MATAYO 2 - BUKUIT NE TILIIL Sireet ne Dutero Kanon

Piik che Ng'oomen

¹ Ak ye kingo kagesich Jeso eng' Bethlehem ne po Judea eng' peetuusyek che po laitoryat Herod, ogeero, ki pwa Jerusalem piik che ng'oomen kobunu kong'asiis,

² koteeboti kole, “Mi ano ineendet laitoryatap Yahudik ne ko ki sich? Kogigeer kecheiyandennyi eng' kong'asiis, ak kagibwa kilasu ineendet.”

³ Ye kingo kas nooto laitoryat Herod, koaragen kobooto Jerusalem komugul.

⁴ Ki kuur `ineendet tisiik che eecheen tugul ak siriik che po piik ak koteepse ole ki kisikyin Kristo.

⁵ Ki wolji koleenji, “Ki kisikyi Bethlehem ne po Judah ko uu ye kisir maotyot kole,

⁶ ‘Ak inyee Bethlehem, emetap Judah, ma ii ming'in miising' eng' kandoigap Judah, amu mong'unenen pounindet, ne tuun egu mestowotap piikyuk Israel.’ ”

⁷ Ki kuur anyun Herod eng' ung'oot piik che ng'oomen si kogine kasarta ne kitaagu kecheiyat.

⁸ Ki iyookto anyun koba Bethlehem ak ki leenji, “Oba ocheeng' komyee lakweet ne ming'in, ak ye kaonyooru ineendet, obwa omwaiwo si anyo alas ineendet.”

⁹ Kingo kagogas ng'aleegap laitoryat, koba pandanywa ak ogeero, ki indochi icheek `kecheiyat ne kiga kogeer eng' kong'asiis kot koit ak kotonon eng' paragutap ye ki mi lakweet ne ming'in.

¹⁰ Ye kingo keer kecheiyat, koboiboitu eng' poiboiyet ne oo miising'.

¹¹ Ki pa koot oriit ak ki keer lakweet ne ming'in kobooto kamennyi Maria. Ki ing'uruukso eng' teegis kolas ineendet ak kotyach konoraikwak che po kamanuut, ak kogoochi ineendet kagoochinoichooto po thahabu, tuguuk che nyamdut ak tuguuk che uu igomoik.

¹² Ak ko uu ye kiga kiteechi eng' karwotitoet keleenji amoweekyigei Herod, konam panda koosup ooreet age koba emennywa.

Komwechin Misiri `Joseph ak `Maria

¹³ Ye kingo kagoba icheek, komong'ji `malaikaiyatap Kiptaiyat Joseph eng' karwotitoet ak koleenji, “Ng'eet, imut lakweet ak kamennyi, mwechi Misiri ak itebee olooto agoi tuun amwaun amu cheeng'ei Herod kobar lakweet.”

¹⁴ Ki ng'eet Joseph eng' kemoi komut lakweet ak kamet koba Misiri.

¹⁵ Ki tebee olooto agoi kome Herod si kosulda ne ki mwa Kiptaiyat eng' maotyot kole, “Ki aguur weeriinnyu komong' eng' Misiri.”

Kebarei Lagok che Mengech

¹⁶ Kingo keer Herod kole king'al `ng'oomotik ineendet, konereech miising' ak koyookto kebar lagok tugul che weeriik che po kenyiisyek aeng' ak korek eng' Bethlehem ak eng' tabanwekyik tugul kosuupkei ak peetuut ne kiginee piik che ng'oomen.

¹⁷ Ki isulda anyun eng' peetuunooto ne ki kamwa maotyot Jeremiah kole:

¹⁸ “Ki kegas tuugeet eng' Ramah, riirek ak kateiyet ne oo, riirchin `Rael lagokyik; ma cham kigaigai, amu ma komi.”

Koweegugei eng' Misiri

¹⁹ Ye kingo kagome Herod, komong'ji `malaikaiyatap Kiptaiyat Joseph eng' Misiri eng' karwotitoet ak

²⁰ koleenji, “Ng'eet, imut lakweet ak kamet, ak obe emetap Israel amu kogobek che ki cheeng'ei kobar lakweet.”

²¹ Ki ng'eet komut lakweet ak kamet koba emetap Israel.

²² Ago ye kingo kas kole pou `Arkelau Judea eng' pounateet ne ki po kwandanyi Herod, koywei kwo olooto. Kingo kagoteechi Kamuktaindet eng' karwotitoet, koweekyigei komoswegap Galilaya.

²³ Ki tebee nganaseet ne kiguure Nazareth si kobiit kosulda ne ki kamwa maotik kole, “Kiguure ineendet Nazaretindet.”