NAHUM 1 - BUKUIT NE TILIIL Sireet ne Dutero Kanon

¹ Maonateet agobo Nineveh. Kitabuut ne po ng'ang'utyetap Nahum Elkosindet.

Nereegegap Kamuktaindet ne Toroor

² Kamuktaindet ne Toroor ko Kamuktaindet ne amei ng'etkong' ak koyaaktoi mugetuut; yaaktoi Kamuktaindet ne Toroor mugetuut ak tinyei nereek; yaakyin Kamuktaindet ne Toroor mugetuut puunikyik, ak kogonorchin puunikyik nereegek.

³ Ma sip konereechi Kamuktaindet ne Toroor, tinyei kimnateet ne oo ama pagaktoi kiptengekyot age tugul. Tinyei Kamuktaindet ne Toroor ooreennyi eng' kipchurchuryet ak eng' usoonet ne oo, ak poolik ko temburyegap keelyekyik.

⁴ Kere kong' nyanjet ak kogoochin koyaam, ak igoochin koteeny ainoosyek tugul; nyaluli Bashan ak Karmel, ak kores taapteetap Lebanon.

⁵ Potandos tuloonook eng' tainnyi, ak kochootyo tuloonook che mengeechen; potani ng'wony eng' tainnyi, ee ng'wony ak tugul che menyei olooto.

⁶ Ng'oo ne imuuchi kotonon eng' taitap nereegekyik? Ak ng'oo ne imuuchi komuita eng' koroomnatetap nereegekyik? Kirong'u nereegekyik che ng'woneen ko uu maat, ak tonatoni `ineendet rwandosyek.

⁷ Myee Kamuktaindet ne Toroor, irimeet eng' peetuutap nyalilda; ak kongen icheeget che imang'u ineendet.

⁸ Ak eng' maraneet ne oo, ko igeesu komosato, ak koon puunikyik koba mesundeito.

⁹ Amu nee si otete ogirinde Kamuktaindet ne Toroor? Ineendet ne iwong'u; ma ng'eetei puunyo konyil.

¹⁰ Nganda uu icheek katook che king'walgei, ak ko uu che pogitos eng' eeisennywa, kebeelei kogeskei ko uu mobeek che yamyotiin.

¹¹ Kamong'unenen age ne chobei yaityet koleen kogirindae Kamuktaindet ne Toroor, inee ne irwoochi yaityet.

¹² Mwaei Kamuktaindet ne Toroor kole: “Agot nganda kiimeen miising' ak ko chaang', kebarei ui tugul ak kobetyo. Agot nganda ki anyalilin, koma anyalilin kogeny.

¹³ Airie choginnyi eng' kaating'ung', ak ang'etii ratuutiguk.”

¹⁴ Kagong'at Kamuktaindet ne Toroor agobo inyee kole, ma kibwaati kaineng'ung' kogeny amu ma kolalin ma. Aistoi komong' eng' kootap kamuktaiguk, kanamonik che ki kiwai ak che ki kitany. Abale kerering'ung'; amu ii sogoran.

¹⁵ Ogeero! Mi tuloonook kelyegap ineendet ne ibu logoiywek che myach, inee ne mwaitoi kaalyeet. Riip igoorweguk, ee Judah, yai kaarortaosyeguk kosulda, amu ma kobookyinin kiptengekyot kogeny; ki parei ineendet ne matiny.