NG'ATUTIK 26 - BUKUIT NE TILIIL Sireet ne Dutero Kanon

Konunoigap kesuutik

¹ “Ye kaiit emet ne koonin Kamuktaindet ne Toroor Kamuktaindeng'ung' koek poroteet kobunjiin ak imeny olooto,

² inam anyun eng' tongoanik tugul che po logoek che po emet che iibu eng' emeng'ung' ne koonin Kamuktaindet ne Toroor Kamuktaindeng'ung' ak inde kitonget yeityo iip koba ole leweni Kamuktaindet ne Toroor Kamuktaindeng'ung' kondai kainennyi.

³ Iwendi anyun ole mi tisiindet ne mi eng' peetuusyechooto ak ileenji, ‘Aboorchini rani Kamuktaindet ne Toroor Kamuktaindeng'ung' aleenjini, kaitu emet ne ki iyasyechi Kamuktaindet ne Toroor kwanisyekyok kole koonech.’ ”

⁴ “Yeityo koip tisiindet kitonget eng' eung'ung' ak konde taitap kaptisisyetap Kamuktaindet ne Toroor Kamuktaindeng'ung'.

⁵ Ak iwolu eng' taitap Kamuktaindet ne Toroor Kamuktaindeng'ung' ile, ‘Ki Syrianindet abba ne kiuoti ne kichoortagei kwo Misiri ak komeny olooto ak ye kimatyanit koek ineendet pororyet ne oo eng' olooto, kochang'a ak kogimegiitu miising'.

⁶ Kingo yaiywech ne ya Misiriik, konyalilech ak koratyech poisyet ne nyigiis,

⁷ keriirchi Kamuktaindet ne Toroor, Kamuktaindetap kwanisyekyok ak ki kas kutinnyo. Ki keer nyalildanyo ak pirtoennyo pogei ak sastaet ne ki kisastaenech.

⁸ Ara ki imoong'wech anyun Kamuktaindet ne Toroor eng' Misiri, eng' euut ne kiim, eng' euut ne chuulaat, eng' kamuiset ne oo ak eng' kaboorunoik ak kwang'utik.

⁹ Ki komutwech keitu olito ak ki koonech emoni nyiitaat cheego ak komi kumyat eng' chaang'indo.

¹⁰ Nguno anyun ko kaibu tongoanik che po logoek che po emet ne ki igoono inyee Kamuktaindet ne Toroor.’ Yeityo inde ng'wony eng' taitap Kamuktaindet ne Toroor Kamuktaindeng'ung' ak ilasu Ineendet.

¹¹ Ak ibaibaitu eng' myeeindo tugul ne kigoonin Kamuktaindet ne Toroor Kamuktaindeng'ung' inyee ak koong'ung' Lawindet ak toondet ne mi kwenung'ung'.

¹² Ye kainemu iges kebeberwek che po taman che po kebeberwegap rurateng'ung' eng' kenyiit ne po somok, nooto kenyiit ne kigoitoe kebeberta igoochi chooto anyun Lawindet, toondet, ne ma tinyei sigiik ak mosoget, si koamis eng' kurgotiguk kobiyong'so.

¹³ Yeityo imwa eng' taitap Kamuktaindet ne Toroor Kamuktaindeng'ung' ile, ‘Kaanemu eng' koonnyu tuguuk che itabaanatiin agoochi agine Lawindet, toondet, ne ma tinyei sigiik ak mosoget, ko uu ng'atuutyeng'ung' tugul ne ki ing'ata. Ma abistoe ng'atuutiguk alak tugul, ama autye.

¹⁴ Ma aam tuguuchooto eng' riirekyuk ama aiste alak eng' chooto aboisyee eng' poisyet ne ma tiliil, ama agoite amu che ki kobek, ago ki agas iit kutitap Kamuktaindet ne Toroor Kamuktaindennyu ak ki ayai ko uu tugul che ki ing'ata.

¹⁵ Keer anyun ng'wony eng' meng'ooteng'ung' ne tiliil, eng' kipsengwet ak iberuur piiguk Israel ak emet ne nyiitaat cheego ak komi kumyat eng' chaang'indo ne ki igoonech ko uu ye ki iyasyechi kwanisyekyok.’

Piigap Kamuktaindet ne Toroor

¹⁶ “Kang'atiin rani Kamuktaindet ne Toroor Kamuktaindeng'ung' iyai kaneetisyosyechu ak kirwoogutichu. Riip anyun ak iyai eng' muguleldang'ung' komugul ak eng' saboondang'ung' komugul.

¹⁷ Keng'aany rani Kamuktaindet ne Toroor ile, ineendet ko Kamuktaindeng'ung' ak ile kanyool iwendote ortinwekyik ak iriip kaneetisyosyekyik, ng'atuutikyik kirwoogutikyik ak igas iit kutinnyi.

¹⁸ Kang'aany Kamuktaindet ne Toroor rani kole, ii pororyet ne ki kitabaanin iegu nenyi, ko uu ye ki iarorun ak si kobiit iriip ng'atuutikyik tugul,

¹⁹ ak koyain itororitu isiir pororyosyek tugul che ki yai ineendet, eng' kalasunet ak kainet ak teegisto, si iegu pororyet ne tiliil eng' Kamuktaindet ne Toroor Kamuktaindeng'ung', ko uu ye ki mwa.”