MATAYO 15 - BUKUIT NE TILIIL Sireet ne Dutero Kanon

Teebutyet agobo pitonwek

¹ Ki pwanji anyun Jeso `Pharisaik ak siriik che ki punu Jerusalem ak koleenji,

² “Amu nee si kobistoe kasubiguk pitonwegap poisyek? Amisyei icheek kotom koun eunekwak.”

³ Ki wolji koleenji, “Amu nee si obistoe ng'atuutyetap Kamuktaindet amu pitonwekwok?

⁴ Amu ki ng'at Kamuktaindet kole, ‘Teech kwandang'ung' ak kamenng'ung',’ ak, ‘Ineendet ne mwaei ne ya agobo kwan anan kamet, komeei iman.’

⁵ Ago omwae ole age tugul ne leenjin kwan anan kamet, ‘Kiit age tugul ne kota nyolu atoretenen ko koagoochi Kamuktaindet,’

⁶ koma teechei ineendet kwanda ak kamet; kaowal anyun ng'olyootap Kamuktaindet koek puch amu pitonwekwok.

⁷ Okweek chombilik! Ki maoten Isaiah komyee agobo okweek ye ki mwa kole,

⁸ ‘Teecha pichu eng' kutusweekwak, ago looen mugulelwekwak eng' anee.

⁹ Ilaswo icheek puch; kaneetisyosyekwak che ineetisye ko ng'atuutigap piik.’ ”

Tuguuk che imurwoni Chii

¹⁰ Ki kuur tuiyet kobwa ole mi ak koleenji, “Ogas ak oguiye:

¹¹ ma che chutei kutit che imurwoni chii, ago che mang'une kutit che imurwoni ineendet.”

¹² Ki pwa anyun kasubikyik ak koleenji, “Ingen ile kaginach Pharisaik ye ka ngo kas mwaoni?”

¹³ Kowol kole, “Keswot age tugul ne ki ma kool Abba ne mi kipsengwet, kitutu.

¹⁴ Omete icheek; icheek ko kandoik che koryotiin. Ak ngo ndochi kipkoraatyat, kipkoraatyat, kororokyin tuwai keriinget.”

¹⁵ Ki wolji Petero koleenji, “Mwaiwech agobo kalewenonooto.”

¹⁶ Koleenji, “Kagatomo oguiye ak okweek?

¹⁷ Tos mongen ole, kiy age tugul ne punei kutit kowendi moo ak komandoi saang'?

¹⁸ Ago tuguuk che mang'une kutit kobunu muguleldo, ak chooto che ing'waniti chiito.

¹⁹ Amu kabwaatutik che yaach, rumisyosyek, ibeetapkei, soksosyek, choorsosyek, paornatosyegap lembech, ng'aleek che yaacheen ko mang'une muguleldo.

²⁰ Chuuto tuguuk che ing'waniti chii; ago ngeamisye eunek che ma kiuun koma ing'waniti chii. ”

Kayanetap kobogoryo

²¹ Ki wo Jeso eng' olooto, kwo komoswek che po Tyro ak Sidon.

²² Ki mong' eng' komoswechooto kobogoryot ne po Kanaan, koriirei koleen, “Rireena ee Kiptaiyat, inyee weeriitap Daudi! Inyaliili miising' oindet cheptonyu.”

²³ Ago ki ma wolji `inee ng'olyoo age tugul. Ki pwanji kasubikyik, ak kogaigai ineendet koleenji, “Oon kwo, amu riirchinootech.”

²⁴ Ki wol kole, “Ki kiyokwo anyoonji keechiirek che lusyotin che po kootap Israel icheegei.”

²⁵ Ki nyo ak kogutung'ji ineendet koleen, “Kiptaiyat, toreto!”

²⁶ Ago ki wolji kole, “Ma myee kerebee lagok amitwogikwak ak kewiirchi sesenik.”

²⁷ Ago ki wol kole, “Ee, Kiptaiyat, nga agot sesenik ak icheek koamei amitwogik che iroroi eng' meesogap kiptainikwak.”

²⁸ Kowolji Jeso koleenji, “Chebyosoni, oo kayaneng'ung'! Ingoyaak ko uu nooto imache.” Ak kisop cheptonyi kobooch sainooto.

Kosoobi `Jeso piik

²⁹ Ki wo Jeso eng' olooto ak kwo koroop ole neegitee araraitap Galilaya. Ki wo kotogosta tulweet, ak kotep ng'wony eng' olooto.

³⁰ Ki pwanji ineendet tuiyosyek che eecheen komutu salamonik, che koryotiin, che namotin kutuswai, che po mugungon ak alak che chaang', komut ak konde tainnyi; ak ki isap icheek.

³¹ Ki kwong' tuiyet ye kingo keer kong'alaaldos che ki namotin kutuswai, ko kagosapcho che ki po mugungon, kobendoti che kisolomon ak kogeertoi che ki koryotiin. Ki ilas icheek Kamuktaindetap Israel.

Kobaei `Jeso piik eliphuusyek ang'wan

³² Ki kuur Jeso kasubikyik kobwa ak koleenji, “Ariiree tuiyoni, amu kogetebi tugul peetuusyek somok ama tinyei kiy ne amei. Ma mache aunda icheek koba koamoti rubo, amu imuuch kotanuiso eng' ooreet.”

³³ Kowol kasubikyik kole, “Ki nyoorchini ano magatiinik che tee cho eng' surkwen che yamei kebae tuiyet ne tee ni?”

³⁴ Koleenji Jeso, “Otinye magatiinik ata?” Kowol kole, “Tisap ak njireenik che mengeechen che ng'ering'.”

³⁵ Ki ng'at tuiyet kobur,

³⁶ ak konam magatinichooto tisap ak njireenik, ak ye kiga komwa kongoi, kobuutul ak kogoochi kasubik, yeityo kogoochi kasubik tuiyosyek.

³⁷ Ki am tugul kot kobiyong'so, ak koyum katuganik che kiyam konyi mesendoik tisap.

³⁸ Icheek che ki amis ko ki murenik eliphuusyek ang'wan, ama kiit kobogorisyek ak lagok.

³⁹ Kingo kagounda tuiyosyek koba, kolaany moingetap peek, ak kwo kotokyigei ye neegitee tabanwegap Magadan.