NG'ANG'UTYET 6 - BUKUIT NE TILIIL Sireet ne Dutero Kanon

Ng'oksosyek tisap

¹ Ki ageer anyun Aarwet ye kiyaate agenge eng' ng'ooksosyechooto tisap. Ki agas age eng' tyong'ichooto ang'wan saptos komwaei eng' cheet ne uu tuleet, kole, “Nyoo!”

² Ki ageer, ak ki mi paraisiit ne leel. Ki tinyei kwanget ineendet ne kitebee, ak ki kigoochi ineendet kuutweet, ak ki wo eng' katerteeret ak koterteeris.

³ Ye kingo yaat ng'ookset ne po aeng', agas tyondo ne po aeng' ne sabei kole, “Nyoo!”

⁴ Ak ki mong' paraisiit age, ne piriir. Ki kigoochi ineendet ne ki tebee koisto kaalyeet kobet eng' ng'wony, si kobiit kobargei icheegei; ak ki kigoochi ineendet rotwetap chok ne oo.

⁵ Ye kingo yaat ng'ookset ne po somok, agas tyondo ne sabei ne po somok kole, “Nyoo!” Ki ageer, ak ogeero paraisiit ne tuui! Ki tinyei ratilit eng' eunnyi ineendet ne tebee.

⁶ Ak ki agas ne uu kutit eng' kwenutap tyong'ichooto ang'wan saptos kole, “Ki aldae kibabetap nganuuk dinarit agenge, ak ki aldae kibabok somok che po baale dinarit agenge; ameng'em mwaita ak divaik.”

⁷ Ye kingo yaat ng'ookset ne po ang'wan, agas kutitap tyondo ne sabei ne po ang'wan kole, “Nyoo!”

⁸ Ki ageer, ogeero, paraisiit ne talelyo! Ak kainetap ineendet ne ki tebee ko ki Meet, ak ki isup ineendet ye mi che ki kobek. Ak ki kigoochi icheek kimnateet koboi kebeberta agenge eng' ang'wan ne po ng'wony, kobaree rotwetap chok, ak rubeet, ak meet, ak tyong'igap timiin che po ng'wony.

⁹ Ye kingo yaat ng'ookset ne po muut, ageer eng' kurereetap kaptisiisyo saboonwegap icheek che ki kibar amu ng'olyootap Kamuktaindet, ak paornateet ne ki tinyei.

¹⁰ Ki mwa eng' kutit ne oo kole, “Tyanitu, ee Kiptaiyat, ne tiliil ak ko po iman, si irwookyi ak iyaaktoiywech mugetuut agobo korotiikyok eng' icheek che menyei ng'wony?”

¹¹ Ki kigoochi age tugul eng' icheek ngoryeet ne leel; ak keleenji kota komuuny ne matya, kot kosulda koitetap che otwogik kobooto icheek, ak tupchosyekwak, che tuun kibarei ko uu icheeget.

¹² Ak ki ageer ye kingo yaat ng'ookset ne po lo, ak ki piit potanet ne oo ne po ng'wony; ak ki tuit asiista ko uu kuniet ne ki kiyae koroorik, ak ki igei arawet komugul korotiik;

¹³ ak kotururchigei ng'wony kecheigap parak, ko uu ye ibutos eng' mogoywet logoekyik, kotom koruryo, ye itumdumi usoonet ne oo.

¹⁴ Ki kiisto kipsengwet ko uu kartasit ne kimamani, ak ki kiisto eng' komoswekwak tulweet age tugul ak emet age tugul ne ki ikween peek.

¹⁵ Ak ki unygei eng' kebenonik ak eng' rwandosyek che po tuloonook, laitorinigap ng'wony, ak pounik, ak kiptainik che eecheen, ak mogoreek, ak che kiimeen, ak chii age tugul ne rataat ak chii age tugul ne ityagat.

¹⁶ Ki leenji tuloonook ak rwandosyek, “Oluuljech ak ounyech eng' togeetap ineendet ne tebee ng'echereetap laitornatet, ak eng' nereegegap Aarwet;

¹⁷ amu kagoit peetuut ne po nereegekwak; ak ng'oo ne imuuchi kotonon?”