MIKAH 2 - BUKUIT NE TILIIL Sireet ne Dutero Kanon

Pireet ne ityin che usiisyei

¹ Pwo eng' icheek che chobei tengekto ak kotilei eng' itogusyekwak ole yaitoi yaityet! Ye kagoeech koyaei, amu tinyei kimnateet koyai.

² Kasei myat mbareenik, ak korep; kobooto kooriik, ak koip: ak kous chiito kobooto koonnyi, chiito kobooto tuguukyik.

³ Mwaei anyun Kamuktaindet ne Toroor kole: Ogeero, achobe yaityet agobo kooi, ne moistoe kaatwekwok anan obendate menoteet; amu yaacheen peetuusyechooto.

⁴ Mwaei eng' peetuunooto kalewenet agobo inyee, ak koriir eng' riirek che ng'woneen, kole, ka keng'emech kigeswech: walei kebebertap piikyuk: istoena kiito kot koit ano! Pchechin ngelelik mbareenikyok.

⁵ Menyooru anyun chiito ne wiirtoi porowet eng' parbaryat eng' tuiyetap Kamuktaindet ne Toroor.

⁶ Mwaei icheek kole amomaoten. Ma maotenjin icheek chuuto: ma petos chotisyosyek.

⁷ Ee kootap Jakobo, tos kimwae keele, Tos rartaat Kabuusetap Kamuktaindet ne Toroor? Tos poisyonikyik chuuto? Tos ma yachin ng'aleekyuk ne myee ineendet ne wendote imanda?

⁸ Ago kota koboryena piikyuk ko uu puunyoot: oreegune ngoryeet ne tabanu parak icheek che siirtoi eng' kaalyeet, ko uu piik che ma chamei lugeet.

⁹ Otimdoi kwonyiigap piikyuk koba eng' kooriikwak che korooron; orebe toroornatennyu lagokwak agoi.

¹⁰ Ong'eetyee, ak obe; amu ma olito ole omuung'e: amu murwoonindo ne ng'emisyei, ee, ng'emisyet ne ya kot.

¹¹ Ngot komwa lembech chiito ne wendoti eng' usoonet ak lembechek, kole amaotenun agobo divaik ak maiyek; koegu ineendet maotyotap pichu.

Kayomiset agobo piigap Israel che ng'etunotiin

¹² Ee Jakobo, ayumok iman okweek tugul; ayumi iman che ki ng'et che po Israel; ayumi icheek ko uu keechiiregap Bosra: ko uu akweetap keechiirek eng' kwenutap ole agete, poldos kot amu chaang'indap piik.

¹³ Kagondoe putindet icheek: kagobutis ak koba agoi ormariichet, ak komandae yooto: kagondoe icheek laitoryannywa, ak komi tainnywa Kamuktaindet ne Toroor.