NG'ATUTIK 29 - BUKUIT NE TILIIL Sireet ne Dutero Kanon

Kayomiset eng' Moab

¹ Chu ng'aleegap kayomiset ne ki ng'at `Kamuktaindet ne Toroor Musa koyai kobooto piigap Israel eng' emetap Moabik, kotese kayomiset ne ki iyomiskei ak icheek eng' Horeb.

² Ki kuur `Musa Yahudik tugul ak koleenji, “Ki ogeer tugul che ki yachi `Kamuktaindet ne Toroor Pharaoh, otwogikyik tugul, ak emennyi tugul eng' emetap Misiri eng' taing'wong'.

³ Ki keer konyeguk tyemuutik che eecheen, kaboorunoik ak kwang'utik che eecheen.

⁴ Ago kitom kogoonok `Kamuktaindet ne Toroor muguleldo ne oguiye anan koonyek che ogeere anan itiik che ogase, agoi rani.

⁵ “Ki andoiywok eng' kenyiisyek artam eng' surkwen. Eng' kenyiisyek chooto tugul koma osegitu ngoroik che olaachi ama osegitu kweoniguk eng' kelyekwok.

⁶ Ma oam magatiinik ama oee divaik anan maiyek: si kobiit onai ole aa Kamuktaindet ne Toroor Kamuktaindeng'wong'.

⁷ Ak ye kingo itu oli, kobokyech Sihon laitoryatap Hesbon ak Og laitoryatap Bashan ak ki kibar laitorinichooto,

⁸ ak ki kinam emennywa ak ki kigoochi piigap Reuben, che po Gad ak kebebertap ooreetap Manasseh koek poroteet.

⁹ Oriip anyun ng'aleegap kayomisoni ak oyai, si kiberuurok eng' tugul che oyae.

¹⁰ “Otonondosi ra okweek tugul eng' taitap Kamuktaindet ne Toroor Kamuktaindeng'wong', kandoigap ortinwekwok, poisyek ak kiptainikwok agot murenik tugul che po Israel,

¹¹ lagokwok, osotikwok, ak toondeng'wong' ne miitei nganasokwok kobooch ne murmuri kweniguk agoi ne siilei peeguk.

¹² Si kobiit oarorchigei ak Kamuktaindet ne Toroor Kamuktaindeng'wong' ak kayosyennyi, ne yaei Kamuktaindet ne Toroor Kamuktaindeng'wong' kobooten rani.

¹³ Si kogimitin rani iegu pororyennyi ak koek Kamuktaindeng'ung', ko uu ye kimwaun ak ko uu ye ki iyasyechi kwanisyeguk, Abraham, Isak ak Jakobo.

¹⁴ Ma yamisok okweegei eng' kayomisoni ak kayasyoni,

¹⁵ ago kobooto ineendet agine ne ma mi kobootech rani.

¹⁶ Amu ongen ole ki kiteptoi eng' emetap Misiri ak ole ki kibwanunde eng' kwenutap pororyosyek che ki obun kwenunnywa.

¹⁷ Ki ogeer tuguukwak che kiwechei ak kanamonikwak, keetiik ak koik, fedha ak thahabu, che ki mi kwenunnywa.

¹⁸ Si ma piit chii eng' okweek mureno anan kwondo, anan kapchii, anan ooreet, ne mastoi muguleldanyi rani kobagaakta Kamuktaindet ne Toroor, Kamuktaindennyo kwo koot kanamonigap pororyosyechooto si ma piit eng' okweek tigityotap ng'wanindo ak ng'wonet.

¹⁹ Ye kas ng'aleegap chubisyoni, koberuurgei eng' muguleldanyi kole, atebye eng' kaalyeet agot ngawendoti eng' ngelelnatetap muguleldanyu; tesei melelda pogitet.

²⁰ Ma metoi Kamuktaindet ne Toroor chiichooto ago iyenjin chiichooto nereegek ak ng'etkonda che po Kamuktaindet ne Toroor ak kotebee chiichooto chubisyoni tugul ne ki kisirchi kitabuuni ak kobukto Kamuktaindet ne Toroor kainennyi eng' kurereetap kipsengwet.

²¹ Ibesye anyun `Kamuktaindet ne Toroor chiichooto ortinwek tugul che po Israel kobunji yaityet, ko uu chubisyosyek tugul che po kayomiset ne ki kisirchi bukuiniito po Ng'atuutik.

²² Yeityo kogeer ibinda ne piitu, lagokwok che piitu let eng' okweek ak toondet ne punu emet ne loo, korotwek che po emonooto ak myanwogik che ki igoochi Kamuktaindet ne Toroor komionso.

²³ Keerei kole ki kowalak emet komugul koek tuguuk che laldos ak muunyuk, kot koma kegolei ama koiyei ama kobite suswo. Kergeitu ak ng'emisyetap Sodom ak Gomorah, Adma ak Seboim che king'em `Kamuktaindet ne Toroor kowong' eng' nereegekyik ak eng' nyitatennyi.

²⁴ Teebegei anyun pororyosyek tugul koleen, ‘Amu nee si koyachi Kamuktaindet ne Toroor ko uu ni emoni? Ibooru nee mai po nereegechu ng'woneen?’

²⁵ Kole anyun piik, ‘Amu ki pagaakta kayomisetap Kamuktaindet ne Toroor, Kamuktaindetap kwanisyekwak ne ki yai kobooto icheek ye ki imutu komong' eng' emetap Misiri.

²⁶ Ki pa koot kanamonik ak kogutung'ji che ki ma kongen ak che ki ma chamji ineendet.

²⁷ Ki lal anyun nereeknatetap `Kamuktaindet ne Toroor amu nooto agobo emoni ak koipchi chubisyosyek tugul che ki kisirchi bukuini.

²⁸ Ki itut `Kamuktaindet ne Toroor icheek komong' eng' emennywa eng' nereegek, eng' nyitatet ak eng' ng'wanindo ak koonji emet age ko uu rani.’ ”

²⁹ Po Kamuktaindet ne Toroor, Kamuktaindennyo tuguugap ung'oot: ago chechook ak lagokyok koigeny tuguuk che ng'ang'atiin, si kobiit keyai ng'aleek tugul che po ng'atuutyoni.