NG'ANG'UTYET 4 - BUKUIT NE TILIIL Sireet ne Dutero Kanon

Ng'ang'utyet agobo kipsengwet

¹ Kingo pata tuguuchu, ageer, ak ki yaatak kurgeet eng' kipsengwet. Ak kutit ne po tai ne ki agas ko ki uu ne po iryageet, ne ki ng'alaalwo kole, “Togosu oli, si aboorun tuguuk che tuun piitu eng' let matiny.”

² Ak ki ami anyun eng' Kabuuset ne Tiliil eng' yooto, ak ogeero, ki mi kipsengwet ng'echereetap laitornatet, ak kitebee chiito ng'echeranooto.

³ Ak ineendet ne kitebyei kogingegeerei ko uu koitap jasipi ak sardio. Ki mi chepkuinobor ne kiyiem ng'echereetap laitornatet, ne ki ngegeerei ko uu sumaragdo.

⁴ Kiyiem ng'echeranooto po laitornatet, ng'echerok tiptemu ak ang'wan che po laitornatet ak kotebee poisyek tiptemu ak ang'wan ng'echerochooto. Ki ilaachi ngoroik che leelachen ak kotinyei eng' metowekwak kutonook che po thahabu.

⁵ Ak mang'une ng'echeranooto kalyeleet ak kutusweek ak tuloosyek. Ak kilaldos taisyek tisabu che po mastinwek eng' taitap ng'echeranooto po laitornatet, chooto ko saboonwek tisap che po Kamuktaindet.

⁶ Ak ki uu taitap ng'echeranooto po laitornatet, nyanjet ne po klasit, ne uu krustalo. Eng' kwenutap ng'echeranooto po laitornatet, ko kiyiem komuut komoswek tugul tuguuk ang'wanu che saptos che nyiitootiin koonyek tai ak let.

⁷ Ak ki kergei tyondo ne po tai ak ng'etundo, ne po aeng' ko ki kergei ak moita, ne po somok ko ki tinyei togeet ne uu ne po chiito, ak ne po ang'wan ko ki uu kipsiichit ne tirireni.

⁸ Ak nyiitootiin tyong'ichooto ang'wan saptos koonyek, komoswek tugul ak oriit, kotinyei age tugul kebebaik lo. Ama imuunyi icheek peet ak kemoi, komwaei koleen, “Tiliil, tiliil, tiliil, Kiptaiyat Kamuktaindet, Ne po Kamuktaet, ne ki mi ak komi ak ko tuun nyoonei.”

⁹ Ak ye igoochi tuguuchooto saptos toroornatet ak teegisto ak kongoi ineendet ne tebee ng'echeranooto po laitornatet, ineendet ne sabei koigeny ak koigeny,

¹⁰ kobutyi anyun poisyechooto tiptemu ak ang'wan taitap ineendet ne tebee ng'echeranooto po laitornatet, ak kogutung'ji ineendet ne sabei koigeny ak koigeny, ak kowiirchi ng'wony kutonokwak che po thahabu eng' taitap ng'echereet, koleen,

¹¹ “Nyoljinin, Kiptaiyandennyo ak ko Kamuktaindet nenyo, itaach toroornatet ak teegisto ak kamuktaet; amu kiitau iyae tuguuk tugul, ak ki piit amu mageng'ung' ak ki kiyai.”