NG'ATUTIK 30 - BUKUIT NE TILIIL Sireet ne Dutero Kanon

Sigunet ak nyoetap kaat

¹ “Ye pwaanjin anyun tuguuchu tugul ki ande taing'ung'; perurto ak chubisyet, ak ingibwaat anyun eng' kwenutap pororyosyek tugul ole ki koonjin Kamuktaindet ne Toroor Kamuktaindeng'ung',

² ak ngiweekyigei Kamuktaindet ne Toroor Kamuktaindeng'ung', igas iit kutinnyi ko uu tugul che kang'atiin rani inyee ak lagoguk eng' muguleldang'ung' komugul eng' saboondang'ung' komugul,

³ kowal anyun Kamuktaindet ne Toroor Kamuktaindeng'ung' luuleet ne ki kiluulin ak korirenen ak koweek koyumin eng' pororyosyek tugul ole ki iyestoochin Kamuktaindet ne Toroor Kamuktaindeng'ung'.

⁴ Ngo mi che ki iyestoochi tabanwegap kipsengwet, koyumin ak komutun eng' olooto Kamuktaindet ne Toroor Kamuktaindeng'ung'.

⁵ Imutyin `Kamuktaindet ne Toroor Kamuktaindeng'ung' emet ne ki po kwanisyeguk si kobunjiin ak koyaun ne myee, kotesin ichaang'itu isiir kwanisyeguk.

⁶ Imuratani `Kamuktaindet ne Toroor Kamuktaindeng'ung' muguleldang'ung' ak mugulelwegap iyoteng'ung', si icham Kamuktaindet ne Toroor Kamuktaindeng'ung' eng' muguleldang'ung' komugul ak eng' saboondang'ung' komugul si isap.

⁷ Indoi `Kamuktaindet ne Toroor Kamuktaindeng'ung' chubisyosyechu tugul puuniguk ak eng' icheek che wechin che kiusin.

⁸ Ak iweege igas iit kutitap Kamuktaindet ne Toroor ak iyai ng'atuutikyik tugul che ang'atiin rani.

⁹ Yain `Kamuktaindet ne Toroor Kamuktaindeng'ung' iegu ne tinyei chaang'indap perurto eng' poisyonik tugul che po euneguk, eng' iyoteng'ung', eng' iyoteetap tuguuk ak eng' ruroteetap emeng'ung'. Amu tuun poiboitunenen Kamuktaindet ne Toroor kogeny koyaun ne myee, ko uu ye kibaibaitune kwanisyeguk,

¹⁰ ngigas iit kutitap Kamuktaindet ne Toroor Kamuktaindeng'ung', iriip ng'atuutikyik ak kaneetisyosyekyik che siraatiin eng' bukuini po Ng'atuutyet. Pabaitunenen ngiweekyigei Kamuktaindet ne Toroor Kamuktaindeng'ung' eng' muguleldang'ung' komugul ak eng' saboondang'ung' komugul.

¹¹ “Amu ma uui miising' eng' inyee ng'atuutyoni kaang'atiin rani ama loo.

¹² Ma mi kipsengwet ne imuuch iteep ile, Ng'oo ne togostoiywech kipsengwet si koibwech ak kogoonech kegas si keyai?

¹³ Ama mi nyanjet pitoniin ne tos imwa ile, ‘Ng'oo ne landoi eng' nyanjet si koibwech ak kogoonech kegas si kobiit keyai?’

¹⁴ Ago neegiteenen ng'olyoondoni miising', miitei kuting'ung' ak muguleldang'ung' si kobiit iyai.

Lewenetap meet ak saboondo

¹⁵ “Keero, kande rani taing'ung' saboondo ak myeeindo, meet ak yaityet.

¹⁶ Amu kaang'atiin rani ale icham Kamuktaindet ne Toroor Kamuktaindeng'ung' iwendote ortinwekyik, iriip ng'atuutikyik ak kaneetisyosyekyik ak kirwoogutikyik si isap itesage, si koberuurin Kamuktaindet ne Toroor Kamuktaindeng'ung' eng' emet ne iwendi iname.

¹⁷ Ago ngo masta muguleldang'ung' amecham igas, ago ngichuutin iwe isaa kanamonik ak ioot,

¹⁸ aboorwok rani ale olustosi iman ak koma chaang'itu peetuusyekwok eng' emet ole olang'jini eng' Jordan iwendi inam.

¹⁹ Kaaguur kipsengwet ak ng'wony kobaoryanjok rani ale, kande taing'ung' saboondo ak meet, kaberuret ak chubisyet. Lewen saboondo anyun, si isap, inyee ak iyoteng'ung'.

²⁰ Cham Kamuktaindet ne Toroor Kamuktaindeng'ung', kas iit kutinnyi ak onamgei ak ineendet. Amu ineendet saboondang'ung' ak kooindap peetuusyeguk, si kobiit imeny emet ne ki iyasyechi `Kamuktaindet ne Toroor kwanisyeguk Abraham, Isak, ak Jakobo kogoochi.”