NG'ANG'UTYET 13 - BUKUIT NE TILIIL Sireet ne Dutero Kanon

Tyong'ik aeng'

¹ Ak ki ageer tyondo kotogosu eng' nyanjet, ne tinyei kuinoik taman ak metowek tisap, ak naryosyek taman eng' kuinoikyik, ak ki mi metowekyik kainaigap chubisyet.

² Ak ki uu tyondo ne ki ageer cheplanget, ak ki uu keelyekyik keelyegap magalaluut, ak ki uu kutinnyi kutitap ng'etundo: ak ki igoochi maswetit ineendet kamugennyi, ak ng'echerennyi ne po laitornatet, ak kimnateet ne oo.

³ Ak ki ageer age eng' metowekyik ko uu ne kagikwer kebar; ak ki kisoop moet ole kiga kikwer, ak ki kwong' ng'wony komugul agobo tyonyooto.

⁴ Ki ilas icheek maswetit amu ki igoochi kimnateennyi tyondo, ak ki ilas icheek tyondo, komwa kole, “Ng'oo ne kergei ak tyonyito; ak ng'oo ne imuuchi kobargei ak ineendet?”

⁵ Ak ki kigoochi ineendet kutit kong'alaal tuguuk che eecheen ak chubisyosyek; ak ki kigoochi ineendet kimnateet koboisyee arawek artam ak aeng'.

⁶ Ak ki yaat kutinnyi kochup Kamuktaindet, ak kochup kainennyi, ak koonnyi, ak icheek che menyei kipsengwet.

⁷ Ak ki kigoochi ineendet kobargei ak piik che tiliileen, ak koterteer icheek; ak ki kigoochi ineendet kimnateet koboi ooreet age tugul ak piik alak tugul, ak kutit age tugul ak pororyet age tugul.

⁸ Ak kolas ineendet tugul che menyei ng'wony, che ma ki sirchi kainaikwak bukuitap saboondo ne po Aarwet ne ki kibar kobooch taunetap ng'wony.

⁹ Ngo tinyei chii itit, kogas.

¹⁰ Ngo luulis chii, keluulei ineendet: ngo paris chii eng' rotwetap chok, kobare ineendet rotwetap chok matiny. Mi yu muitaet ak kayaneetap piik che tiliileen.

¹¹ Ak ki ageer tyondo age kotogosu eng' ng'wony; ak ki tinyei kuinoik aeng' che uu che po aarwet, ak ki ng'alaal ko uu maswetit.

¹² Ak koboisyee kimnateet tugul ne po tyondo ne po tai eng' tainnyi. Ak kogoochi ng'wony ak che menyei oloto kolas tyondo ni kabo tai, ne ki kisoop ole kiga kikwer kome.

¹³ Ak koyaei ineendet kaboorunoik che eecheen, kot koyaei maat kochoorgei eng' kipsengwet kobutyi ng'wony eng' taitap piik.

¹⁴ Ak ki iberber icheek che menyei ng'wony eng' kaboorunoik che ki kigoochi ineendet koyai eng' taitap tyondo; koleenjin icheek che menyei ng'wony koyachi kanamwet tyondo, ne tinyei perutyetap rotwetap chok, ak kisop tyonyooto.

¹⁵ Ak ki kigoochi ineendet kogoochi kabuuset kanamwetap tyondo, si kobiit kong'alaal kanamwetap tyondo, ak kong'at kebar tugul che ma ilasu kanamwetap tyondo.

¹⁶ Ak ng'atei tugul, che mengeechen ak che eecheen, ak mogoreek ak kibananook, ak che ityagotiin ak che ratotiin, kinde perutyet eng' eunekwak che po tai, anan ko eng' togoochikwak;

¹⁷ ak kole ma imuuchi chii koalis anan koaldais, kobatee ineendet ne tinyei perutyet, nooto ko kainetap tyondo anan ko koitetap kainennyi.

¹⁸ Mi yu utaatyet. Ineendet ne tinyei kaguiyet, koiit koitetap tyondo; amu nooto koitetap chii: ak koiitennyi ko pogol lo ak tamanwogik lo ak lo.