NEEMIA 8 - BUKUIT NE TILIIL Sireet ne Dutero Kanon

Kosomanjin `Ezra piik ng'atuutik

¹ Ki iyumgei piik tugul ko uu chiichak eng' komosta ne paraa ne ki mi taitap ormariichetap peek. Ki leenji `pichooto Ezrah siriindet koip kitabuutap ng'atuutigap Musa, che kiga kong'atyi Kamuktaindet ne Toroor Israel.

² Eng' peetuut ne po tai ne po arawetap tisap, koip anyun `Ezra tisiindet Ng'atuutik kobwa taitap tuiyet ne ki mi murenik ak kwonyiik kobooto piik tugul che ki imuuchi kogas ak koguiyo.

³ Kisoman ng'atuutichooto eng' taitap komosta ne paraa ne ki miitei taitap ormariichetap peek, kobooch karon agoi peet kween eng' taitap murenik ak kwonyiik, kobooto che ki imuuchi koguiyo. Ki epchi iit anyun piik tugul kitabuutap Ng'atuutik.

⁴ Ki tonon Ezrah siriindet eng' komosta ne ki kiteege keetiik kotororit, ne kiga kiyachi poisyonooto. Ki tonondos eng' ye neegitee ineendet eng' komostap eunnyi ne po tai, Matitia, Shema, Anaia, Uriah, Hilkiah ak Maaseia. Kitonondos eng' komostap eunnyi ne po kaataam, Pedaiah, Mishael, Malkija, Hasum, Hasbadana, Zekariah ak Mesulam.

⁵ Ki ng'aany `Ezra bukuinooto eng' taitap piik tugul (amu kimi ye toroor kosiir piik) ak kingo ng'aany bukuinooto kotononso piik tugul.

⁶ Ki ilas `Ezra Kamuktaindet ne Toroor, Kamuktaindet ne oo ak ki wol piik tugul kole, “Amen, Ngo yaak ko uu nooto” konamjin parak eunekwak. Ak ki ing'uruukso kot kotiing'e togoochikwak ng'wony kolas Kamuktaindet ne Toroor.

⁷ Kitooret piik koguiyo Ng'atuutik Lawiik: Jeshua, Bani, Serebia, Jamin, Akub, Sabetai, Hodia, Maaseia, Kelita, Azariah, Josabad, Hanan, Pelaiah, ak kitononso piik eng' komostanywa.

⁸ Kisoman eng' bukuit kogasak komyee ng'atuutigap Kamuktaindet, ak ki iarorchi, si koguiyo somanonooto.

⁹ Ak ki leenji piik tugul `Nehemiah, ne ki pounindet ak Ezrah tisiindet ak ko siriindet kobooto Lawiik che ki ineeti piik, “Tiliil peetuuni eng' Kamuktaindet ne Toroor, Kamuktaindeng'wong', amoteeye anan oriirye.” Amu ki riirtos piik tugul, ye kigase ng'aleegap Ng'atuutik.

¹⁰ Koleenji icheek `Nehemiah, “Oba, oam che akwaen ak oee che anyiny ak oyookyi kebeberwek ineendet ne ma kichopchi kiy, amu tiliil peetuuni eng' Kiptaiyandennyo. Amoaragense, amu kimnateeng'wong' poiboiyetap Kamuktaindet ne Toroor.”

¹¹ Ki igaigai anyun `Lawiik piik tugul koleenji, “Osisye, amu tiliil peetuuni, amoaragense.”

¹² Ki pa piik tugul koamis, koeiso ak koyookto kebeberwek ak koboiboitu miising' amu kiga koguiyo ng'aleek che kiga kimwachi icheek.

¹³ Eng' peetuut ne po aeng', koyumgei kandoigap kooriigap kwanisyegap piik tugul, Tisiik ak Lawiik, koyumjigei Ezrah siriindet, si kobiit koepchi iit ng'aleegap Ng'atuutik.

¹⁴ Ki nyoor kole ki kisir eng' Ng'atuutik ko uu ye kiga ng'at `Kamuktaindet ne Toroor eng' Musa kole, kanyool komeny piigap Israel keryosyek eng' igoorto ne po arawetap tisap,

¹⁵ ak kora kobarta ak komwaita icheek eng' nganasookwak tugul ak eng' Jerusalem kole, “Oba tulweet ak oibu mooriigap mseituni, che po mooriigap mseituni che po timiin, momonik, sosik ak mooriigap keetiik che nyigiisen, si keteege keryosyek, ko uu ye siraat.”

¹⁶ Ki pa anyun piik, koip tuguuchooto ak koteekyinegei keryosyek, ki teech chii age tugul paragutap koonnyi, eng' seremusyekwak, eng' seremusyegap kootap Kamuktaindet, eng' komosta ne paraa eng' ormariichetap peek ak eng' komosta ne paraa eng' ormariichetap Ephraim.

¹⁷ Kiteekyigei keryosyek tuiyet tugul ne po piik che ki weeksei che kiga kiluul ak komeny keryosyechooto, amu kitom koyai piigap Israel ko uu nooto kobooch peetuusyegap Jeshua weeriitap Nun, ak ki piit poiboiyet ne oo.

¹⁸ Kisoman kogeny peetuut age tugul bukuit ne po Ng'atuutigap Kamuktaindet, kobooch peetuut ne po tai agoi peetuut ne po let. Ki yai igoorto peetuusyek tisap, ak eng' peetuutap sisiit koyai tuiyetap kaming'inetapkei, ko uu ye ki king'at.