NG'ATUTIK 15 - BUKUIT NE TILIIL Sireet ne Dutero Kanon

Kenyiitap katyaknateet

¹ “Ye igeskei kenyiit age tugul ne po tisap ichop katyaget.

² Ak uu ni katyagonooto: ingobagaakta age tugul ne yaaksei tugul che ki kobesendochi chiitap kokwennyi, amat koyaach chiitap kokwennyi anan ne tupcho. Amu kagemwaita katyaknatetap Kamuktaindet ne Toroor.

³ Imuuchi iyaach punootyot, ago ityaach kiy age tugul ne neng'ung' ne tinyei ne otupche.

⁴ “Ma piitunenen kibananook, amu iberuurin iman Kamuktaindet ne Toroor eng' emet ne koonin imeny koek poroteng'ung',

⁵ ngigiilgei igas kutitap Kamuktaindet ne Toroor Kamuktaindeng'ung' ak igeer iman ile keyai ng'atuutichuuto tugul kang'atiin rani.

⁶ Amu iberuurin Kamuktaindet ne Toroor Kamuktaindeng'ung' ko uu ye ki iarorun ak ibesendochi pororyosyek che chaang', ago mebeseni. Ibou pororyosyek che chaang', ama poun.

⁷ “Ngo mi kibanania kwenung'wong' ne po tupchosyeguk eng' nganaseet age ne mi age eng' kurgotiguk ne mi emeng'ung' ne koonin Kamuktaindet ne Toroor Kamuktaindeng'ung', ko mat iuuiit muguleldang'ung', anan imumut eung'ung' eng' ne otupche ne kibanania.

⁸ Ago ng'aang'ji eung'ung' iman, igoochi kobesen che yamei rerunaikyik che tee che machei.

⁹ Riipkei si ma piitune muguleldang'ung' kabwaatutyet ne ya, ile, ‘Kagoneegitit kenyiitap tisap, kenyinooto po katyaget.’ Mekany koyait kondang'ung' eng' ne otupche ne panan, kot ko megoochi kiy. Imuuchi koriirchi Kamuktaindet ne Toroor agobo inyee ak koek nooto tengekto eng' inyee.

¹⁰ Igoochi ineendet anyun iman, amat koyait muguleldang'ung' ye igoochini. Amu iberuurin Kamuktaindet ne Toroor Kamuktaindeng'ung' eng' ng'olyoondoni eng' poisyoniguk tugul ak eng' tuguuk tugul che iyae euneguk.

¹¹ Amu ma petos kibananook eng' emet agoi, ko kaang'atiin anyun ale, ‘Kanyool ing'aang'ji eung'ung' iman tupcheng'ung' ak cheguuk che tinyei nyalilda ak kibananoguk eng' emeng'ung'.’

Ole kiriiptoi Otwogik

¹² “Ngealdaun tupcheng'ung' Hebranindet ne muren anan ne kwondo ak koboisyeun kenyiisyek lo, imete anyun kwo eng' oldang'ung' eng' kenyiitap tisap.

¹³ Ak ye kaityaach, ko mat igany kwo puch,

¹⁴ igoochi eng' aiyebindo che po keechiireguk ak che po rwanyung'ung' ak che po ole kitue sabibuguk. Igoochi anyun ko uu ye ki koberuurin Kamuktaindet ne Toroor Kamuktaindeng'ung'.

¹⁵ Ibwaat ile ki ii otwogin eng' emetap Misiri ak ki ityaachin Kamuktaindet ne Toroor Kamuktaindeng'ung': kang'atiin anyun agobo ng'olyoondoni rani amu nooto.

¹⁶ Ago ngo leenjin, ‘Ma wendi eng' oldang'ung',’ amu chamin kobooto koong'ung' ak ko amu paibai ye mi kobooten,

¹⁷ inam kateet anyun irute itinnyi itisyi kurgeet ak koek otwogindeng'ung' koigeny. Yachi ko uu nooto agine otwogindeng'ung' ne tye.

¹⁸ Amat kouiit eng' inyee ye kemete kwo eng' oldang'ung', amu uu poisyennyi, ne kiboisyeun eng' kenyiisyek lo, poisyetap otwogik aeng' che nyooru melekto, ak koberuurin Kamuktaindet ne Toroor Kamuktaindeng'ung' eng' tugul che iyae.

¹⁹ “Itabaanji Kamuktaindet ne Toroor Kamuktaindeng'ung' eiik tugul che twatei tuuga ak mengichik ak kwesik che twatei neego. Ameboisyee eitang'ung' ne kitwatei anan itil koroorigap mengit ne kitwatei.

²⁰ Iame chooto eng' taitap Kamuktaindet ne Toroor Kamuktaindeng'ung' inyee ak piigap koong'ung', eng' kenyiit age tugul eng' ole leweni Kamuktaindet ne Toroor.

²¹ Ngo ma libwoop, ngo ng'wali anan ngo koraat, anan ngo tinyei peruut age tugul ne ya, ko matyeng'ji nooto Kamuktaindet ne Toroor Kamuktaindeng'ung'.

²² Iame eng' kurgotiguk ak koamei che ng'woneen ak che ma ng'woneen kogergeit, ko uu kenyeleet ak ko uu teweretyot.

²³ Kobatee amat iam korotiikyik; tumji chooto ng'wony ko uu peek.