MATAYO 28 - BUKUIT NE TILIIL Sireet ne Dutero Kanon

Ng'eetyetap Jeso

¹ Kingo neegit kogeskei peetuutap sabato, ko katoi koeech emet eng' peetuutap tai ne po wigiit, kobwa Maria Magdalene ak Maria age kogeer kererit.

² Keero, ki potan ng'wony miising'; amu ki choorgei malaikaiyatap Kiptaiyat eng' kipsengwet, konyo komilda koita ak kotebee koiata.

³ Ki uu kalyeleet itoondanyi, ak ki leelach miising' ngoroikyik ko uu teluji.

⁴ Ki potanso asigarik kot koigei piich che kagobek amu ki iywei ineendet.

⁵ Ki mwachi malaikaiyat kobogorisyek koleenji, “Amoaragen; angen ale ocheeng'e Jeso ne ki kigartaat.

⁶ Ma komi yu; amu kagong'eet, ko uu ye ki kamwa. Obwa, ogeer ole korue Kiptaiyat,

⁷ ak obe ochakte omwachi kasubikyik oleenji, ‘Kagong'eet eng' che ki kobek; ak ogeero, indoenok kowendi Galilaya; ogeere ineendet eng' olooto.’ Ogaso, kaamwaiwok.”

⁸ Ara ki pa kochaakta kobagaach kererit eng' kaiyweisyet ak poiboiyet ne oo, ki rwai koba komwachi kasubikyik.

⁹ Ak ogeero, kituiye Jeso icheek, ak koleenji, “Chamge!” Ak ki pwanji `icheek ineendet, konam keelyekyik, ak kolas ineendet.

¹⁰ Ki leenji Jeso anyun icheek, “Amoiywei: oba omwachi che kitupche koba Galilaya, ak keera icheek eng' oliindo.”

Ng'aleegap asigarik

¹¹ Ye kita kobendi, komong'ji nganaseet alak eng' asigarik ak komwachi tisiik che eecheen tuguuk tugul che kagoyaagiis.

¹² Kingo kagoyumgei ak poisyek, korwooch kole kogoochi asigarik fedhaisyek che chaang',

¹³ koleenji, “Nyolu omwa ole, ‘Kobwa kasubikyik kemoi ak kochoor ineendet koip kota keruitosi.’

¹⁴ Ngo kas pounindet ng'olyoondoniito, kigaigai ineendet ak kesorwok eng' nyalilda.”

¹⁵ Kotaach anyun fedhaisyek ak koyai ko uu ye kaginet. Ak ki yom ng'olyoondoniito Yahudik, agoi ra.

Kayaktoetap kasubik

¹⁶ Ki pa Galilaya kasubik tamanu ak agenge, agoi tulweet ole kiga koarorchi Jeso.

¹⁷ Ye kingo keer `icheek ineendet, kolas; ago kisage alage.

¹⁸ Ak ki nyoonji `Jeso icheek ak koleenji, “Ki kegoono kimnateet tugul eng' kipsengwet ak ng'wony.

¹⁹ Nooto anyun oba ak oyai piigap pororyosyek tugul koek kasubik, obatisan icheek eng' kainetap Kwanda ak ne po Weeriit ak ne po Kabuuset ne Tiliil,

²⁰ oneet icheek koosup tuguuk tugul che kaang'atak. Ak ogeero, ami kobootok eng' peetuusyek tugul, agoi kagesunetap ng'wony.”