MATAYO 24 - BUKUIT NE TILIIL Sireet ne Dutero Kanon

Ng'emisyetap Hekaluut

¹ Ye ki mandoi Jeso eng' Hekaluut kowendi pandanyi, kobwonji kasubikyik ak koboorchi ineendet teeksosyegap Hekaluut.

² Ago ki wolji ineendet icheek kole, “Mogeere tuguuchu tugul? Amwaiwok iman ale, ma koi ng'etunee koita age paragutap age, ne ma ki wiirchin ng'wony.”

Kaimutik

³ Ye kitebyei ng'wony eng' tulweetap Mseituni, kobwonji ineendet kasubik komi ineegei, ak kole, “Mwaiwech, egu au tuguuchu? Ak tuun uu nee kaboorunetap nyonuneng'ung' ak kagesunetap ng'wony?”

⁴ Kowolji Jeso koleenji, “Oriipkei si ma ibeetook chii.

⁵ Amu tuun pwoonei che chaang' eng' kainennyu koleen, ‘Aa Kristo’ ak kobeet che chaang'.

⁶ Tuun ogase agobo lugoosyek ak ng'aleek agobo paretapkei; oriipkei si moaragense; amu pwoonei tuguuchu matiny; ago tomo koitu kagesunet.

⁷ Amu tuun setyin pororyet age pororyet age, ak setyin laitornatet age laitornatet age, ak tuun piitu rubosyek ak potaneetap ng'wony eng' emotinwek che teerchiin.

⁸ Ago tuguuchu tugul ko taunetap ng'waninwek.

⁹ “Ak kogoitok icheek kinyaliilak ak kebaraak; ak kowechok pororyosyek tugul agobo kainennyu.

¹⁰ Tuun ibutyin tengek che chaang', tuun ng'wektogei ak kosuryo icheegei eng' icheegei.

¹¹ Tuun ng'eetos maotik che chaang' che po lembech ak kobeet che chaang'.

¹² Ak amu tesoksei yaityet, kogaitititu chamyetap che chaang'.

¹³ Ago ineendet ne muitoi agoi kagesunet, kesaru.

¹⁴ Ak logoiywechu myach po laitornatet ko tuun keamdaati eng' ng'wony komugul koek paornateet eng' pororyosyek tugul; ak koit anyun kagesunet.

Kaimutyet ne oo

¹⁵ “Ye ogeer anyun kiit ne kiwechei ne po ng'emisyet kotonone ole-tiliil, ko uu ye ki mwa maotyot Daniel (ingoguiyo ineendet ne somani),

¹⁶ ko ingomwechi tuloonook anyun icheek che mi Judea;

¹⁷ ama choorugei ineendet ne mi koot parak si konem tuguuk che mi koonnyi;

¹⁸ ama weekyingei let ne mi mbar si koip ngoryennyi.

¹⁹ Pwo eng' icheek che chii oo ak che tinyei lagok che reritos eng' peetuusyechooto!

²⁰ Osaa anyun si ma piit mweeng'wong' eng' peetuusyegap kaititindo anan eng' peetuutap sabato.

²¹ Amu tuun piitu nyalilda ne oo, ne kitom kobiitu kobooch taunetap ng'wony agoi nguno, ama koegu kogeny.

²² Ak nda ma kiga keetil konwagitu peetuusyechooto, ta ma ki saru chii; ago kitilei peetuusyechooto agobo che lewenotin.

²³ “Ngo mwaiwok chii age tugul eng' peetuunooto kole, ‘Ogeero! Mi oli Kristo’ anan ‘Mi olo’ ko mat oyan.

²⁴ Amu tuun ng'eetos Kristoisyek che po lembech ak maotik che po lembech, ak koboortoi kaboorunoik ak kwang'utik che eecheen; si kobeet, nda imugaksei, agot che lewenotin.

²⁵ Ogeero, kaasip amwaiwok.

²⁶ Nooto anyun ngo mwaiwok kole, ‘Ogeero! Miitei ineendet surkwen,’ ko mat obe. ‘Ogeero! Miitei ineendet koot ne po oriit,’ ko mat oyan.

²⁷ Ko uu ye mong'u kalyeleet eng' kong'asiis ak kegeerot agoi cherongo, ko egu ko uu nooto nyonunetap Weeriitap chii.

²⁸ Oldo age tugul ole mi muusto, koyumjingei olooto motong'wek.

Nyonunetap weeriitap Chii

²⁹ “Ne ma tyanit ko kagogeskei nyalilda ne po peetuusyechooto, koimenit asiista, ama kooluu arawet, ak rorogu kecheik eng' kipsengwet, ak kitumdum kimnatosyek che po kipsengwet.

³⁰ “Ak kotook anyun eng' kipsengwet kaboorunetap Weeriitap chii, ak koteiyo anyun pororyosyek tugul che po ng'wony, ak kogeer Weeriitap chii konyonei eng' pooligap kipsengwet kobooto kimnateet ak liilindo ne oo.

³¹ Ak tuun iyooktoi malaikaisyekyik ak cheet ne oo ne po iryageet, ak koyum lewenikyik kobun usoonaik ang'wan, kobooch tabandap kipsengwet agoi tabanda age.

Kanyool keriipkei

³² “Oneetkei anyun kalewenetap mogoywet: ye kang'arng'aritu mooriikyik, ak kong'atyo sogeek, onai ole neegit kesisyet.

³³ Ara uu nooto, ye ogeer tuguuchu tugul, onai ole kagoriik ineendet, mi kurgotik.

³⁴ Amwaiwok iman ale, ma siirtoi ibini ama isulda tuguuchuuto tugul.

³⁵ Siirtoi kipsengwet ak ng'wony, ago ma siirtoi ng'aleekyuk.

Ma ingen chii peetuut anan sait

³⁶ “Ago ma naei chii age tugul agobo peetuunooto ak sainooto, ma naei agot malaikaisyegap kipsengwet, anan Weeriit, ago Kwanda ineegei.

³⁷ Ko uu ole kiteptoi peetuusyechu ki po Noah, ko egu ko uu nooto nyonunetap Weeriitap chii.

³⁸ Ko uu eng' peetuusyechooto ye kitom kobiit maraneet ko ki amisyei ak koeisei, kiitunisyei ak kogoitoi kitun, agoi peetuut ne ki wo Noah moinget oriit,

³⁹ ak ki ma nai icheek agoi koit maraneet ak kogees icheek tugul, egu ko uu nooto nyonunetap Weeriitap chii.

⁴⁰ Tuun poisyei murenik aeng'u eng' mbar; kimuti age, kebagaakta age.

⁴¹ Tuun ng'aisei kobogorisyek aeng'u eng' koita agenge; kimuti age, kebagaakta age.

⁴² Oriipse anyun, amu mongen peetuut ne nyoonei Kiptaiyandeng'wong'.

⁴³ Ago onai ni: nda kiga nai chiitap ko po koot kole sait ngoro ne nyoonei choriindet, ta ki riipsei ak ta ki ma kochamdoi kebut koonnyi.

⁴⁴ Nooto anyun ochoboge ak okweek, amu nyoonei Weeriitap chii eng' sait ne mobwaati.

Kalewenet agobo otwogik

⁴⁵ “Ng'oo anyun otwogindet ne kiyani ak ko utaat, ne ki inde kiptaiyandennyi kotononji koonnyi, ak kogoochi piik amitwogikwak eng' peetuut ne yamei?

⁴⁶ Paibai otwogindonooto nyooru kiptaiyandennyi komi koboisye ye weigei ineendet.

⁴⁷ Amwaiwok iman ale, indoi ineendet koboi tuguuk tugul che tinyei.

⁴⁸ Ago ngo mwa otwogindet ne ya eng' muguleldanyi, kole, ‘Ta kogaegei kiptaiyandennyu,’

⁴⁹ ak kotoi kobir otwogik, ak koamis ak koeeiso kobooto che pogitos,

⁵⁰ nyoonei anyun kiptaiyatap otwogindonooto eng' peetuut ne leen ineendet ma nyoonei, ak eng' sait ne ma naei,

⁵¹ ak kobir miising' ak kogoochi kebebertanyi kobooto chombilik, egu eng' olooto riirek ak nyeetap kelek.