NAHUM 3 - BUKUIT NE TILIIL Sireet ne Dutero Kanon

Kagoriik ng'emisyet

¹ Pwo nganaseetap korotiik! Nyiitaat lembechek ak rebisyet, ma igeesugei rebisyet.

² Cheetap kipchoritiit ak kirgirenetap kariisyek; cheetap paraisisyek che toroombendos ak cheetap kariisyegap lugeet che rwaei!

³ Piik che ketei paraisisyek, kalyeleetap rotwetap chok ak ng'otit ne liilei piich; ak chaang'indap che kagebar, karurugutyet ne oo ne po muuswek; ma igeesugei muuswek, riichei muuswekwak icheek!

⁴ Amu chaang'indap kugoinatosyek che po chepkugoniot ne karaaran, kwondo ne pou ponisyosyek, ne aldoi pororyosyek eng' kugoinatosyekyik, ak koaldoi piik eng' ponisyosyekyik.

⁵ Keero, aboryenen, mwaei Kamuktaindet ne Toroor ne po lugoosyek, ak ang'aanye ngoroiguk kot koit metit; ak aboorchin pororyosyek imi aach ngor, ak aboorchi pounatosyek teweernateng'ung'.

⁶ Awirenen tuguuk che samis che kiwechei, ak ayain iyaitu, ak andein iegu kiit ne kitang'aang'jin.

⁷ Tuun mweenen tugul che keerin ak kole, “Kageng'em Nineveh! Ng'oo ne riirchin? Anyoorchini ano che igoigoin?”

⁸ Tos ii kaigai isiir No-amon, ne ki mi kwenutap ainoosyek, ne ki tinyei peek che kiyiem; ne ki irimennyi nyanjet, ne ki inatunnyi nyanjet?

⁹ Ki kimnatennyi Kush ak Misiri, ak ki ma kotinyei ole pooch; ki toretiguk Put ak piigap Libya.

¹⁰ Ago ki kimut, ki kiluul, ki kitonaton kogeny lagokyik eng' tabanwegap ortinwek tugul; ak kiseer parbareek agobo piikyik che konyitotiin, ak kerate nyororosyek piikyik tugul che eecheen.

¹¹ Ibogiti aginye, iterteryoti; icheeng'e aginye irimeet amu puunyoot.

¹² Igeitu irimoiguk tugul mogoonik che tinyei logoekwak che tongoanik; ngitumdum kobutyin kutitap amindet.

¹³ Keero, kiplugotiniguk; uu kwonyiik eng' kwenung'ung'. Kagiyatyi puuniguk ormariichogap emeng'ung', kagobeel maat temeleiyweguk.

¹⁴ Ram peek che po peetuusyek che kiyiemenen, igimit irimoiguk: uui ole mi meneet, ak ityech ng'atatyat, ak igimit ole kibeelee matubaruuk.

¹⁵ Igesun maat eng' olooto; parin rotwetap chok, igeesun ko uu tinapchet. Chaang'itu ko uu tinapchet, chaang'itu ko uu chereng'endet.

¹⁶ Ki ites chemung'arainiguk kosiir kecheigap kipsengwet: Ng'emisyoti tinapchet, yeityo kotiriren kwo.

¹⁷ Tee chereng'enyinik piiguk che ki kilaakyi naaryeet, uu talamik che chaang' kiptainiguk che po lugeet, che menyei ng'otonok eng' peetuutap kaitityet, ak komwei ye kachor asiista, ama ki nai ole kaba.

¹⁸ Inuuktos mestoweguk, ee laitoryatap Assyria. Imuunyi piiguk che po teegisto. Kiyestoochi piiguk tuloonook, ama mi chii ne iyumi.

¹⁹ Ma mi kiy ne isoobi moeng'ung'; ng'waan moeng'ung'. Tugul che kasei ng'aleek agobo inyee, ko iraprabi eunek agobo inyee. Amu ng'oo ne ki kochililee yaityeng'ung' ne ma igeesugei?