NG'ATUTIK 31 - BUKUIT NE TILIIL Sireet ne Dutero Kanon

Konamei Joshua poisyetap Musa

¹ Ki wo Musa anyun komwachi Yahudik tugul ng'aleechu.

² Koleenji, “Kobooch ra ko kenyiisyekyuk ko pogol ak tiptem. Ma amuuchi amanda ak among'u. Kogeny, ko ki koleenjo Kamuktaindet ne Toroor, ‘Melandoe Jordan-ini.’

³ Kamuktaindet ne Toroor Kamuktaindeng'ung' ineendet ne landoi kondoenen si kobar pororyosyechu mi taing'ung' ak inam icheek. Landoi Joshua kondoenen ko uu ye ki mwa Kamuktaindet ne Toroor.

⁴ Yachin `Kamuktaindet ne Toroor pororyosyechu ko uu ye ki yachi Sihon ak Og, laitorinigap Amorik ak emennywa che king'em.

⁵ Indewok `Kamuktaindet ne Toroor icheek eunekwok eng' taing'wong' ak oyachi pichooto ko uu ng'atuutyet komugul ne ki ang'ataak.

⁶ Ogimegitu, onyiganitu, amoiywei anan oaragense amu icheek. Amu wendi Kamuktaindet ne Toroor Kamuktaindeng'ung' kobooten ago ma metoin ineendet ama pagaaktoin.”

⁷ Yeityo koguur `Musa Joshua, ak koleenji eng' taitap Yahudik tugul, “Kimitu, nyiganitu. Amu obendi kobooto pichu oite emet ne ki iyasyechi `Kamuktaindet ne Toroor kwanisyekwok kole igoochin ak igoochini icheek konyaban.

⁸ Ineendet Kamuktaindet ne Toroor ne indoenen ak mi kobooten, amemetoin, ama pagaaktoin ameiywei anan iaragen.”

Kabwaatetap ng'atuutyet eng' kenyiit age tugul ne po tisap

⁹ Ki sir anyun `Musa ng'atuutyoni ak kogoochi tisiik weeriigap Lawiik che ki ibei moinget ne po arorutyetap Kamuktaindet ne Toroor ak poisyek tugul che po Israel.

¹⁰ Yeityo kong'at `Musa pichooto koleenji, “Kenyiit age tugul ne igeesunegei kenyiitap tisap eng' peetuut ne ki king'at ne po kenyiit ne po katyaget eng' igoorto ne po keryosyek,

¹¹ ye kabwa Israel tugul koboorgei eng' taitap Kamuktaindet ne Toroor Kamuktaindeng'ung' eng' ole tuun leweni, isoman anyun ng'atuutyoni eng' taitap Israel tugul kogas.

¹² Iyum piik, murenik, kwonyiik, lagok ak toondeng'ung' ne mi kurgotiguk, si kobiit kogas ak koneetkei si koywei Kamuktaindet ne Toroor Kamuktaindeng'wong' ak koriip koyai ng'aleek tugul che po ng'atuutyoni.

¹³ Oyai niito si kogas lagokwak che tomo konai ak koneetkei koywei Kamuktaindet ne Toroor Kamuktaindeng'wong' peetuusyek tugul kotee osaptosi eng' emet ne olandoe Jordan obendi oname.”

¹⁴ Ki leenji Kamuktaindet ne Toroor `Musa, “Keero, kagoriik peetuut ne imee. Ara kuur Joshua anyun ak obe otononse eng' emait ne kituiyechin, si ang'at ineendet.” Ki pa anyun Musa ak Joshua, kotononso eng' emaitap tuiyet.

¹⁵ Ak ki took Kamuktaindet ne Toroor eng' Emait eng' toloitap pooldet. Kitonone toloitap pooldet kurgeetap Emait.

¹⁶ Yeityo koleenji `Kamuktaindet ne Toroor Musa, “Keero, neegit si iru kobooto kwanisyeguk. Ago ye iru, kong'eetyo pichu koibotkei ak kanamonik che po pororyosyek alak che po emet ole pendi kotebee kwenunnywa, kobagaakta ak kobut kayomisennyu ne ki kiyomiske ak icheek.

¹⁷ Ye ai ko uu nooto kolalei anyun nereeknatennyu eng' peetuunooto agobo icheek ak abagaakte, auny togeennyu ak kiwong' icheek. Pwaanjin icheek yaitwogik ak nyalilwogik che chaang' ak kole eng' peetuunooto, ‘Tos ma pwanjech yaitwogichu amu ma mi Kamuktaindennyo kobootech?’

¹⁸ Aunye iman togeennyu peetuunooto amu yaitwogik tugul che ki yai amu kaweektagei koot kanamonik.”

¹⁹ “Osirchigei anyun nguno tyeni, si ineet piigap Israel. Inde kutusweekwak si koek paoryandennyu tyeni agobo piigap Israel.

²⁰ Amu ye kaamut koit emet ne ki ayosyechi kwanisyekwak, nooto nyiitaat cheego ak komi kumyat eng' chaang'indo ak ye kagoamis kobiyong'so ak koneryo, koweektagei anyun ole mi kanamonik koba koot, kosasa ak kobut kayomisennyu.

²¹ Ye tuun kagobwonji yaitwogik che chaang' ak nyalilwogik, kobaoryan anyun tyeni eng' tainnywa ko uu paoryat. Amu ma utye iyotennywa eng' kutusweekwak. Amu agot nguno angen kabwaatutikwak che ibwaati, kotom amut koba emet ne ki ayosyechi.”

²² Ki sir anyun `Musa tyeni peetuunooto ak koneet piigap Israel.

²³ Ki igoochi anyun Joshua weeriitap Nun ng'atuutyet ak koleenji, “Kimitu, nyiganitu. Amu imuti piigap Israel koba emet ne ki ayosyechi ak ami kobooten.”

²⁴ Ak ye kingo kagosir kogees `Musa ng'aleegap ng'atuutyoni eng' bukuit,

²⁵ kong'at `Musa Lawiik che ki ibei moingetap arorutyetap Kamuktaindet ne Toroor koleenji,

²⁶ “Oip bukuini po ng'atuutik ak onde ole neegitee moingetap arorutyetap Kamuktaindet ne Toroor Kamuktaindeng'wong', si kotebee olooto koek paoryat agobo inyee.

²⁷ Amu angen ngelelnateng'ung' ak uuindap kaating'ung'. Ogeero, kongelelji Kamuktaindet ne Toroor kota asabe ami kobootok peetuuni. Oyae anyun ne tya ye kaamei?

²⁸ Oyumwa poisyek tugul che po ortinwekwok ak kiptainikwok kobwa yu ami si amwachi ng'aleechu koba itiikwak, aguur kipsengwet ak ng'wony kobaoryan agobo icheek.

²⁹ Amu angen ale ye kaamei ong'emge miising' kot, omastoi eng' ooreet ne ki ang'ataak ak koityok yaityet eng' peetuusyek che po let. Amu omache oyai yaityet eng' taitap Kamuktaindet ne Toroor otach ineendet amu poisyonigap eunekwok.”

Tyendap Musa

³⁰ Kityenji anyun `Musa tuiyet komugul ne po Israel ng'aleegap tyeni tugul ak ki kas icheek komyee.