NG'ATUTIK 21 - BUKUIT NE TILIIL Sireet ne Dutero Kanon

Ng'atuutik agobo rumisyet

¹ Ngo piit muusto eng' timiin ne ki kibarei eng' emet ne koonin Kamuktaindet ne Toroor Kamuktaindeng'ung' kobunjiin ama ki nai ne kibarei,

² Ko ingomanda anyun poisyeguk ak kirwoogiguk ak kobiman kong'etee ole mi muusto agoi nganasook che mi komoswek tugul.

³ Ingokweri anyun poisyegap nganaseet ne neegitee muusto rooryat ne punu akweet ne tomo kobois ak ko ne tomo keratyi chogit,

⁴ kwo atebweet ne roote peek ne tomo kibat anan kegol ak koiiny kaatitap rooryandanooto eng' atebwonooto.

⁵ Yeityo koriikta yooto tisiik weeriigap Lawi. Amu chooto che ki lewen Kamuktaindet ne Toroor Kamuktaindeng'ung' koboisyechi ak koberuuris eng' kainetap Kamuktaindet ne Toroor ak tebyei ko uu ng'olyoonnywa kiit age tugul ne kagimoitos ak pireet age tugul.

⁶ Yeityo koun eunekwak poisyek tugul che po nganasanooto neegitee muusto eng' paragutap rooryandanooto kagiiny kaatit eng' atebweet.

⁷ Ak komwa kole, “Ma tumda eunekyok korotichu ama keer konyekyok ne kobare.

⁸ Ee Kamuktaindet ne Toroor, nyochi kaat piiguk Israel che ki ityaach, amengotebee kwenutap piiguk Israel korotiik che ma tinyei tengek. Ak kobiit nyoetap kaat amu tengektap korotiik.”

⁹ Ye keyai ne nyolu eng' taitap Kamuktaindet ne Toroor, iste ko uu nooto anyun korotiik che ma tinyei tengek eng' kwenung'ung'.

¹⁰ “Ye kewe obargei ak puuniguk ak konde euneguk `Kamuktaindet ne Toroor Kamuktaindeng'ung' ak imut koek luulenik,

¹¹ ak ngigeer eng' kwenutap luulenichooto kwondo ne karaaran ak imach ineendet imutyigei koek osotyondeng'ung',

¹² imut anyun kwo koong'ung', konem metinnyi ak korar siyookyik

¹³ ak kolakta ngoroik che ki kiluuldoi. Ye kagotebee koong'ung' anyun ak kagoriirchi kwandanyi ak kamennyi arawet agenge komugul, iwe ole mi iegu manong'otyondennyi ak koek ineendet osotyondeng'ung'.

¹⁴ Ngo mecham ineendet imete kwo ole machei. Ago amat ialde eng' silingisyek, ameyachi ko uu ye iyachini otwogindet amu koinyeeree ineendet.

¹⁵ “Ngo tinyei chii osotik aeng' ak kochamei age ko usei age ago ngo ki kosikyi lagok tuwai; chamaneet ak chepkinyaryat; ago ngo kisip kosich ne sasei weeriit,

¹⁶ ko eng' peetuut ne pchechin chiichooto weeriikyik tuguukyik, ko matkogachi koeet weeriitap chamaneet kosiir weerooto oo kisichei osotyot ne ma ki chamei.

¹⁷ Kanyool koyani kole weeriit ne oo weeriitap ne ma chamei ak kogochi ineendet kebeberwek aeng' eng' tugul che tinyei. Amu ineendet taunetap kimnateennyi chechiik tuguuk che nyoljin weeriit ne oo.

¹⁸ “Ngo tinyei chii weeriit ne uui met ak ko ngelelyo ne ma kase iit kutitap kwan anan kamet, agot ngo tigoon koma kase iit;

¹⁹ konam anyun kwandanyi ak kamennyi, ak komutyi poisyegap nganasennyi agoi ormariichetap oldanyi,

²⁰ ak koleenji poisyegap nganasennyi, ‘Uui met weeriinnyo ak ko ngelelyo ma kaseech iit: kipkeiya ak ko kibogityo.’

²¹ Ye Ibata kolage koik murenik tugul che po nganasennyi agoi kome. Iste anyun yaityet ko uu nooto eng' kwenung'ung' si kogas Israel tugul ak koywei.

Ng'atuutik che teer teer

²² “Ngo yai chii tengekto ne nyoljin meet ak kebar ak isonginin eng' keetit,

²³ ko mat kotebee muusto keetit parak agoi koeech, ago kanyool itup eng' peetuunooto. Amu chuboot eng' Kamuktaindet ne Toroor ne kigartati. Si meng'wanit inyee emeng'ung' ne koonin Kamuktaindet ne Toroor Kamuktaindeng'ung' koek poroteet.”