NG'ATUTIK 32 - BUKUIT NE TILIIL Sireet ne Dutero Kanon

Tyendap Musa

¹ Oebit, ee okweek kipsengwet, si kobiit ang'alaal; ingogas ng'wony ng'aleegap kutinnyu.

² Rong'ugei kaneetisyennyu ko uu ropta, ak kosoi ng'aleekyuk ko uu rewoot, ko uu ropta ne inesyin susweek che ng'orng'or, ak ko uu ropta ne robonjin susweegap timiin:

³ Amu amwaitoi kainetap Kamuktaindet ne Toroor: Oiityi etunateet Kamuktaindennyo.

⁴ Rwandet ineendet, ititaat poisyennyi, amu imanda ortinwekyik tugul. Kamuktaindet ne po imanit ne ma tinyei yaityo, po imanda ineendet ak kosuldaat.

⁵ King'emgei eng' taitap Kamuktaindet ne Toroor; kalilano eng' icheek amu ma ko lagokyik icheeget; icheek ko pororyet ne ngelelyo ago mastaat.

⁶ Tos kongoi ne ogoochini Kamuktaindet ne Toroor ni, okweek piik che oo abusotiin che ma oo ng'oomen? Tos ma kwandang'ung' ne ki koonin sabeet? Tos ma ineendet ne ki yain ak kogimitin?

⁷ Ibwaat peetuusyek che po keny, ak iruchi kenyiisyegap ibinwegap tai. Teebe kwandang'ung' si koboorun. Teebe poisyeguk si komwaun.

⁸ Ye ki igoochi `Ne Toroor Miising' pororyosyek porotennywa, ye kipcheei weeriigap piik, ki inde kiwotosyegap piik ko uu koitetap piigap Israel.

⁹ Amu piikyik kebebertap Kamuktaindet ne Toroor; porotennyi Jakobo.

¹⁰ Kinyoorchi ineendet surkwen, eng' surkwen ne imuisei ne ma mi kiy. Kiyiem ak koriip icheek ki riip `ineendet icheek ko uu laptetap kondanyi.

¹¹ Ko uu ye ing'eeti kipsiichit aarekyik, ne wendote paragutap lagokyik koriibei, ne uitoi kebebaikyik, konam icheek, ak kogesene kebebaikyik.

¹² Kamuktaindet ne Toroor ineegei ne ki indochi ineendet, ak ma piit kamuktain ne po pororyosyek alak kobooto ineendet.

¹³ Ki igoochi kolaany oldinwek che sutotin che po ng'wony; ki am ruroteetap mbareet. Ki igoochi kochuchun kumyat eng' rwandet, kobooto mwanik eng' rwandet ne uui.

¹⁴ Kibae icheek mwaitap cheego ne po akweet, ak cheegap keechiirek, kobooto mwanigap aaregap keechiir. Ki igoochi icheek mengichigap Bashan ak ng'oroorek, kobooto mwanigap nganuuk che myachen. Ki eei divaik che anyiny, che kiyae peegap sabibuk.

¹⁵ Ago kiner Jesurun, ak kotyaris, kiner, kinyigiisitu ak koakwait eng' amitwogik. Yeityo kobagaakta anyun Kamuktaindet ne ki yai icheeget, ak kosas Rwandetap ne yetunennyi.

¹⁶ Ki igoochi koam ng'etkonda amu kamuktaik che teer, kitach eng' kanamonik che kiwechei.

¹⁷ Ki eng'ji tiseiywek oik, che ma Kamuktaindet, kamuktaik che ki ma kongen, che ki piitu let, Che ki ma koywei kwanisyekwok.

¹⁸ Mebwaati Rwandet ne kwandang'ung', Ki iutye Kamuktaindet ne kisichin.

¹⁹ Ki keer anyun `Kamuktaindet ne Toroor ak kinereech, Amu taagetap ne kitach weeriikyik ak tiibiikyik.

²⁰ Ak ki le, “Aung'e togeennyu, Ageere ole teptoi kagesunennywa; Amu icheek ko ibinda ne imaasat miising'. Lagok che ma tinyei kayaneet.

²¹ Ki koono ng'etkonda eng' otetap che ma Kamuktaindet; Kitacha eng' tangoitanywa: Ara anyun nguno ko kagoochi icheek ng'etkonda eng' che ma poror; Atache icheek eng' pororyet ne abusat.

²² Amu kalal maat ne po nereegekyuk, ak lalei agoi keriinget ne loo miising', si kobeel ng'wony kobooto ruratennyi, ak kobeel ole tonone tuloonook.

²³ Atesyini yaitwogik; Ak amwoge icheek kipchabonikyuk:

²⁴ Sagitos eng' rubeet, Kibeelei eng' maat ne koroom, ak ng'emisyet ne ng'waan. Ayookyini kelegap tyong'ik, kobooto ng'wonetap che ichuutegei ng'wony che po temburyek.

²⁵ Eng' ole po saang', korebisyei rotwetap chok, ak eng' ko, kobiitu kamuiset; Parei muren ak pergeiyat, Ne chuchuni ak chiito ne po kalwalek.”

²⁶ Ki ale, “Aiyestochini ole loo, agoochini kogeskei kabwaatennywa eng' piik.

²⁷ Nda ki ma aiywei tagisyetap puunyoot, Si ma ibwaat puunikwak perberyo, ak komwa kole, ‘Kagotororit eunnyo, ak ma yai Kamuktaindet ne Toroor chooto tugul.’ ”

²⁸ Amu icheek ko pororyet ne ma tinyei korwooch, Ama tinyei kaguiyet.

²⁹ Nda ka utaatiin, ta konaei niito, Ak kobwaat kagesunennywa!

³⁰ Kotos imuktoi ano koon `chii agenge eliphuut, ak koon `piik aeng'u eliphuusyek taman, nda ki ma alda `Ruandennywa icheek, ak kogoito `Kamuktaindet ne Toroor icheek?

³¹ Amu ma uu rwandennywa rwandennyo, ak kongen ak icheek puunikyok kole uu nooto.

³² Amu ketinnywa ne po sabibuk kobunu keetitap Sodom, ne punu mbareenigap Gomorah; murmuri piich sabibukwak, ak ko ng'woneen sabibukwak.

³³ Uu `divaikwak ng'wonetap maswetisyek, ng'wonet ne koroom ne po erenook.

³⁴ “Tos ma konorotiin eng' oldanyu chuuto, Ki king'ooch kobooto konoraikyuk?

³⁵ Nenyu mugetuut ak kageeret. Neegit peetuut ne kagochabaita keelyekwak: Karik peetuutap nyalildanywa, ak chogu tuguuk che pwaanjin icheek.

³⁶ Eng' iman ko irwookyinechin `Kamuktaindet ne Toroor piikyik, ak koriir moo agobo otwogikyik, ye keer kole kagowandagei kimnateennywa, Ama mi ne kong'et ne rataat anan ne ma rataat.

³⁷ Yeityo koteep kole, ‘Mi ano kanamonikwak, rwandet ne ki imang'u?’

³⁸ Mi ano nguno kamuktaichooto ki amei mwanigap tiseiywekwak, che kieei divaik che po kagoochinennywa ne kieei? Ingong'eetyo chooto kotoretook, Ingoek icheek che omwechini.

³⁹ Ogeer anyun nguno ole anee, ko aa ineendet iman, Ma mi kamuktain, ami aneege. Abare ak asoobi; Ki aguoten ak ki anyaa: Ak ma mi ne imuuchi kosar eng' eunnyu.

⁴⁰ Amu kanamji eunnyu kipsengwet, Ak ale, ‘Ko uu ye asabe koigeny,

⁴¹ Ngalit rotwennyu po chok ne ilyeli, ak konam eunnyu kirwooget, ayaakyini mugetuut puunikyuk, ageerchini che wecho.

⁴² Agoochini kipchabonikyuk kobogite korotiik, ak koam panyeek rotwennyu ne po chok; kobooto korotiigap che ki kibar ak che ki kiluul, eng' metowegap kandoigap puunik.’ ”

⁴³ “Oboiboitu okweek pororyosyek, kobooto piikyik: amu yaaktoi mugetuut che po korotiigap otwogikyik, yaakyin mugetuut puunikyik, Ak koyai kagaigaet agobo emennyi ak piikyik.”

⁴⁴ Ki nyo anyun Musa ak Hoshea weeriitap Nun ak komwachi piik ng'aleek tugul che po tyeni kogas eng' itiikwak.

Kotigoni `Musa piik

⁴⁵ Ye kingo kes `Musa ng'aleechu tugul che komwachin Israel tugul,

⁴⁶ koleenji, “Onde mugulelwekwok ng'aleechu tugul kabaoryanwok ra; che tuun ong'ate lagokwok koriip koyai ng'aleek tugul che po ng'atuutyoni.

⁴⁷ Amu ma tangoi eng' okweek ni ak ko saboondang'wong'. Otese peetuusyekwok eng' emet ole obendi olandoe Jordan oname kobunjook amu niito.”

⁴⁸ Ki mwachi `Kamuktaindet ne Toroor Musa peetuunooto, koleenji,

⁴⁹ “Togoste tulwooni po Abarim, agoi tulweetap Nebo ne mi emetap Moab, ne tokyingei Jeriko, si igeer emetap Kanaan ne agoochini piigap Israel kobunji.

⁵⁰ Si imechi tulweet ole itogosyini ak kiyumin kobooto piiguk, ko uu ye ki mechi Aron ng'eetap kamenng'ung' tulweetap Hor ak ki kiyum kobooto piikyik.

⁵¹ Amu ki ongelelja eng' kwenutap piigap Israel eng' peegap Meribah ne po Kadesh eng' surkwen ne po Sin; amu ki ma ogonyita eng' kwenutap piigap Israel.

⁵² Igeere emet eng' taing'ung', ago meite olooto, emenooto ne agoochini piigap Israel.”