NG'ATUTIK 10 - BUKUIT NE TILIIL Sireet ne Dutero Kanon

Rireenetap Kamuktaindet ne Toroor

¹ “Ki leenjo anyun Kamuktaindet ne Toroor eng' peetuunooto, ‘Wai koik aeng' che lebeleen che uu cho ki po tai, ak itogosu oli ami eng' tulweet, inyoo iyai moingetap keetiik.

² Asirchini koichooto ng'aleek cho ki mi koik che ki po tai cho ki itue, yeityo inde koichooto lebeleen moinget oriit.’

³ “Ki ayai anyun moinget eng' keetiigap chebitoik ak awai koik aeng' che lebeleen che uu cho ki po tai yeityo atogoste tulweet aibe koichooto aeng' eng' eunnyu.

⁴ Ki sir anyun kosirchi koichooto lebeleen ko uu eng' tai, ng'atuutik taman chooto kiga mwaiwok Kamuktaindet ne Toroor eng' tulweet komang'une maat eng' peetuutap tuiyet, ak yeityo kogoono.

⁵ Ki aweege anyun achorugei eng' tulweet ak ande koichooto moinget ne kiga ayai, ak mi olooto ko uu ye king'ata Kamuktaindet ne Toroor.”

⁶ Ki pa piigap Israel eng' Berot Bene-jaakan agoi koit Mosera. Kime Aron ak ki kitupchi olooto. Ki yai Eleazar weeriinnyi tisiisyet kogeer ineendet.

⁷ Ki testai koba eng' olooto agoi Gudgoda, yeityo koba eng' Gudgoda agoi Jotbata emet ne mi kereruusyek.

⁸ Eng' peetuusyechooto, ko ki itabaan Kamuktaindet ne Toroor ooreetap Lawi, koip moingetap arorutyetap Kamuktaindet ne Toroor, kotononso eng' tainnyi, koboisyechi ineendet ak koberuur piik eng' kainennyi agoi ra.

⁹ Ko uu nooto, koma nyooru Lawi anyun kebeberta anan poroteet kobooto tupchosyekyik. Porotennyi Kamuktaindet ne Toroor, ko uu ye ki mwachi ineendet Kamuktaindet ne Toroor Kamuktaindeng'ung'.

¹⁰ Ki atebi eng' tulweet peetuusyek artam ak kemousyek artam ko uu eng' tai, ak kigasa Kamuktaindet ne Toroor peetuunooto kogeny, ak ki mata komach kowong'un.

¹¹ Ki leenjo Kamuktaindet ne Toroor, “Ng'eet indochi piik si koba konam emet ne ki ayosyechi kwanisyekwak ale agoochini.”

Kamanuutyetap Ng'atuutyet

¹² “Ara anyun Israel, nee ne magenen Kamuktaindet ne Toroor Kamuktaindeng'ung', kobatee iywei ineendet kamuktaindeng'ung', iwendote ortinwekyik tugul, icham ineendet ak ioot Kamuktaindeng'ung' eng' muguleldang'ung' tugul ak eng' saboondang'ung' tugul,

¹³ ak iriip ng'atuutigap Kamuktaindet ne Toroor ak kaneetisyosyekyik, che kaang'atiin rani si komyeeit eng' inyee.

¹⁴ Po Kamuktaindet ne Toroor Kamuktaindeng'ung' kipsengwet ak kipsengwet ne po kipsengwet, ng'wony ak tugul che miitei.

¹⁵ Ago ki paibait Kamuktaindet ne Toroor eng' kwanisyeguk ki cham icheek ak kolewen iyotennywa ne piitu let, ne chooto ko okweek eng' piik tugul, ko uu rani.

¹⁶ Omuratan mugulelwekwok anyun, amoegu piich che uueen metowoi.

¹⁷ Amu Kiptaiyat Kamuktaindeng'wong' ko Kamuktaindet ne siirei kamuktaik ak ko Kiptaiyatap kiptainik, Kamuktaindet ne oo ne po kamuktaet ak kwong'eet, ne ma tiytiy piik ak koma namei asoya.

¹⁸ Ineendet ne yachin imanda ne ma tinyei sigiik ak kwony age tugul ne kagosiirtoe manong'otyonnyi, ak kochamei toondet, igoochin amitwogik ak ngoroik.

¹⁹ Ocham anyun toek amu ki oo toek eng' emetap Misiri.

²⁰ Iywei anyun Kamuktaindet ne Toroor Kamuktaindeng'ung' ak iboisyechi ineendet. Onamgei ak ineendet ak iyasye eng' kainennyi.

²¹ Ineendet kalasuneng'ung' ak ko Kamuktaindeng'ung', ne kiyaun tuguuchu eecheen po kwong'eet che ki igeer eng' konyeguk.

²² Ki piik tamanwogik tisap kwanisyeguk ye kichoortogei kobendi Misiri, ago kagoyain Kamuktaindet ne Toroor Kamuktaindeng'ung' itenitu kecheigap parak soet eng' chaang'indo.”