengwet.

²⁰ Ago konamak Kamuktaindet ne Toroor, ak komutwak omang'une maatap karnet eng' Misiri oegu piigap porotennyi ko uu rani.

²¹ Kobooto nooto, koginereekyo Kamuktaindet ne Toroor agobo okweek, ak ki iyasyo kole, melandoe Jordan ameite emonooto karaaran ne koonin Kamuktaindet ne Toroor Kamuktaindeng'ung', inyee Israel inyaban.

²² Ago amechini anee emoni, malandoe Jordan ago olandoi okweek oname emonooto karaaran.

²³ Oriipkei anyun si moutye kayomisetap Kamuktaindet ne Toroor Kamuktaindeng'wong', ne ki yai kobootok, oyai kanamwet eng' kergeindap kiy age tugul ne kietenen Kamuktaindet ne Toroor Kamuktaindeng'ung'.

²⁴ Amu Kamuktaindet ne Toroor Kamuktaindeng'ung' ko maat ne iwong'u ak kotinyei ng'et kong'.

²⁵ Ye tuun kaomeng'iisye eng' emet ak osich lagok ak mochogoronik, ak ngo namgei ak oyai kanamwet eng' kergeindap kiy age tugul, ak oyai ne ya eng' taitap Kamuktaindet ne Toroor Kamuktaindeng'ung' otach ineendet,

²⁶ ko kaaguur kipsengwet ak ng'wony kobaoryanjin peetuuni, ale osip olustosi owong'ugei eng' emet ne obendi olandoe Jordan oname kobunjook. Ma chaang'aitu peetuusyekwok eng' olooto ago king'emok owong'ugei.

²⁷ Iiyestaak Kamuktaindet ne Toroor oyomu pororyosyek ak ong'etu che ng'ering' eng' pororyosyek ole imutok Kamuktaindet ne Toroor.

²⁸ Ak oot kanamonik che poisyetap eunegap piik, che po keetiik ak koik ak ko che ma keerei kiy ama kastoi ama amisyei anan kong'uto.

²⁹ Ago ngo cheeng' eng' olooto Kamuktaindet ne Toroor Kamuktaindeng'ung', onyooru ineendet ngo cheeng' eng' muguleldang'wong' tugul ak eng' saboondang'wong' tugul.

³⁰ Ak ye imiitei nyalilda, ak kobwonjin tuguuchu tugul, iweekyigei Kamuktaindet ne Toroor Kamuktaindeng'ung' anyun eng' peetuusyek che po let, ak igas kutinnyi.

³¹ Amu Kamuktaindet ne Toroor Kamuktaindeng'ung' ko Kamuktaindet ne Toroor ne po rireenet ma metoin, anan kowong'un anan koutye kayomisetap kwanisyeguk ne ki iyasyechi.

³² Teep anyun nguno agobo peetuusyek che ki kosiirto che kisip kondounenen kobooch ngap kotoi Kamuktaindet koyai chii eng' ng'wony, kobooch tabanda age ne po kipsengwet agoi tabanda age, teep ngo ki kobiit kiit age ne oo ne uu ni anan ngo kigegasei?

³³ Tos ki kogasei piik ole kigoi kutitap Kamuktaindet kong'alaali eng' kwenutap maat ko uu ye ki igas ak kosapcho?

³⁴ Anan kityem Kamuktaindet au komutyigei pororyet eng' pororyet age, eng' tyemuutik, eng' kaboorunoik, eng' kwang'utik, eng' pooryeet ak eng' euut ne kiim ne chuulaat eng' kamuisosyek che eecheen ko uu tugul che kiyaiywok Kamuktaindet ne Toroor Kamuktaindeng'wong' eng' Misiri eng' taitap konyekwok?

³⁵ Ki kiboorun inyee si kobiit inai ile Kamuktaindet ne Toroor ineendet ko Kamuktaindet ne Toroor, ma mi age kobatee ineendet ineegei.

³⁶ Ki koonin igas kutinnyi ne mang'une kipsengwet si kobiit kogerin kong' ak ki koonin igeer maannyi ne oo eng' ng'wony. Ki igas ng'aleekyik komang'une kwenutap maat.

³⁷ Amu ki chamei kwanisyeguk, kolewen anyun ineendet iyotennywa ne piitu let ak komoong'un eng' Misiri komi kobooten eng' kimnateennyi ne oo.

³⁸ Ki oon pororyosyek eng' taing'ung' che eecheen ak ko kiimeen kosiirin si komutun imong'u olito, kogoonin emennywa koek poroteng'ung' ko uu peetuuni.

³⁹ Nai anyun rani ak igonor eng' muguleldang'ung' ile, Kamuktaindet ne Toroor ko Kamuktaindet ne Toroor eng' parak kipsengwet ak eng' ng'wony oriit; ma mi age.

⁴⁰ Riip anyun kaneetisyosyekyik ak ng'atuutikyik che `kang'atiin rani si komyeeit eng' inyee, kobooto lagoguk che piitu let ak kochang'a peetuusyeguk eng' emet ne koonin Kamuktaindet ne Toroor Kamuktaindeng'ung' koigeny.

Katabaanetap nganasook che kimwechin

⁴¹ Ki itabaan anyun Musa nganasook somok eng' Jordan pitoniin ole po kong'asiis,

⁴² si komwechi olooto rumiindet, ne kabar chiitap kokwennyi eng' lelset ne ki ma kochurchin. Ki imuuchi kosap ineendet ne kamwechi age eng' nganasochooto.

⁴³ Nganasochooto ko Beser eng' surkwen eng' emetap warenget kobunji piigap Reuben, Ramot eng' Gilead kobunji piigap Gad ak Golan eng' Bashan kobunji piigap Manasseh.

Kong'atei `Musa piigap Israel kogeny

⁴⁴ Ni ng'atuutyet ne ki inde Musa taitap piigap Israel.

⁴⁵ Chuuto kora paornatosyek, kaneetisyosyek ak kirwoogutik che ki mwachi `Musa piigap Israel ye kingo kagomang'une Misiri,

⁴⁶ komiitei Jordan pitoniin eng' atebweet ne tokyingei Beth-peor, emetap Sihon laitoryatap Amorik, ne ki menyei Hesbon ne kibar `Musa ak piigap Israel ye kingo kagomong' icheek eng' Misiri.

⁴⁷ Ki nam emennyi kobunji ak emetap Og laitoryatap Bashan. Laitorinichooto aeng' che po Amorik che ki menyei Jordan pitoniin eng' komostap kong'asiis;

⁴⁸ kobooch Aroer, ne mi tabandap atebweetap Arnon, agoi tulweet ne po Siyon (kainet age ne po tulweetap Hermon)

⁴⁹ Kobooto Arabah tugul ne mi Jordan pitoniin eng' komostap kong'asiis agoi nyanjet ne mi Arabah ne miitei Piska keel.