NG'ATUTIK 11 - BUKUIT NE TILIIL Sireet ne Dutero Kanon

Melekwegap kaseetap iit

¹ Cham anyun Kamuktaindet ne Toroor Kamuktaindeng'ung' ak iriip kotigonennyi, kaneetisyosyekyik, kirwoogutikyik ak ng'atuutikyik kotugul.

² Onai niito ra, amu ma ng'alaaljini lagokwok che tomo konai ak tomo kogeer katigonetap Kamuktaindet ne Toroor Kamuktaindeng'wong', etunatennyi, kamuktaennyi ak eunnyi ne chuulaat,

³ kaboorunoikyik ak poisyonikyik che ki yachi Pharaoh laitoryatap Misiri ak emennyi komugul eng' kwenutap Misiri.

⁴ Kiit ne ki yachi lugeetap Misiri, paraisisyekwak ak kariisyekwak, ko uu ye ki igoochi komaaluuch peegap Araraita ne Piriir ye ki isubwok, ak ki iwong' `Kamuktaindet ne Toroor icheek ko uu nooto agoi rani.

⁵ Ma lagokwok che ki iro kiit ne kiyaiywok eng' surkwen agoi oitu yuto,

⁶ ak kiit ne ki yachi Datan ak Abiram weeriigap Eliap, weeriitap Reuben, koyaat ng'wony kutinnyi ak kolugui kobooto piikwak, emaisyekwak, tuguuk tugul che saptos che ki kweryoti icheek eng' kwenutap Israel tugul.

⁷ Ago ki kogeer konyekwok poisyonik tugul che eecheen che ki yai Kamuktaindet ne Toroor.

⁸ Oriip anyun ng'atuutyet komugul ne kaang'atak rani si ogimegitu ak oit emet ne obendi oname kobunjook.

⁹ Si kobiit kochang'a peetuusyekwok eng' emonooto, ne ki iyasyechi Kamuktaindet ne Toroor kwanisyekwok kole igoochin icheek ak iyotennywa ne piitu let, emet ne nyiitaat cheego ak komi kumyat eng' chaang'indo.

¹⁰ Amu ma uu emet ne obendi oname kobunjook emetap Misiri ne ki obunu ole ki igoole kesweguk ak ki ibisisye keeldong'ung' ko uu kabungui.

¹¹ Ago emet ne olang'jini omenye, kotinyei tuloonook ak tembwosyek ne eei peek che po roptap kipsengwet.

¹² Riibei emonooto Kamuktaindet ne Toroor Kamuktaindeng'ung' ak ko keerei Kamuktaindet ne Toroor Kamuktaindeng'ung' emonooto kobooch taunetap kenyiit agoi kogeskei kenyiit.

¹³ Ngot ogas iit eng' kagiiletapkei ng'atuutikyuk che kang'atak rani ak ngo cham Kamuktaindet ne Toroor Kamuktaindeng'wong' oboisyechi ineendet eng' mugulelwekwok tugul ak eng' saboonwekwok tugul,

¹⁴ agoonok anyun ropta ne po emeng'wong' eng' peetuusyekyik, roptap iwotkuut ak ne igeesunegei, si iges peeguk, divaiguk ak mwaniguk.

¹⁵ Agoonu susweek che po tuguuk eng' emeng'ung', ak iamisyei ibiye.

¹⁶ Oriipkei anyun si ma kiberber mugulelwekwok, ak omaste oot kanamonik ak ogutung'ji.

¹⁷ Ngo yai ko uu nooto, kolaldos nereegegap Kamuktaindet ne Toroor eng' okweek ak koger kipsengwet, si mogoroboni, si ma koiyei emet, ak osip obegu eng' emet ne karaaran ne koonok Kamuktaindet ne Toroor.

¹⁸ Ogonoree anyun ng'aleechuchuk mugulelwekwok ak saboonwekwok ak oratyi eunekwok koek kaboorunet, ak koek ratuutik che kirate anook eng' turyetap togoochikwok.

¹⁹ Oneet lagokwok chooto ye ong'alaaldosi, ye itebye eng' koong'ung', ye iwendoti, ye irue ak ye ing'eete.

²⁰ Sirchi tugatugigap koong'ung', ak ormariichoguk,

²¹ si ko uu ye ta komi kipsengwet ak ng'wony, ko tesoksei ko uu nooto peetuusyekwok ak peetuusyegap lagokwok eng' emet ne ki iyasyechi Kamuktaindet ne Toroor kwanisyekwok kole igoochin.

²² “Amu ngo riip eng' kagiiletapkei ng'atuutyoni komugul kaang'atak rani, oyai, ocham Kamuktaindet ne Toroor Kamuktaindeng'wong', obendate ortinwekyik tugul ak onamge ak ineendet,

²³ koon anyun Kamuktaindet ne Toroor pororyosyechu tugul eng' taing'wong' ak oluul pororyosyek che eecheen che kiimeen kosiirok.

²⁴ Punjinok oldo tugul ole katyech keelyekwok. Egu kiwoteng'wong' kobooch surkwen ak Lebanon ak kobooch aineetap Yufrets agoi nyanjetap Mediterenian nooto tokyingei ole roroktoe asiista.

²⁵ Ma piitu chii ne imuuchi kotonon eng' taing'wong'. Igoochin Kamuktaindet ne Toroor Kamuktaindeng'wong' koiyweak ak kogonyitok emet komugul ne otyeche ko uu ye ki mwaiwok.

²⁶ “Kande taing'wong' rani kaberuret ak chubisyet:

²⁷ egu kaberuret ngo kas ng'atuutigap Kamuktaindet ne Toroor Kamuktaindeng'wong' che kaang'atak rani.

²⁸ Ago egu chubisyet ngo mogas ng'atuutigap Kamuktaindet ne Toroor Kamuktaindeng'wong', ngo maste eng' ooreet ne kaang'atak rani, osup kanamonik che tomo onai.

²⁹ Ak ye tuun kagoitin Kamuktaindet ne Toroor Kamuktaindeng'ung' emet ne iname kobunjiin, inde kaberuret tulweetap Gerizim ak inde chubisyet tulweetap Ebal.

³⁰ Tos ma mi chooto Jordan pitoniin, ole tokyingei ole roroktoe asiista eng' emetap Kanaanik che menyei Arabah ole tokyingei Gilgal ole neegitee keetiigap Moreh?

³¹ Amu olandae Jordan obendi oname emet ne koonok Kamuktaindet ne Toroor Kamuktaindeng'wong', kobunjook ak omeny olooto.

³² Oriip anyun ak oyai kaneetisyosyek ak kirwoogutik tugul che kande taing'wong' rani.