MATAYO 9 - BUKUIT NE TILIIL Sireet ne Dutero Kanon

Kosoobi `Jeso chii ne ki meat poor

¹ Ki laany anyun moingetap peek ak kolanda koit nganasennyi.

² Ak ogeero, ki kimutyi ineendet chiito ne myani, ne meat poorto korue itoogut: ak ye kingo keer Jeso kayanennywa, koleenji ne meat poorto, Weeri, nyiganitu; kagenyoun kaat tengekwogiguk.

³ Ak ogeero, ki mwa alak che po siriik eng' mugulelwekwak kole, Mwaei chiichi ng'aleek che yaacheen agobo Kamuktaindet.

⁴ Kole Jeso, “Kalya si obwaat yaityet eng' mugulelwekwok? Amu ki ingen kabwaatutikwak.

⁵ Nee ne nyumnyum, kemwa keele ‘Kagenyoun kaat tengekwogiguk anan keele ng'eet ak iwe?’

⁶ Ago si onai ole tinyei kimnateet Weeriitap chii eng' ng'wony konyochi kaat piik tengekwogik” Eng' yooto koleenji anyun ne meat poorto, “Ng'eet, ip itogung'ung' ak iwe koong'ung'.”

⁷ Ki ng'eet anyun ak kwo koonnyi.

⁸ Ago ye kingo keer tuiyosyek, koywei ak kolas Kamuktaindet ne igoochin chii kimnateet ne uu nooto.

Keguure Matayo

⁹ Ak kingo siirto Jeso eng' olooto, kogeer chiito, ne kiguure Matayo, kotebee ole kitaage aisuruut ak ki leenji, “Isubwo.” Kong'eet anyun ak koosup.

¹⁰ Ye ki amisyei Jeso eng' ko, kobwa taagigap aisuruut che chaang' ak kiptengeginik ak kotebi kobooto Jeso ak kasubikyik.

¹¹ Ak ye kingo keer Pharisaik, koleenji kasubikyik, Amu nee si koamisyei Kanetindeng'wong' ak taagik che po aisuruut ak kiptengeginik?

¹² Ago kingo kas, koleenji, “Ma machei che chamegei chepkerichot, ago che myandos.

¹³ Ago oba okweek, si oneetkei ole teptoi ng'olyoondoni, ‘Amache rireenetapkei, ma mache tiseiywo.’ Ki ma anyo aguur che po imanda, ago kiptengeginik.”

Rateetapkei

¹⁴ Ki pwanji anyun kasubigap Johana ak koleenji, “Amu nee si kirugutige acheek ak Pharisaik konyil che chaang', ago ma irugutegei kasubiguk?”

¹⁵ Ak ki leenji Jeso, Imuuchi icheek che kogiguurchi katunisyet koaragenso, kota komi ak sandet? Ago pwoonei peetuusyek, che tuun ki istoe sandet icheek, ak korugutkei anyun.

¹⁶ Ak ma indo chii akwot ne leel ngoryeet ne oos; amu kereri akwot ne leel ngoryeet ne oos, ak koyait kosiir ole kagereer.

¹⁷ Amaindo piik divaik che leelach lolotinwek che oosen: amu kereri lolotinwek, ak kotumdagei divaik, ak kobek lolotinwek: ago kindoi divaik lolotinwek che leelach, ak kotebi tuwai.

Kinyai lakwa ak chebyoso

¹⁸ Kingo ta komwachin icheek ng'aleechu, ogeero, ki nyo pounindo, ak kong'uruukyi ineendet ak kole, “Kagome cheptonyu nguniito: ago nyoo igonoor ineendet eung'ung', si kosap.”

¹⁹ Ak king'eet Jeso, koosup ineendet, ak ki isup kasubikyik ak icheek.

²⁰ Ogeero, kobogoryot, ne kimandae korotiik eng' kenyiisyek taman ak aeng', ki isubu Jeso eng' let, ak kotwa tabandap ngoryennyi:

²¹ amu ki mwa eng' muguleldanyi, kole, “Ngot atwa kityo ngoryennyi, asabe.”

²² Ago ki welelgei Jeso kogeer ineendet ak kole, “Chebi, nyiganitu; kagosaabin kayaneng'ung'.” Ak kisop kobogoryot kobooch sainooto.

²³ Ak kingo it Jeso kootap pounindet, ak kogeer piik che kuutei ndurerusyek, ak piik che sololendos,

²⁴ koleenji, “Oistegei: amu ma me chepto, ago inuuchi.” Ak kirorechi ineendet kochot.

²⁵ Ago kingo kageoon tuiyet koba saang', kwo ko, ak konam eutap chebooto; ak kong'eet ineendet.

²⁶ Ak kiyesto ng'olyoondonooto eng' emonooto komugul.

Konyai `Jeso kipkoratinik aeng'

²⁷ Ak kingo siirto Jeso kwo eng' olooto, koosup ineendet kipkoratinik aeng', kowaagoti koleen, “Rireneige, ee weeriitap Daudi!”

²⁸ Ak kingo kakwa ko, kobwonji ineendet kipkoratinichooto: ak koleenji Jeso, “Oyani ole amuuchi ayai niito?” Koleenji, “Wei, Kiptaiyat.”

²⁹ Kotwa anyun konyekwak, ak kole, “Ingoyaak eng' okweek ko uu kayaneng'wong'.”

³⁰ Ak ki yaatagis konyekwak. Ak ki kergong' Jeso miising', koleenji, “Oriip among' konai chii.”

³¹ Ago ki pa, ak koiyestaat ng'olyoot agobo ineendet eng' emonooto komugul.

Konyai `Jeso chii ne namaat kuut

³² Ak ye kita kobendi, ogeero, ki kimutyi ineendet chii ne namaat kuut ne ki tinyei oindet.

³³ Ak kingo kageoon oindet, kotwek ne namaat kuut; ak ki kwong'yo tuiyosyek, kole, “Ki tomo kegeerei ne uu ni eng' Israel.”

³⁴ Ago ki mwa Pharisaik, kole, “Oone oik eng' ne oo ne po oik.”

Koriiree `Jeso piik

³⁵ Ak kiwendote Jeso nganasook tugul, che eecheen ak che mengeechen, koneetisyoti eng' sinagogisyekwak, ak koamdaati logoiywek che myach che po laitornatet, ak kosabooti che myandos eng' koroito age tugul, ak eng' nyalulnateet age tugul.

³⁶ Ago ye kingo keer tuiyosyek, koriiregei icheek, amu kinyerootiin ak koiyestootin, ko uu keechiirek che ma tinyei mestowot.

³⁷ Ki leenji anyun kasubikyik, “Oo kesisyet iman, ago ng'ering' kiboitiinik.

³⁸ Nooto anyun osaa Kiptaiyat ne po kesisyet, si kobiit koyookyi kiboitiinik kesisyennyi.”