MIKAH 5 - BUKUIT NE TILIIL Sireet ne Dutero Kanon

Pounindetap Bethlehem

¹ Iyumge anyun, obee kweanaigap lugeet, ee cheptap kweanaigap lugeet; kogoyiemech: kwere kirokto matandap kirwoogindetap Israel.

² Ago inyee, Bethlehem Ephratah, ne ii ming'in eng' kwenutap eliphuusyek che po Judah, mong'unenen age ne nyoonjino ne tuun egu pounindetap Israel; ne ki cham komong'u kobooch keny, kobooch koigeny.

³ Igoitoi anyun ineendet icheek kot koit peetuut ne sigisyei ineendet ne tinyei ng'wanindo: tuun weekyingei anyun che ki ng'et che po tupchosyekyik, piigap Israel.

⁴ Ak kotonon kobai akweennyi eng' kimnateetap Kamuktaindet ne Toroor, eng' telunatetap kainetap Kamuktaindet ne Toroor Kamuktaindennyi: ak kotebi; amu eetu kobooch nguno agoi ole poochin ng'wony.

⁵ Egu chiichito kalyennyo ye tuun kait Assyrianindet emennyo, ak ye tuun katyech kooriikyok che po laitoryat, ko tuun king'eeti anyun mestoweek tisap ak piik sisiit che eecheen kobargei ak ineendet.

⁶ Ak kong'em emetap Assyria eng' rotwetap chok, ak kong'em emetap Nimrod eng' ole kibunei kebendi olooto; ak kosarwech ineendet eng' Assyrianindet ye tuun kait emennyo, ye tuun kanyo kotyech oriit eng' kiwotennyo.

⁷ Ak kotebee piik che ki ng'et che po Jakobo kwenutap pororyosyek che chaang' ko uu rewoot ne punu Kamuktaindet ne Toroor, ko uu ropta ne inesyin susweek; ne ma igeni chii, anan kogany weeriigap piik.

⁸ Ak kotebee piik che ki ng'et che po Jakobo kwenutap pororyosyek, kwenutap pororyosyek che chaang', ko uu ye mi ng'etundo kwenutap tyong'ik che po timiin, ko uu ng'etundo ne neran eng' kwenutap akwotisyegap keechiirek: ne ye punei kween kotyegoti ak kotonatoni, ama mi chii ne saru.

⁹ Ingitoroor eung'ung' eng' paragutap puuniguk, ak ingeisto puuniguk tugul.

¹⁰ Mwaei Kamuktaindet ne Toroor kole tuun abare eng' peetuunooto paraisisyeguk eng' kwenung'ung', ak ang'em karisyeguk che po lugeet:

¹¹ ak abar nganasoogap emeng'ung', ak abut irimoiguk tugul:

¹² ak aiste ponisosyek eng' eung'ung'; ama inyooru kogeny chepsogeinik:

¹³ ak aiste eng' kwenung'ung' kanamoniguk che ki kiwai ak tolochiguk; ak ma ilasu kogeny poisyonigap euneguk.

¹⁴ Ak atutu Aserik eng' kwenung'ung'; ak ang'em nganasoguk.

¹⁵ Ak ayaaktochi mugetuut eng' nereegek ak eng' nereegek che ng'woneen, pororyosyek che ki ma kas iit.