NG'ATUTIK 16 - BUKUIT NE TILIIL Sireet ne Dutero Kanon

Paska

¹ “Riip arawetap Abib ak iyachi Kamuktaindet ne Toroor Kamuktaindeng'ung' paska. Amu ki imoong'une `Kamuktaindet ne Toroor Kamuktaindeng'ung' eng' Misiri kemoi eng' arawetap Abib.

² Igoochi Kamuktaindet ne Toroor Kamuktaindeng'ung' tiseiywot ne po paska eng' keechiirek ak eng' tuuga eng' ole leweni Kamuktaindet ne Toroor kotebee kainennyi.

³ Ameam magatiinik che ki kinde mermereek. Am eng' peetuusyek tisap magatiinik che ma kinde mermereek, chooto magatinigap nyalilda; amu ki imang'une emetap Misiri eng' kagirgiret si ibwaat peetuut ne ki imang'une emetap Misiri kotee isabe.

⁴ Amat kegeerchin mermereek eng' komosweguk tugul eng' peetuusyek tisap, amat koeekyi panyeek che igoitoi koek kagoochinet eng' peetuut ne po tai koskoleny.

⁵ Amat ieny che po paska eng' komosta age tugul ne po kurgotiguk ne koonin Kamuktaindet ne Toroor Kamuktaindeng'ung',

⁶ kobatee eng' ole leweni Kamuktaindet ne Toroor Kamuktaindeng'ung' kotebee kainennyi, ieny eng' olooto che po paska koskoleny, ye machei kororokto asiista eng' peetuut ne ki imong'u eng' Misiri.

⁷ Iiyo anyun si iam eng' ole leweni Kamuktaindet ne Toroor Kamuktaindeng'ung' yeityo iweege karon iwe ole mi emaisyeguk.

⁸ Am peetuusyek lo magatiinik che ma kinde mermereek ak koek eng' peetuutap tisap tuiyetap kaming'inetapkei eng' Kamuktaindet ne Toroor Kamuktaindeng'ung', ne ma kiyae poisyo age tugul eng' peetuunooto.

Igoortap kesisyet

⁹ “Iityigei wigisyek tisap. Iit wigisyechooto tisap kobooch peetuut ne ketau iges peek.

¹⁰ Ye ibata wigisyechooto, iriipchi anyun Kamuktaindet ne Toroor Kamuktaindeng'ung' igoorto ne po wigisyek eng' kagoochinet ne kigoitoi eng' chamyet ne igoochini, che tee che ki iberuurun Kamuktaindet ne Toroor Kamuktaindeng'ung'.

¹¹ Ibaibaitu eng' taitap Kamuktaindet ne Toroor Kamuktaindeng'ung' inyee, weeriing'ung', cheptong'ung', otwogindeng'ung' ne muren ak ne tye, Lawindet ne mi kurgotiguk, toondet, ne ma tinyei sigiik ak mosoget, che mi kobooten eng' ole leweni Kamuktaindet ne Toroor Kamuktaindeng'ung' kotebee kainennyi.

¹² Nyolu ibwaat ile ki ii otwogindet eng' Misiri ak riip anyun kaneetisyosyechu ak iyai.

Igoortap kooriik

¹³ “Ye kaiyum tuguuk che punu rwanyung'ung' ak che punu ole kitue sabibuguk, iyai igoortap kooriik eng' peetuusyek tisap.

¹⁴ Paibaitu eng' igoortang'ung', inyee ak weeriing'ung' ak cheptong'ung', otwogeng'ung' ne muren ak ne tye, Lawindet, toondet, ne ma tinyei sigiik ak mosoget che mi nganasooguk.

¹⁵ Riipchi Kamuktaindet ne Toroor Kamuktaindeng'ung' igoorto eng' peetuusyek tisap eng' ole leweni Kamuktaindet ne Toroor. Amu iberuurun Kamuktaindet ne Toroor Kamuktaindeng'ung' tuguuk tugul che inyooru, ak poisyonik tugul che po euneguk ak ibaibaitu miising'.

¹⁶ “Ingobwa mureniguk tugul taitap Kamuktaindet ne Toroor Kamuktaindeng'ung' konyil somok eng' kenyiit eng' ole leweni ineendet eng' igoorto ne po magatiinik che ma kinde mermereek, eng' igoortap wigisyek ak eng' igoortap keryosyek. Amat kobwa taitap Kamuktaindet ne Toroor ak euut puch.

¹⁷ Ingogoito chii age tugul ko uu ye imuuchi, ne tee kaberuretap Kamuktaindet ne Toroor Kamuktaindeng'ung' ne kigoonin.

Kaaroret agobo imanda

¹⁸ “Inde kirwoogik ak pounik kurgotiguk tugul che koonin Kamuktaindet ne Toroor Kamuktaindeng'ung' ko uu ortinweguk si korwookyi piik eng' kirwooget ne po imanda.

¹⁹ Amemaas kirwooget. Ametiytiy piik anan itaach che po kagaigaet, amu kerei konyegap che tinyei utaatyet tuguuk che po kagaigaet, ak kogunuuri ng'aleegap che po imanda.

²⁰ Isup che po imanda kityo, si isap ak inyaban emet ne koonin Kamuktaindet ne Toroor Kamuktaindeng'ung'.

²¹ “Amat iminji keetit age tugul ne po Asera ole neegitee kaptisisyetap Kamuktaindet ne Toroor Kamuktaindeng'ung' ne tuun iteekyinigei.

²² Amat iteech toloiwagap kanamonik, amu wechei `Kamuktaindet ne Toroor Kamuktaindeng'ung'.