MIKAH 7 - BUKUIT NE TILIIL Sireet ne Dutero Kanon

Yaityetap Piik

¹ Pwo eng' anee! Amu aa uu yo kagiyum logoegap kemei, aa uu turoonik che po sabibuk, ma mi logoek che irurugotin che kimuuchi keam; machei saboondanyu tongoaniatap mogoywet.

² Ki kobet chii ne iywei Kamuktaindet ne Toroor eng' emet, ama mi agot agenge ne po iman eng' piik. Saptoi tugul kotumdoi korotiik, riichei chii age tugul mesteet agobo ng'eetap kamet.

³ Igiilegei eng' eunekwak koyai kiit ne ya; soomsei pounindet ak kirwoogindet komachei kiit ne kigoigoisye; ak mwaei chiito ne oo mageet ne ya ne po saboondanyi; chobei icheek ko uu nooto.

⁴ Ne myee eng' icheek ko uu kateet ne rutei piich: ne litit miising' eng' icheek ko ya kosiir ng'ootweetap katook: kagoit peetuutap riibiguk, peetuut ne kiityinin pireet; egu anyun kaiimennywa pogei.

⁵ Amomang'u chorweet, amotiegei kandoindet: riip kurgeetap kuting'ung' eng' ineendet ne ruei eng' tegeng'ung'.

⁶ Amu iteweeri weeriit kwanda, porye chepto kamet, porye osotyotap weeriit korgennyi ne po yugoi; puunigap chiito piikyik.

⁷ Ago amang'u anee Kamuktaindet ne Toroor; ageni Kiptaiyat Kamuktaindetap yetunennyu: kasa Kamuktaindennyu,

⁸ amebaibaitunena, ee punyondennyu: ye kabut, ang'eete kogeny; ye atebee mesundeito, koegu Kamuktaindet ne Toroor lapkeiyennyu.

⁹ Amuitoi eng' nereegegap Kamuktaindet ne Toroor, amu ki ayachi tengekto; agoi kong'alaal agobo ng'olyoondennyu, ak koyaiywo kirwooget: tuun imutwaa among' ole mi lapkeiyet, ak ageer imandanyi.

¹⁰ Yeityo kogeer anyun punyondennyu, ak kotuch `teweernateet ineendet ne ki leenjo, “Mi ano Kamuktaindet ne Toroor Kamuktaindeng'ung'?” Abaoryani eng' konyekyuk agobo kabutennyi; ak ketyekyin ng'wony ko uu ng'atateek che mi ortinwek.

¹¹ Peetuut ne kiteechei irimoiguk! Ki istoi kolooit ng'atuutyet eng' peetuunooto.

¹² Pwonjinin icheek eng' peetuunooto, kobunu Assyria ak nganasoogap Misiri, ak kobooch Misiri agoi aineet, ak kobooch nyanjet agoi nyanjet, ak kobooch tulweet agoi tulweet.

¹³ Nganda uu nooto koegu emet karaatya amu icheek che menyei olooto, amu logoegap poisyonikwak.

¹⁴ Iyage piiguk eng' kiroktong'ung', akweetap poroteng'ung', che meng'iisyei icheegei, eng' timiin ne mi kwenutap Karmel: ingoagetyo eng' Bashan ak Gilead, ko uu peetuusyek che po keny.

¹⁵ Aboorchini ineendet tuguuk che kikwong'ee ko uu eng' peetuusyek che ki imong'u eng' emetap Misiri.

¹⁶ Keerei pororyosyek ak kolilaanso amu kimnateennywa tugul: kere eunekwak kutusweekwak, ak kotimogis itiikwak.

¹⁷ Melei ng'ung'unyek ko uu ereneet; mong'u kobotanionu eng' komoswekwak che ung'egei ko uu tuguuk che ichuutegei ng'wony: pwoonei eng' kaiyweisyet ole mi Kamuktaindet ne Toroor, Kamuktaindennyo, ak koiyweis amu inyee.

Riirenosyegap Kamuktaindet che ma igeesugei

¹⁸ Ng'oo Kamuktaindet ne uu inyee, ne nyochin kaat piik amu tengekto, ak kosiirtoe pistoetap piik che ki ng'et che po porotennyi? Mateptoi nereegekyik agoi, amu paibaitune rireenet.

¹⁹ Tuun weeksei kogeny ak korirenech; tuun istoiwech tengekwogikyok: tuun iwiirchini tugul rirosyegap nyanjet.

²⁰ Iyachini Jakobo imanit, ak iyachi Abraham rireenet, che kigeyosyechi kwanisyekyok eng' peetuusyek che po keny.