NG'ATUTIK 19 - BUKUIT NE TILIIL Sireet ne Dutero Kanon

Nganasook che kimwechin

¹ Ye kagoon `Kamuktaindet ne Toroor pororyosyek che nenywa emenooto koonin Kamuktaindet ne Toroor Kamuktaindeng'ung' ak inam imeny nganasookwak ak kooriikwak,

² itabaanjigei anyun nganasook somok eng' kwenutap emeng'ung' ne koonin Kamuktaindet ne Toroor Kamuktaindeng'ung' kobunjiin.

³ Chopchigei ooreet ak ipchei kiwotosyegap emeng'ung' ne koonin Kamuktaindet ne Toroor Kamuktaindeng'ung' kobunjiin koek kebeberwek somok, si komuuch komwechi chii age tugul ne karumis.

⁴ Ni ng'olyootap chiito ne karumis: ineendet ne kabar chiitap kokwennyi ne ki ma kowechei eng' peetuusyek che ki kosiirto ama nai,

⁵ ko uu ye kawo chiito timiin koep keetit kobooto chiitap kokwennyi ak ye kasut aiywet komachei koep keetit ak kochun aiywet eng' kungit kochililji chiitap kokwennyi ak kome, ko ingomwechi anyun age eng' nganasochooto si kosap.

⁶ Asi ma amu loo orte koosup ne igeeri korotiik kota kolaldos nereegekyik ak konam ak kokwer kome, nga ki ma konyaaljin meet amu ki ma kowechei ineendet eng' tai.

⁷ Kang'atiin anyun amu nooto ale, “Itabaanjigei nganasook somok.”

⁸ Ak ngo paraun Kamuktaindet ne Toroor Kamuktaindeng'ung' kiwoteng'ung' ko uu ye ki koyasyechi kwanisyeguk ak kogoonin emet komugul ne ki iarorchi kwanisyeguk kole igoochin.

⁹ Ngiriip ng'atuutyoni komugul ne kang'atiin rani ak iyai icham Kamuktaindet ne Toroor Kamuktaindeng'ung', ak iwendote ortinwekyik kotugul, ites anyun nganasook alak somok, kobooto chooto somok.

¹⁰ Si ma kitumda korotiik che ma tinyei tengek eng' emeng'ung' ne koonin Kamuktaindet ne Toroor Kamuktaindeng'ung' koek poroteet si ma namin korotichooto.

¹¹ Ago ngo wech chii chiitap kokwennyi, ak kosapchi, kong'eetyi ak kokwer kome, komwechi nganaseet age eng' chuuto,

¹² koyookto anyun poisyek che po nganasennyi kimut eng' olooto kamwechi nyoo konde eutap ne yaaktoi korotiik si kobar.

¹³ Ama ye igeer, iriiree. Ago iste korotiik che ma tinyei tengek eng' Israel si komyeeit eng' inyee.

Pirutik agobo paornateetap lembech

¹⁴ Amenaktae kiwotetap chiitap kokweng'ung' ne ki indoi piik che po keny, eng' poroteng'ung' ne inyabani eng' emet ne koonin Kamuktaindet ne Toroor Kamuktaindeng'ung' kobunjiin.

¹⁵ Amat kobaoryanji chii paoryat agenge eng' tengek age tugul anan eng' chalwok age tugul, eng' leluut age tugul ne kayai. Ago ki kimiti ng'olyoot eng' ng'aleegap paorinik aeng' anan ko somok.

¹⁶ Ngo ng'eet paoryat ne ma po iman kobaoryanji chii age tugul agobo yaityet,

¹⁷ ingotononso anyun icheek tuwai chooto ibelegei eng' taitap Kamuktaindet ne Toroor, eng' taitap tisiik ak kirwoogik che mi eng' peetuusyechooto.

¹⁸ Asi kogin kirwoogik ko ki iljigei. Ngo ma po iman paoryat amu kabaoryanji ne tupcho eng' lembech,

¹⁹ oyachi anyun ko uu ye kata machei koyachi ne tupcho. Iste ko uu nooto anyun yaityet eng' kwenung'ung'.

²⁰ Ak kogas che kong'et ak koiyweis si mata koyai yaityet ne uu nooto eng' kwenung'ung' kogeny.

²¹ Ama ye igeer, iriiree. Amu kigeere `saboondo saboondo, konda eng' konda, keldet eng' keldet, euut eng' euut ak keeldo eng' keeldo.