NG'ANG'UTYET 21 - BUKUIT NE TILIIL Sireet ne Dutero Kanon

Kipsengwet ne Leel ak Ng'wony ne Leel

¹ Ak ki ageer kipsengwet ne leel ak ng'wony ne leel; amu ki kosiirto kipsengwet ne po tai ak ng'wonyut ne po tai; ama komi nyanjet kogeny.

² Ki ageer nganaseet ne tiliil, Jerusalem ne leel, kochoorugei eng' kipsengwet kobunu Kamuktaindet, ko kagechop ko uu murereet ne kagelelesonjinechi manong'otyondennyi.

³ Ak ki agas kutit ne oo komang'une ng'echereetap laitornatet kole, “Ogeero, mi emaitap Kamuktaindet ak piik, ak kotebyei kobooto icheek, ak koek icheek piikyik, ak kotebyei Kamuktaindet ineendet ak icheek, ak koek Kamuktaindet nenywa;

⁴ ak kous ineendet peegap kong' alak tugul eng' konyekwak. Amaa komi meet kogeny; ama komi kateiyet kogeny, anan riirek, anan ng'wanindo; kogosiirto tuguuk che po tai.”

⁵ Ak ki mwa ineendet ne tebee ng'echereetap laitornatet kole, “Ogeero, ayae tuguuk tugul koleelagitu.” Ak ki le, “Sir, amu ng'aleechu ko che kiyani ak ko po iman.”

⁶ Ak koleenjo, “Kagosulda! Aa Alpha ak ko aa Omega, taunet ak kagesunet. Agoochini puch ineendet ne amei melelda che po kondametutap peegap saboondo.

⁷ Ineendet ne iterteeri konamei tuguuchu; ak aegu Kamuktaindet nenyi, ak koek ineendet weeriinnyu.

⁸ Ago che iyweisyei, ak che ma iyani, ak che kiwechei, ak rumiik, ak che soksei, ak pooniik, ak che saaei kanamonik, ak kiplembechonik tugul, kotinyei kebebertanywa eng' araraita ne lale maat ak koik che laldos; ne nooto ko meet ne po aeng'.”

Jerusalem ne leel

⁹ Ak ki nyo age eng' malaikaisyechooto tisap che ki tinyei taabook tisap, che kinyiitotin korotwek tisabu che po let; ak kong'alaalwo kole, “Nyoo yu, si aboorun murereet, osotyotap Aarwet.”

¹⁰ Ak ki imuta eng' Kabuuset ne Tiliil agoi tulweet ne oo ak ko kooi, ak ki iboorwo nganaseet ne tiliil Jerusalem, kochoorugei eng' kipsengwet kobunu Kamuktaindet,

¹¹ kotinyei liilindap Kamuktaindet: ne kergei lapkeiyennyi ak koita ne po kamanuutyet ne oo, ko uu koita ne po jasipi, ne tiliil ko uu krustalo.

¹² Ki tinyei irimeet ne oo ak ko kooi; ak kotinyei kurgotik taman ak aeng', ak mi ormariichochooto malaikaisyek tamanu ak aeng'; ak ki kisirchi kainaik, chooto po ortinwek taman ak aeng' che po piigap Israel.

¹³ Ki mi komostap kong'asiis kurgotik somogu, ak ki mi komostap murot kaataam kurgotik somogu, ak ki mi komostap murot tai kurgotik somogu, ak ki mi komostap cherongo kurgotik somogu.

¹⁴ Ak ki tinyei irimeetap nganaseet lumeiywek taman ak aeng', ak ki mi kainaik tamanu ak aeng' che po che kiyooktoi taman ak aeng' che po Aarwet.

¹⁵ Ki tinyei ineendet ne ki ng'alaalwo tegat ne po thahabu si kokwae nganaseet, ak kurgotikyik, ak irimennyi.

¹⁶ Ak ki aechin irimosyek tugul ang'wanu che po nganaseet, ak ki aechin koindonyi ak tebeesindo: ak ki ikwae nganaseet tegandanooto, koek maelisyek eliphuut agenge ak pogol muut: koindonyi ak tebeesindanyi ak koindonyi ne wendi parak koaechin.

¹⁷ Ki ikwa irimennyi, ak ki ek kakwautigap euut pogol ak artam ak ang'wan, eng' kakwaetap chiito, nooto ko ne po malaikaiyat.

¹⁸ Ak ki kiteege jasipi irimennyi: ak ki thahabu che tiliileen nganaseet, ko uu klasit ne tiliil.

¹⁹ Ak ki kilelesonji lumeiywegap irimeet ne po nganaseet eng' koik alak tugul che po kamanuutyet ne oo. Lumeiywot ne po tai ko ki jasipi; ne po aeng' ko sapphire; ne po somok ko kalkedo; ne po ang'wan ko sumaragdo;

²⁰ ne po muut ko sardonukso; ne po lo ko sardio; ne po tisap ko krusolito; ne po sisiit ko berulo; ne po sogool ko topasio; ne po taman ko krusopraso; ne po taman ak agenge ko huakinto; ne po taman ak aeng' ko ametusto.

²¹ Ak kurgotik taman ak aeng' ko ki sonoek taman ak aeng' che korooron; age tugul eng' kurgotik ko ki po sonoiyat agenge, ak ki thahabu che tiliileen ooreetap nganaseet, ko uu klasit ne sengelel.

²² Ama ageer hekaluut eng' nganaseet; amu Kiptaiyat Kamuktaindet Ne po Kamuktaet ak Aarwet ko hekalunnyi.

²³ Ak ma machei nganaseet asiista, anan arawet, koluuchi: amu iluuchin liilindap Kamuktaindet, ak tainnyi ko Aarwet.

²⁴ Ak kobendoti pororyosyek eng' lapkeiyennyi, ak koibu laitorinigap ng'wony toroornatennywa konyo oriit.

²⁵ Amagoi kiger kurgotikyik peet amu ma mi kemout olooto.

²⁶ Ak ibu icheek toroornatet ak teegistap pororyosyek kobwa oriit.

²⁷ Ak ma koi wo oriit kiy age tugul ne murwoon, anan ko ne yaei kiy ne kiwechei, ak lembeita, kobatee icheek che ki kisirchi bukuitap saboondo ne po Aarwet.