MIKAH 6 - BUKUIT NE TILIIL Sireet ne Dutero Kanon

Ng'aleek agobo Israel

¹ Ogas anyun okweek kiit ne mwaei Kamuktaindet ne Toroor: Ng'eet, ng'alaal kogasak eng' taitap tuloonook, ak ingogas tuloonook che mengeechen kuting'ung'.

² Ogas, ee okweek tuloonook, ng'aleek che ting'enok Kamuktaindet ne Toroor, ak okweek lumeiywek che kiimeen che po ng'wony; amu ting'ee `Kamuktaindet ne Toroor piikyik ng'aleek, ak machei kong'alaal ak Israel.

³ Ki ayaiywok nee, ee okweek piikyuk? Ak ki aiimenak nee? Obaoryanwa.

⁴ Amu ki amutun itogosu imong'u eng' emetap Misiri, ak ki atyachin imang'une kootap otwoknateet; ak ki ayookte Musa, Aron, ak Miriam kondoun.

⁵ Ee piikyuk, obwaat ne ki soom Balak laitoryatap Moab, ak kiit ne ki wolji Balaam weeriitap Beor ineendet; obwaat kobooch Shitim agoi Gilgal, si kobiit onai poisyonigap iman che po Kamuktaindet ne Toroor.

⁶ Aibu nee taitap Kamuktaindet ne Toroor, ak ang'uruuge eng' taitap Kamuktaindet ne Toroor? Tos anyoo tainnyi aibu kagoochinoik che kibeelei kobooto moek che ma siirei kenyiit agenge?

⁷ Tos paibaitune Kamuktaindet ne Toroor mengichik eliphuusyek, anan ainoosyek eliphuusyek taman che po mwanik? Tos agoite taaitanyu agobo pistoennyu, agoite iyoteetap poortanyu agobo tengektap saboondanyu?

⁸ Ee inyee chii, kagoboorun ineendet kiit ne myee; ak nee ne magenen Kamuktaindet ne Toroor, kobatee iyai imanda, ak icham rireenet, ak iwendote eng' kaming'inetapkei kobooto Kamuktaindeng'ung'?

Waluunetap Maotyot

⁹ Kuurei kutitap Kamuktaindet ne Toroor nganaseet ak koywei ne utaat kaineng'ung': ogas kirokto, kobooto ineendet ne king'atei.

¹⁰ Tos ta komi konoraik che po yaityet eng' kootap kiptengekyot, ak kerutyet ne ichuchugat ne kiwechei?

¹¹ Tos atiliiliitu ngatinye tuguuk che kirogendoisye che po yaityet, kobooto lolet ne mi ratilisyegap ng'aalseet?

¹² Amu nyiitaat koroomnateet mogorekyik, ak kogomwa lembechek piik che menyei olooto, ak kong'aalsei ng'elyebwekwak.

¹³ Koabirin anyun aginye eng' mook ne oo, koayain iegu panan amu tengekwogiguk.

¹⁴ Iamisyei, amebiyonyi; ak kotebenen kalilaneng'ung': ak iuu, ago mesaru ne imuti; ak abare rotwetap chok ineendet ne imuti.

¹⁵ Igolsei, amegese; itue mseituni, ago meilegei mwanik; itue sabibuk, ago mee divaik.

¹⁶ Amu ki oriip ng'atuutigap Omri, ak poisyonik tugul che po kootap Ahab, ak obendate kirwoogutikwak: si kobiit ayain iegu panan, ak ayai piik che menyei olooto koek che kireenyei; ak oip chotisyetap piikyuk.